NAGLANOG na ang balita nga natigayon gid man nga matunga sa duha ka distrito ang probinsya sang Aklan.
Sadtong Setyembre 24, 2018, ginpirmahan na ni Presidente Rodrigo Duterte ang Republic Act 11077 nga nagatunga sa Aklan sa duha ka legislative district santu man sa pag-aprubar sang Kongreso sa nasambit nga hagna.
Bangud nga natunga na, ang una nga distrito sang Aklan ang pagalakipan sang mga banwa sang Altavas, Balete, Banga, Batan, Kalibo, New Washington, Libacao kag Madalag.
Mangin kabahin naman sang ikaduha nga distrito sang Aklan ang mga banwa sang Buruanga, Ibajay, Lezo, Makato, Malay – kon sa diin nahamtang ang Boracay Island, Malinao, Nabas, Numancia kag Tangalan.
Sa idalom sang bag-o nga kasuguan, ang incumbent representative sang Aklan ang magapadayon sa pagrepresentar sa ila distrito tubtub ang ang mga tiglawas sang duha ka bag-o nga distrito ang mapilian sa masunod nga eleksyon sa Mayo.
May mandatu ang Commission on Elections nga magpagwa sang angay nga patakaran kag regulasyon tuhoy diri.
Samtang, ang syudad sang Iloilo nga madugay na nga nagahandom nga matunga ang syudad sa duha ka distrito ang padayon nga nagahulat sa sini nga kahigayunan.
Nagapabilin nga malayo ang kapalaran, maiwat ang swerte kag ginakapoy sa paghulat nga matigayon ang ini nga plano.
Ginsakdag sadto ni Senador Panfilo Lacson ang madugay na nga plano ni Congressman Jerry Treñas nga tungaon ang syudad sa duha ka distrito.
Nag-file sadto si Lacson sang senate bill sang tuig 2017 nga nagatuyo sang pagtunga sang syudad sa duha ka distrito kag ang iya hagna amo ang counterpart measure sang House Bill No. 1219 nga gin-file ni Treñas sadtong Hulyo 2016.
Nahibaluan nga sadtong 2010, kaangay man nga hagna ang ginduso ni Treñas nga gin-aprubahan sang House of Representatives sa ikatatlo kag pinal nga pagbasa apang napaslawan naman nga mapasar sang Senado antes ang pagtakop sang 15th Congress.
Kon mangin kasuguan ang redistricting bill, ang syudad matunga sa duha ka distrito kag ang una nga distrito pagalakipan sang Mandurriao, Jaro kag La Paz; samtang ang ikaduha nga distrito pagalakipan naman sang City Proper, Lapuz, Arevalo kag Molo.
Nagapati si Treñas nga ang tikang nagatuman sa tanan nga parametro nga natalana sa Konstitusyon. Nasaad sa Section 5, paragraph 3, sang Article VI sang 1987 Constitution nga kinahanglan ang syudad may minimum population nga 250,000 agud makaangkon sang tiglawas sa kongreso.
Gin-athag sini nga indi kinahanglan nga magdugang sang isa pa ka 250,000 ka populasyon agud nga makaangkon sang dugang nga distrito.
Nahibaluan nga ang syudad, base sa datus gikan sa Philippine Statistics Authority, may yara sang kabug-usan nga populasyon nga 447,992 kutob sadtong Agosto 2015.
Ginalantaw ang mangin daku nga bentaha para sa mga pumuluyo sang syudad, para sa kabug-usan sang syudad, kag para mahatagan sang higayon kag ligwa ang mga naga-agaway sa posisyon bilang kongresista.
Nagaselebrar na ang Aklan sa kadalag-an nga ang ila handom natigayon. Samtang, ang syudad sang Iloilo padayon nga nagahandom.
Lantawa, may natunga kag may nagatunganga. (bertladera@gmail.com/PN)
