GINKASUBO gid ni Mrs. ang nadangtan sang iya oportunidad nga ma-promote sa trabaho sa Iloilo City Hall.
Ina tungod samtang siya ang dapat ma-promote, siya pa ang nadis-ug tungod sang sala nga paghangop sa patakaran sang Civil Service.
Sa patakaran sang Civil Service sa idalom sang Merit and Ranking System ang next in rank, nga amo ang akon asawa, tani ang dapat na-promote.
Bag-o ina nga isyu, nag gwa anay ang kuno nalipatan siya ilakip sa organizational chart sang Office of the City Administrator (OCA) nga iya iloy nga ahensya. Ina tungod na-detail siya sang madugay sa Administrative Division sang Mayor’s Office.
In fact, nakita ko nga wala gid man sing ngalan si Mrs. sa organizational chart sang OCA. Sa matuod, si Mrs. yara sa plantilla sang OCA nga sang ulihi na-diskubrihan mismo ni City Administrator Hernando Galvez sang mag gwa na ang reklamo.
Sang maghilibalo na, gin-akuni Galvez ang kapaltahan, apang gintudlo niya ang Human Resource Office, nga ginapangunahan ni Mr. Leo Elevencione, nga amo ang may sala kay mayor nga obligasyon ina sang HR ang mag-evaluate kon sin-o gid ang dapat i-promote nga empleyado.
Ginsiling man ni Galvez nga wala iya sing nahibal-an si Mayor Joe III sa pagsikway sang HR sang promotion ni asawahon kay wala man kinahanglan i-pulitika ini.
“Wala rason nga hingabuton ni mayor si ‘Nang Jo’,” dugang gani ni Galvez nga gakilala sa akon nga paryente niya.
Gintumod ni Galvez ang mga suod nga relasyones sang pila ka Espinosa sa amon. Madamo sang mga Espinosa sa Guimaras ang tapik sa amon pamilya. Ang iban nga yara sa siyudad sang Iloilo nga suod man nagalakip sang tatlo ko ka frat brods sa Sigma Rho Fraternity kag mga kumara kag kumpare.
Isa pa, bilang civil service eligible indi puede maka-pangampanya si Mrs. sa kon sin-o man nga luyag niya nga kandidato kon mag-eleksyon.
Sa pagtudlo sa kay HR officer Elevencione, ginsiling ni Galvez nga sang mahibal-an niya ang matuod nga position ni Mrs. sa iya upisina, ginreklamo dayon niya ini sa HR. Ugaling nadaug siya sang panindugan sang HR, labi na gid sang ginpirmahan na ni Elevencione ang pag-attest sa assumption of office sang nasal-an nga i-promote sa lugar ni asawahon.
“Na blame ko gani ang HR (Human Resource). Gin-clear ko gid na sa ila ang rule pero interpretation nila lain…Nakibot lang gani ako nga (lain ang nabotohan sang HR nga i-promote)…” siling pa gani ni Galvez sa iya paathag sa iya text sa akon.
Ang “rule” nga ginatumod ni Galvez amo ang Civil Service Policy Guidelines on the Three-Salary Grade Limitation on Promotion No. 1600732 nga napetsahan Hulyo 7, 2016.
Gin-akuni Galvez nga bagay gid man nga na-promote si Mrs. “Next in rank siya kag nalab-ut na niya ang ceiling sang sueldo sa iya pwesto sa plantilla kag, tungod sina, dapat na siya ma-promote agud maka-qualify siya sa dugang nga sueldo sa dason nga salary step nga indi na niya matigayon.”
Nag-apologize si Galvez sa amon nga mag-asawa sa iya mismo upisina sadtong Lunes sang hapon.
Ginaproblema niya ugaling kon paano ibalik kay Mrs. ang iya nabagay nga promotion. Siling niya na-sumite na sa Civil Service ang mga promotion kag mabudlay na bawion.
“Puede kamo ugaling mag-file appeal sa Civil Service kay may panahon pa man sa pag-appeal. Kon may opening nga bag-o dira ta lang abe ipasulod si Nang Jo (si Mrs)?” siling niya.
Sa karon, indi pa namon mahibal-an nga mag-asawa ang himuon. Ma-appeal ukon hulaton ang grasya sang bag-o nga promotion nga, ugaling, indi namon mahibal-an pa kon san-o matupa.
May nag-suhestyon gani nga dapat mag-file gid kami sang kaso kontra sa HR tungod sa sining “violation” sang patakaran sa promotion sang Civil Service nga natabo kay asawahon. “Para madudla!” siling niya.
Meantime, gapasalamat kami kay City Administrator Galvez sa pag-aku sang kapaltahan sa na-unsyami nga promotion ni asawahon.
Gapasalamat man kami sa pagpasalig niya nga koreheran ang ining kapaltahan sa una nga kahigayunan.
Kon san-o ugaling, wala pa mahibal-an namon. (w_mateojr@yahoo.com/PN)
