NAHIDLAW na ang pumuluyo sa syudad kag mga pumuluyo sa pila ka mga banwa nga yara sa luyo sang syudad sa kon ano ang mga ginaplano para sa pagtin-ad sang kada isa.
Madasig ang pagtin-ad sang isa ka lugar kon ipaanggid sa isa pa ka lugar bangud man ini sa lokasyon, sa matan-ay nga negosyo, kalidad sang pangabuhi kag paborable nga sadsaran sa pagpanugod sang negosyo.
Madugay na nga ginlamon sang kalinong ang konseho nga amo kuntani ang nagatalakay kon paano ma-synchronize ang development plans sang mga local government unit nga nagabug-os sa konseho.
Ang ginatumod ko nga konseho amo ang MIGEDC nga gintuga paagi sa Executive Order 559 nga pirmado ni anay Presidente Gloria Macapagal Arroyo sadtong Agosto 28, 2006.
Bunga ini sang pagtingob sang Metropolitan Iloilo Development Council (MIDC) nga gintuga paagi sa Memorandum of Agreement sang 2001 kag sang Guimaras-Iloilo City Alliance (GICA) nga gin-formalize sang 2005.
Ang Metro Iloilo Guimaras Economic Development Council (MIGEDC) nagtipon sang mga banwa gikan sa probinsya nga magapokus sa anum ka areas of collaboration. Ginalakipan ini sang basic services, environmental management, public safety and security, land use management, infrastructure development kag economic promotion and development.
Ang MIGEDC nga ginatawag Council, maga-formulate, coordinate kag monitor sang mga programa, mga proyekto kag aktibidades para sa pagbutyog sang pagtin-ad sang ekonomiya kag pag-umwad sang syudad sang Iloilo kag mga banwa sang Oton, San Miguel, Pavia, Leganes kag Santa Barbara kag ang bug-os nga probinsya sang Guimaras bilang suporta sa Mega-Region Economic Development Strategy sang National Government.
Ang konseho pagatapuan sang alkalde sang syudad sang Iloilo bilang chairperson, ang gobernador sang Guimaras bilang co-chairperson kag pagalakipan sila sang mga alkalde sang Pavia, San Miguel, Oton, Leganes, Santa Barbara kag ang presidente sang League of Municipalities sang probinsya sang Guimaras.
Dapat man ang konseho nga magpakig-angot sa Regional Development Council VI kag iban pa nga angay nga local development councils sa pagtuman sang iya katungdanan.
Manami ini nga konsepto bangud naga-ulikid ang kada isa ka katapo sang konseho. Nakahangop ang kada isa nga ang hulag sang isa ka katapo makaapekto sa iban nga katapo.
Hangpon naton nga ang syudad sang Iloilo nagakwa sang suplay sang iya pagkaon gikan sa mga katupad nga banwa. Ang pagtin-ad sang syudad may epekto man sa sektor sang transportasyon kag sa mga boarding house kag iban pa.
Isa ka ehemplo diri amo ang biyahe sang mga jeep gikan sa katupad nga mga banwa nga sadto ang Leganes makalab-ot pa sa Iloilo Terminal Market. Apang, sang pinakaulihi nga hitabu ini ang kutob na lang sa Infante kag nagalibot pabalik.
Sa subong may ipatuman naman nga ordinansa nga kutob na lang sila sa terminal kag indi na makasulod sa syudad.
Kon nagasigulanon pa kuntani sila paagi sa MIGEDC, indi matam-an ang mga driver kag mga pasahero. Mas maplanuhan sing maayo bangud mapamatian ang kabalaka sang kada LGU.
Posible nga may konsiderasyon nga ihatag ang isa sa isa bangud indi pwede nga pabudlayan ang imo kasilingan para lang sa imo kaugalingon nga kasulhayan.
Kon nagatipon kag naga-istorya kuntani sila sa MIGEDC, mapamatian sang kada isa ang yamo kag reklamo sang ila nasakupan nga pwede mapalab-ot sa konseho kag mahatagan sang balor kag solusyon.
Isa sa anum ka areas of collaboration amo ang economic promotion and development kag daku diri ang papel sang kuryente para sa tayuyon nga pagtin-ad.
Nagamuad ang mga establisemyento sa mga katupad nga banwa, mas nagalapad ang mga subdivision kag housing projects, madamo sang imprastruktura nga ginapatindog kag makatenir ini sing malawig sa iya ginatindugan, makahatag sang trabaho kag makapapagsik sa ekonomiya kon istable kag barato ang suplay sang kuryente nga ginakonsumo.
Indi mabuhinan ang kagutok sang tawo sa syudad, indi sila maganyat nga magbakal sang balay sa mga banwa nga katapo sang MIGEDC kon mahal ang bili sang kuryente kag masami naga-brownout. Nagapalas-ay ini sa bumalakal, ginapaulian sang nakabakal na kag ang iban nga negosyo angot sa serbisyo kag produkto ang tuman man ka apektado.
Madamo sang home owners nga nagapuyo sa mga subdivision sa mga katupad nga banwa nga naila sa serbisyo sang MORE Power kag handom man nila nga sila ang maserbisyuhan apang ginadalukan sila sang higayon.
Kuntani, paagi sa MIGEDC, mapalab-ot man ang ila tingog. Kuntani, makabugtaw ang MIGEDC kag lantawon ang kahimtangan sang mga katapo nga banwa kon paano sila mabuligan, kon kinahanglan nga ang MIGEDC mismo ang magabitbit sang tingog kag kawsa sang nagahandom nga maserbisyuhan sang MORE Power.
Kabay pa nga magtipon sila, manindugan, kag pangapinan ang pumuluyo nga ila nasakpan. Kabay nga ila iduso nga magabiya sa kadena sang mga nagasuplay sang kuryente sa ila, hatagan sila sang kahilwayan nga makaangot sa mas istable kag mas mabato nga kuryente.
Kon matigayon ini, tanan nga katapo sang MIGEDC ang magatin-ad sing tuman ka dasig, magapagsik ang ekonomiya kag maga-ayuhan ang kabuhi sang tagsa nila ka pumuluyo.
Kabay pa nga magtingog na ang MIGEDC kag tindugan ang katuyuan kon ngaa ini ginpasad kag kon paano ini mangin instrumento sa pagtin-ad kag makapamati sa yamo sang mga konsumidor sang kuryente nga kinahanglan nila ang istable, barato kag maayo magserbisyo, kaangay sang MORE Power. (bertladera@gmail.com/PN)
