CONGRATULATIONS to Sigma Rho Cupid/Apollo chapters alumni and residents sa paghiwat nila sang 1st Grand Reunion sadtong March 18.
Ginpangunahan ini ni Atty Dennis Juanon, ang SR Cupid Chapter founder. Bunga ini siya sang SR UP-Dilliman nga nangin propesor sa University of Iloilo kon diin gintukod niya ang Cupid Chapter. Halin sa Cupid Chapter, nagtuluhaw na ang mga sub-chapters sini sa Visayas kag Mindanao.
Pila man gani halin sa sub-chapters ang nagtambong.
Katapo ini sila tanan sang Samahan nga mga Sigma Rho sa Pilipinas, Inc. nga ang mga myembro nagakilala sa SR UP-Dilliman bilang iloy-iloy nga chapter.
***
Nagsugod ang Assembly malapit sa Old Iloilo Capitol (1-2 PM), kon diin nag-alabot ang malapit sa isa ka 100.
Nag-roll off dayon ang Caravan sa palibut sang siyudad sang Iloilo nga naglawig sing halos duha ka oras pabalik sa Old Iloilo Capitol kon diin ginhiwat ang highlight sang kahiwatan.
May Merienda anay nga ginsaluhan ang mga brods kag sis. Nagsugod man dayon ang Registration (5 PM) sang mga nagtalambong kag pila ka bisita (upod ko si Mrs.).
Guest speaker si Iloilo Gov. Toto nga isa sa mga ginataha nga myembro sang SR UP-Dilliman. Naghatag siya sang mapuslanon nga mensahe sa mga brods kag sis.
Ginpatalupangod man niya ang mga priority projects sang probinsya. Una diri ang pagpauswag sang pagpanguma agud maka-producir sang dugang nga kalan-on, kag sang service sector nga makahatag trabaho.
Lakip man sa programa ang pagkilala sa entablado sing isa-isa sang mga nagtalambong nga mga pioneer brods kag sis agud bisan paano magkilalahay sila pagkatapos sang sobra 50 anyos nga pag-existir sang SR Cupid upod sa nagtuluhaw man nga mga sub-chapters sini.
Gintagaan man sing padungog ang pila ka mga brods kag sis sa ila talalupangdon nga mga amot sa padayon nga kadalag-an sang FraSorority.
Ang mga opisyales sang Cupid/Apollo chapters para sa tuig 2023-2024 amo ang masunod:
Chairman of the Board – Brod Atty. Gene Original; President – Brod Roger Lopez; Vice President – Brod Salvador Gumban; Secretary – Sis Freda Abada; Treasurer – Brod Fredo Dolorfino; Auditor – Brod Wilson Alacre; PRO – Brod Edgar Sonza; Business Manager – Sis Rosalie Rivera.
Board of Directors: Brod Jessie Ilaud, Brod Tyron Longno, Sis Mariam Guevara, Brod Agustin Huesca, Brod Henry Bano Sr., Brod Oleck Palma, Brod Nick Villaruel, Brod Oric de la Cruz.
Moderator sang programa amo sanday Sis Rosalie Rivera kag Brod Badong Gumban.
***
Sa pagtapos sang termino ni Presidente Duterte sadtong 2022, official figures sang gobyerno nagpakita nga mga 6,252 ang napatay sa drug war sang gobyerno.
Gin-justify sang kapulisan ang pagkapatay sang mga suspek sa rason nga nagbato sila sa otoridad kag nagpangapin lang sang ila kaugalingon ang kapulisan.
Kabilugan ang nalista nga figura sang human rights groups kag sang International Criminal Court Prosecutor Karim Khan.
Sa ila listahan yara ang 12,000 tubtub 30,000 deaths. Lakip diri ang mga biktima sang extrajudicial killings (EJK), nga kahimuan sang mga tawo nga wala sing legal authority sa paghulog sang sentensya nga kamatayan, nga madamo sini kahimuan sang mga riding-in-tandem.
Gina-kondenar ini sang aton Kristiyano nga katilingban sa ila panindugan sa “rule of law”. Suspetso sang madamo nga kahimuan ang madamo sini sang pila ka pulis sa sugo sang may “criminal mind” nga liderato. Posible independiente man ini sa pagpamatay sang mga sibilyan nga vigilantes. Kag basi man may koordinasyon pa sa kapulisan, tungod gani sige lang ang ila pagpamatay nga indi madakpan.
“Most dreaded” gid sang mga pumuluyo ang pagpamatay sang mga riding-in-tandem tungod wala sila bisan ideya man lang kon sin-o ining naka-maskara nga “motorcycles killers” kag tungod kay daw wala man mahimo bisan ang aton kapulisan.
Ang masakit pa kay bisan sa ining panahon ni PBBM sige gihapon ining ila pagpamatay nga indi madakpan kag mapasabat sang ila kasal-anan.
Naglala pa gani ang kriminalidad subong. May at least apat na gani ka mga na-elejer nga opisyales nga gintumba sang wala ginakahadlukan nga mga kriminal. Isa diri si Gov. Roel Degamo sang Negros Oriental. Nagpa-alerto gid ini sa kapulisan agud matagaan ining mga opisyales sing nagakaigu nga security.
***
Pila gid gid bala ang napatay sang sining mga “motorcycle killers”?
Sunu sa report ni anay Senador Richard Gordon, chairman, Senate Blue Ribbon Committee, sang panahon lang ni Duterte ang napatay sang riding-in-tandem amo ang masunod: 2016 – 4,336, 2017 – 3,977, 2018 – 3,748, 2019 – 3,842, January to May 2020 – 824, kag January 1 to February 2021 – 25.
Hamak mo ran kag halos wala sing kaso nga napasaka ang piskaliya sa kahadlok seguro sang witnesses mag-testigo!/PN
