SUNU sa World Health Organization (WHO), wala pa sing nakuha nga ebidensya nga ang isa ka pasyente nga naka-recover sa COVID-19 indi ma-re-infect, ukon liwat malatnan sang virus sini.
Tungod sini, kinahanglan nga mag-undergo sing counselling ang naka-recover nga pasyente bag-o siya ma-release sa ospital.
Nagpaandam man gani ang WHO sa mga gobyerno nga indi pa maghatag sang “immunity passport” sa sining naka-recover nga mga pasyente.
In fact, ang Brunei nag-report sadtong Abril 14 sang 11 ka naka-recover nga mga pasyente nga liwat na-infect. Gani, ang Brunei Government nag-require sa ila sang re-swab testing agud maseguro gid nga wala sila liwat na-infect.
Kon husto ang report nga nabaton naton, isa sang mga naka-recover sa COVID-19 si Senador Sonny Angara. Ugaling, nag-report man siya nga liwat siya natapikan sang COVID-19 virus kag liwat nagpa-health care.
Tungod sini, ginapa-practice gihapon ining mga pasyente nga naka-recover sa COVID-19 sing “utmost hygiene” agud malikawan ang “second infection”.
Isa sang gina-require man sa ila ang paggamit gihapon sang face mask sa publiko, samtang sige pa ang pagduging sang COVID-19, nga ginapangamuyo naton matapna na sa indi na madugay.
Tani madiskubrihan na ang bakuna (vaccine) nga bagay diri, ukon indi gani mag-untat na gid lang ini tungod wala na sing host nga masudlan sila tungod sa husto nga pag-amlig sang aton mga pumuluyo.
***
Sunu mismo sa mga health authorities, ang isa ka tawo malatnan lang sang balatian nga COVID-19 kon mahaklo niya ang talsik sang droplets halin sa pag-ubo ukon pangatsi ukon pagdupla man sang infected nga kaatubang sing malapitan.
In other words, kon wala man lang sing tawo sa malapitan nga naga-ubo ukon nagapangatsi, ukon gapanupla lapit sa imo, wala man sing masaylo nga COVID-19 virus sa imo kag, natural, indi man ka ma-infect sining dala niya nga balatian.
It appears nga kasubong man ang matabo – nga indi ka malatnan – bisan naga-ubo pa ukon gapangatsi, ukon gapanupla pa – ang sa imo atubangan sa imo malapit nga palibut, basta indi lang ka malab-ut sang droplets ukon laway sang malapit sa imo.
Ini ang rason kon ngaa, finally, ginpasugtan man sang IATF ang pangabay ni Iloilo Gov Arthur Defensor Jr. ang angkasanay sa motorsiklo sang duha nga nagasakay nga may nagakaigu man nga proteksyon.
Si Iloilo City Mayor Jerry Treñas ang nagbalita sini sa Panay News sadtong pagsugilanon nila ni Secretary Carlito Galvez Jr., ang chief implementor sang national action plan sa coronavirus disease 19 (COVID-19).
Ang motorcycle design nga ginpresentar ni Gov. Defensor nagaseguro nga wala sing physical contact sa tunga sang drayber kag sang backrider, sa dugang pa nga sugid ni meyor.
Sa nahibl-an na, ginadumilian sang task force ang backriding tungod sa requirement sang physical distancing, nga at least isa ka metro.
Sa design ni gob may plastic divider sa tunga sa drayber kag backrider. Ining divider himo sa “non-porous, transparent material”. Ang divider naangtan man sing isa ka handle bar sa diin makapangunyapot ang backrider.
Ang pamangkot: Pwede man bala ang kasubong nga ideya sa diin makalapitay na ang mga tawo, katulad kon naga-attend sa isa ka gathering katulad sang concert, meeting, jogging pang-kadam-an, ukon ang paghampang sing basketball, nga popular nga kalingawan sang mga Filipino?
Paano ini mahimo? Basi pwede ang isa ka mabakud kag transparent nga taklob sa ulo sang tawo nga may breather sa ubos sang sag-ang nga may epekto katulad sang personal protective equipment (PPE) nga ginagamit sang mga frontliners sa health facilities.
Pwede man ina seguro ma-imbento sang Pinoy. Tutal madamo man kita sang mga imbentor diri. Sa isa gani ka contest sa Espanya sa padamu-damo makuha nga gatas sa baka, daug gani kita! Paano? Ang uhaw nga toro ang ginkuhaan niya sing gatas! He-he-he!
Tani barato lang ining headgear nga ini agud makagamit man ang kadam-an kag indi mag-suicide ang iban sa kaaburido nga indi makalagaw-lagaw kag makapa-hangin-hangin. Mas madamo pa sila kuno sangsa napatay sa COVID-19 diri sa Western Visayas, nga mga 11 ka tawo na!/PN
