PILA sang nasugilanon naton, parti sa ulihi nga hampang sa tunga sang San Miguel Beer (SMB) kag Ginebra, indi makapati nga mapierde ang SMB kontra sa Ginebra.
Sa nagligad nga Game 6 sang Miyerkoles sa ila Best of 7 championship round, ang Ginebra nagdaug, 4-2, kontra sa defending champion nga SMB.
Kalaw-ay kuno sang hampang sang SMB. Daw indi kuno mapatihan. Labi na gid sang pagsugod sang ila hampang sa 3rd quarter tubtub sa 4th kag last quarter. Daw hungod kuno nga nagpa-pierde ang SMB.
Bisan mahapos nga “shoot” indi nila kuno mapasulod kag daw indi sila kahibalo mag-gwardya nga naghatag sing kahigayunan sa Ginebra agud makapamuntos sing husto.
Well, gapati kita nga indi man seguro hungod nga nagpa-pierde ang San Miguel Beer. Ano balaklon katulad sang pila ka player sadtong nagliligad nga dinag-on sa PBA nga na-iskandalo kay ang iban ginabaligya nila ang ila hampang?
Of course, posible. Pero gapati kita nga wala ini sa kalidad sang San Miguel Beer.
Kulang lang seguro sa kondisyon ukon “low”, ukon manubo, lang ang ila “biorhythm” nga nagakatabo man sa mga atleta. Pareho bala sa mga babaye nga may tion sang ila pagdugo nga mangakig na kon tandugon. Samtang “high”, ukon mataas, ang “biorhythm” sadto sang Ginebra.
In fact, nakanotar gani ang isa ka matahum nga court announcer sang pagpaluya sang taga-SMB samtang nagahampang. Daw kapoy kaayo sa ila panghulag.
Importante ang ining “biorhythm” sa player. Dapat mabal-an ini sang coach agud maseguro nga ang tanan nga mga player sa court yara sa ila “high” nga “biorhythm” agud makahampang sing may kapagsik.
Basi masiling kamo nga pagpangapin ini sa Ginebra. Indi. Ang matuod, “fan” ako ya sang SMB, madaug man ukon mapierde.
Kongrats na lang sa Ginebra. Tubtub sa dason nga sambuwa sa basketball court.
***
State-sponsored, ukon kahimuan sang gobyerno, gid bala ang pagpamatay sang mga drug personalities sa idalom sang administrasyon ni Presidente Duterte, katulad sang pagpati sang iban?
Nga ini kahimuan gid man sang aton kapulisan pagkatapos magsugo ang Presidente nga pamatyon ini sila?
Sa matandaan ta pa, sa una nga inadlaw mismo sang iya pagpungko sa pwesto, nag-warning na si Presidente sa mga drug personalities – druglord, pusher kag mga protector. Matigda niya nga ginsiling nga “I will kill you!”
Apang ini bala nagakahulugan nga basta pamatyon lang ini sila sandig lang sa suspetso kag indi sandig sa aton “Rule of Law” nga naga-mando nga tagaan sila sing “due process” kag “fair trial” tubtub mahusgahan gid sang husgado?
To be fair sa kay Presidente kag sa mga pulis, gin-explikar sang Presidente kag sang pamunuan sang kapulisan nga ang mga suspetsado puede mapatay lang in “self-defense” sa bahin sang mga pulis ukon sa tion lang sang pagpakig-enkwentro sa ila.
Sa subong, sobra na sa 4,000 ang napatay nga mga drug personalities sa legitimo nga operasyon, sunu sa kapulisan.
Sunu ugaling sa mga human rights advocates, sobra 10,000 na ang napatay sa sining War on Drugs.
Kon matuod, ano ya ang natabo sa mga napatay nga mga 6,000 nga wala ma-rekord sang kapulisan, apang na-rekord sang mga human rights advocates? Ginkalimtan lang tungod indi matagaan sing ebidensya ukon testigo sa idalom sang ginasiling nga legitimo nga operasyon?
In fact, gadalom gani ang suspetso sang iban nga may “death squad” nga ginalakipan sang mga pulis – retirado man ukon yara sa aktibo nga serbisyo.
Ginpatihan ini sang iban tungod sang pila ka mga kaso sa diin na-link ang pila ka mga pulis sa pagpamatay sang mga motorcycle-riding, nga mas popular tawgon nga riding-in-tandem tungod sa masami duha ang sakay sini.
May mga 900 ka kaso na sing motorcycle-riding nga pagpamatay sumugod sadtong Oktubre 11, 2017 tubtub Hunyo 4,2018.
Pero, kon may ara gid man nga “death squad”, ini bala nga mga pulis nagapaidalom sa sugo sang ila pamunuan? Ukon naga-akto lang sa ila kaugalingon kasubong sa mga sibilyan nga mga vigilantes nga “frustrated” sa kapaslawan sang aton gobyerno nga madakpan kag mahunong sa bilangguan ining mga “salot sang katilingban”?
Kon ano man ang matuod, kinahanglan dira ang pamatuod. Ang aton Human Rights Commission daw wala man ugaling mapakita nga ebidensya. (w_mateojr@yahoo.com/PN)
