MADAMO nga mga meyor sang Iloilo ang nakigkita kay Governor Arthur Defensor Sr. sadtong Byernes, Pebrero 1, parti sa makuha nila nga bulig sa kapitolyo.
Mga 24 sa 43 ka mayor sang probinsya ang nakigsapol gid sa kay Gob kag kay provincial administrator Atty. Suzette Mamon parti sa sining ila ginapangabay.
Ang 18 nagpirma pa gani, sunu kay Radioman Arlos, sang resolusyon agud hingyuon ang Sangguniang Panlalawigan, nga dominado sang oposisyon, nga padasigon ang pag-aprubar sang 2019 Budget.
Ang anom, tungod sang lakat nga importante, nag-una sa paglakat pagkatapos sang panyaga, apang nagpasalig sang ila pag-upod sa hingyo sa SP agud padasigon ang pag-abrubar sang badyet.
Laban sa sining mga meyor nga nakigkita kay Gob yara sa partido Nacionalista nga wala huya-huya nga nagpakigkita sa iya samtang si Gob indi nila ka-partido. Si Gob lakip sa partido PDP-Laban kag ka-partido ni Presidente Rodrigo Duterte.
Ginpangunahan ining mga meyor ni Ajuy Mayor Jet Rojas, nga presidente sang League of Mayors of the Philippines (LMP)-Iloilo Chapter, kag ni Alimodian Mayor Kalay, nga pareho myembro sang Nacionalista Party.
Nabalaka na gid ang ining mga meyor sa madugay nga pag-aprubar sang 2019 sang komite sa Appropriations sa pagpanguna ni Liga President Dorothy Paez nga kaupod sa komite sanday Board Member Domingo Oso kag BM Manny Gallar.
Maathag sa publiko nga ginahungod gid sining tatlo ang pagpa-delay sang pag-aprubar sining badyet tungod indi sila sugot, sa ila pagpamulitika, nga magamit ni Gob ang matahum sini nga mga proyeko kag programa para sa mga pumuluyo.
Ang masubo pa para sa mga meyor amo ang pahayag sang komite sa Appropriations nga sa Marso 2019 pa nila matapos ang ila ubra.
Good practice wala nagatugot nga butangan mo latid ang trabaho sang SP sa badyet kay wala latid ang pagka-kinahanglan sini sang mga pumuluyo.
***
Samtang, nagahulat ang bululigan sang mga banwa nga gasalig man sa bulig sang kapitolyo, katulad sang ila mabulig sa mga atleta sa WVRAA nga natalana sa pagsugod sa Pebrero 17 sa Capiz, kag iban pa nga financial assistance sa mga pumuluyo.
Tungod sini, nagpasar gid ining mga meyor sing resolusyon nga nagahingyo sa Appropriations nga padasigon ang pag-aprubar sang 2019 Budget.
Gaproblema matuod ining mga meyor sa kon ano ang makuha nga bulig halin sa kapitolyo.
Bal-an ninyo, siling ni Mayor Kalay, wala gid man sing daku nga kwarta ang amon banwa, kag tungod sini masalig pa kami sa kapitolyo.
Ginpaathag ni Gob nga wala sing problema ang ginapangayo sining mga mayor kon may pondo lang.
Ara kita sa Reenacted Budget 2018, gani limitado ang aton mahimo nga bulig, siling ni Gob, nga gin-ugyunan man ni provincial administrator Mamon.
Tungod ang magamit lang nga pondo amo ang yara sa Reenacted 2018 Budget, nasiling ni Gob sa balita sang Panay News, sa lugar nga P20 milyones mga P14 milyones lang ang mahatag sa mga atleta. Kulang kaayo ini sa kinahanglan sang mga atleta, siling ni Gob.
Ginkasubo gid ini ni Gob, kay nga daan defending champion ang Iloilo, kag tungod sa kakulangan sang kinahanglanon nga gamit kag training allowance basi indi na mangin kampyon ang Iloilo.
Ginkasubo man ni Gob nga indi ang Iloilo makahatag sang financial assistance sa isa ka daku nga football competition kag sa Batang Pinoy, luas lang sa pagtugyan sa ila ang paggamit sang facilidad sang Iloilo Sports Complex.
Ina tungod kinahanglan masulod pa ang probinsya sa isa ka MOA sa ila nga dapat aktuhan gid sang SP bag-o mahatag ining financial assistance.
Indi man gani makahatag sang P500 ka milyon nga amot sa Dinagyang 2019 kay indi maka-akto si Gob sa request sang Dinagyang Foundation agud bayaran ini nga wala sing resolusyon sang SP.
Ang Local Govt Code nagasiling nga ang SP may obligasyon lang sa padayon nga pagtuon sa badyet tubtub ma-aprubahan ini kag wala na sing ano man maubra nga iban, lakip ang pagpasar sang mga ordinansya kag resolusyon.
Naham-ot gani si Gob sa pagsiling nga indi gani seguro ang SP makapasar sang Resolution of Condolence kon siya mapatay nga indi pa ma-aprubahan ang 2019 Budget. Susmariosep! (w_mateojr@yahoo.com/PN)
