LUAS sa suod nga myembo sang amon pamilya wala na sing nakahibalo sang akon birthday agud bisan ma-greet man lang ako.
Man wala man ako nagapanugid sa iban. Kag kon may iban nga nakahibalo gid man, exceptional na ini sila nga mga tinuga.
Sa tuig nga ini, may duha gid man sa gwa sang akon pamilya ang nakadumdum agud ma-greet ako mismo sa adlaw sang akon kaadlawan.
Thanks Frat Brod Rex Bacaling Demafelis. Si Brod Rex 2012 Charter (first) President sang amon Samahan, nga isa ka paghugpong nasyonal sang nagakalain-lain nga tsapter sang amon brotherhood (Fraternity-Sorority).
Former Vice Chancellor sa UP-Diliman si Brod Rex kag isa ini ka scientist sa UP-Los Baños nga tapos sa MS in Chemical Engineering sa UP-Diliman.
Thanks man kay Pete (Jimenea), ang isahanon sa fellow mediamen ko nga nakadumdum sa pag-greet man sa akon kaadlawan.
Sa liwat, thank you gid sa inyo nga duha!
***
Amat-amat nagaathag ang mga isyu nga dal-on sang Opposition Coalition nga ISambayan sa palaabuton nga May 2021 presidential election.
Sunu sa spokesperson sang ISambayan nga si retired Senior Supreme Court Justice Antonio Carpio, ginapangunahan ini sang ila indi mabali nga tindug sa Demokrasya, human rights, kag soberanya sang Filipinas.
Una na dira ang isyu sang “authoritarian” nga klase sang pangginahum ni Presidente Duterte sa pagpagusto sini sang iya luyag ihambal kag isugo sa kapulisan bisan wala na nagakaigu sa kasuguan kag maayo nga binatasan.
Indi man mabali ang tindug sang ISambayan batok sa anti-terror law kag death penalty, kag ang tindug sini batok sa extrajudicial killings, kon diin akusado sa karon si Presidente Duterte sang “crime against humanity” sa International Criminal Court tungod sa gina-alegar nga “state sponsored” nga pagpatay sang sobra 10,000 sa Duterte Drug War.
Mabaskug man ang tindug sang ISambayan pabor sa aton legal claim sa 200-nautical mile Exclusive Economic Zone (EEZ) sa West Philippine Sea kag Scarborough Shoal, nga gindaug naton sa Hague Tribunal sadtong 2016, nga gintawag ni Presidente Duterte nga isa lang ka “scrap of paper” ukon basura.
***
Sa sining uncompromising nga mga tindug, ang ISambayan wala sing ginapasin-o.
Bisan si boxing legend kag Senador Manny Pacquiao indi gani mabaton diri tungod sa iya tindug sa death penalty kag kwestyonable nga tindug sa extrajudicial killings.
Ang independent critic ni Presidente Duterte nga si Senador Panfilo Lacson indi man gani mabaton sang ISambayan tungod sa iya pagsuporta sa anti-terror law, nga labag sa kahilwayan kag kinamatarong sang mga pumuluyo agud bantayan kag sawayon ang kapaltahan sang gobyerno kay sila ang matuod nga amo (master) kag indi suluguon (servant) sang gobyerno.
Of course, open ang ISambayan sa tanan, lakip na ang luyag mag-upod halin sa Duterte Coalition nga nagapati sa panindugan sang ISambayan.
Bilang coalition lang, ang isa ka grupo nga katapo sini pwede magbulag diri kon san-o nila ini gustuhon.
***
Tungod gani human na ang tindug sang ISambayan sa palaabuton nga May 2021 presidential election, ang kulang na gid lang amo kon paano nila mapaugyon ang mga botante sa sining ila tindug sa Demokrasya.
Parti sa kon ano ang luyag nila sa isa ka Presidente, ang survey sadtong Disyembre 2009 para sa 2010 presidential election nagpakita nga luyag sang mga pumuluyo ang Presidente nga pro-poor, indi corrupt, kag may matarong nga pagkatao.
Gindaug ini nga eleksyon ni Noynoy Aquino sadtong 2010.
Sa panahon ni Duterte, ginpadaug ini siya sang mga pumuluyo sa iya ginpasalig nga liderato nga wala nahadlok sa pag-atubang sa kon sin-o nga poderoso sa sosyedad, katulad sang mga oligarch kag drug lords, lakip
na ang Catholic Church nga sadto nagbulig sa pagtumba kay Marcos.
Unfortunately para sa iya sumulunod, nag-back-fire ining estilo sang iya liderato tungod sa wala nagakaangay nga pamahog, paghingabot, human rights violations angot sa iya drug war, kag ang pagpatumbaya sang kawsa sang Filipinas sa South China Sea.
Salabton man ining mga isyu sang mga kandidato ni Presidente Duterte sa ila pagpangampanya sa May 2021 election tungod sa pag-endorsar sini sa ila.
Gani ginapaabot sang publiko ang pagtuhaw sang mga bagay nga isyu batok sa mga kandidato ni Presidente Duterte, katulad sang “Atin ang Filipinas, huwag i-surrender ito sa China!”, “Panagutin si Duterte sa Crime Against Humanity!”, “Buhay at Kabuhayan ng mga Mahirap Matters!”, “Huwag bastusin ang Kababaehan at Kabataan!”, etc./PN
