DAW sa nagalabay lang ang mga tuig. Nakakatluan kag pito (37) ka tuig na ang Panay News. Kon sa tawo pa, hamtong na gid ang pahayagan. Seguro isa na ka ginhikanan.
Kon sa bagay, ginhikanan na gid man nga makabig ang Panay News sa pagbatiti sang kadamo na nga mga journalists. Madamo sila nga nakatrabaho ko sadto tubtub subong sa Iloilo media nga ginbatiti kag gingabayan samtang yara sila sa kunop sang pakpak sang isa ka agila.
Bag-uhan pa lang ako sadto sa Iloilo media sang una nga mga tinuig sang Panay News.
Kasubong sang kakilas sang mata sang agila, matanlas ang mga peryodista nila. Nakahibalo sang balita kag sila ang mga tipo sadto nanday Herbert Vego kag iban pa. Kasubong sang agila, mga matalum ang mga tuktok (beak) nila sa pagpamangkot para matul-id ang kamatuoran.
Ang pagka-sharp makita sa ila mga balita nga mabasa sa ila pahayagan. Ang mga balita ginpadalman, indi hapaw lang. Kon ano ang porma sang mga balita, dako ang nahimo sini sang mga editor nila – Vego, Lemuel Fernandez, Hazel Villa kag karon nanday Rex Maestrecampo kag Daryl Lasafin.
Pila sa mga reporters nila nga akon sadto kadungan kag ginhangad sang readers nagalakip sa kanday Ricky Abaleña III, Joy De Leon, Raj Padilla, Hazel Villa, Jezza Nepomoceno, May Rago, Montesa Griño-Caoyonan, Raymart Escopel, Freda Sorsano, Roma Gonzales, Merianne Grace Ereñeta, Jun Aguirre kag iban pa.
Tanan sila nagpamatuod nga dako ang bulig sa ila sang Panay News sa disiplina kag pagbaid sa ila bilang writers. Wala nagaisip sang kabudlayan kag kalawigon sa pagbantay para mahuman ang estorya samtang nagabakas sa paglab-ot sang deadline.
Suno kay Ricky Abaleña III, ang Panay News ang perfect take off para sa iya professional life. Wala na sang iban pa nga maisipan sya sa paghanda sa iya mission pagkatapos sang iya PN stint karon pa abi nga nagahanas sya sa mga lamharon nga maluyag mangin peryodista.
Si Jun Aguirre nagsiling nga ang iya PN experience bilang correspondent sa Aklan nagserbe springboard sa iya career kag karon nagasulat para sa national paper.
Kasubong man nga nangin sampaton nga correspondents sa Philippine Daily Inquirer sanday Hazel Villa, Raj Padilla kag Jezza Nepomoceno. Suno kay Jezza, ang tagsa ka assignment gikan sa iya Editor nga si Sir Rex isa ka hangkat kag magsulat to make a difference sa kabuhi sang mga bumalasa sini.
Ginakabig ni Joy De Leon nga hardcore training ground ang PN kag gin hatag niya sa Publisher nga si Daniel Fajardo (DF) ang iya pagpasalamat sa paggabay, subong man kay Lemuel T. Fernandez (LTF) nga iya sadto editor ang iya pagkasampaton bilang manunulat bangud sang ila paggabay. Kon may mamahug, ara sila sa pagsuporta.
Empleyado na karon sang Local Government Operations Office si Freda Sorsano apang kon iya madumduman makahilidlaw ang mga panahon nga nagalagas siya sang iya mga news source sa pagsulat sang balita kag ang pagsulat nakabulig sa pag-ayo sang iya kaugalingon.
Nakabulig naman sa iya professional life ang apat ka tuig nga ginhinuyang ni Raymart Escopel sa PN, nahanas ang iya pagsulat kag nagserbe yadto sa mas maayo pa gid nga oportunidad, labi na sa business writing kon sa diin siya isa man sa awarded business news writer.
Nurse si Roma Gonzales sang ginsulod nya ang hangkat sa pagsulat bangud childhood dream nya. Sa likod sang kalipay nga makita ang iya by line, ginhakos ni Roma ang obligasyon sang journalist kasubong sang pro. Nadumduman ko pa sadto ang mga una niya nga assignment bahin sa isahanon nga survivor sang naglugdang nga barko. Pasado las otcho na sa gab-i nga natapos ang presscon (nga amon ginhulat), nagpamat-ud kami nga magkaon antes magsulat. Naghagaray kami pauli para sa balay na namon sulaton ang balita apang siya nagpabilin pa sa internet café agud balayon ang iya estorya. Nahibaluan ko na lang sunod nga adlaw nga tungang gab-i na siya nakapauli sa ila balay.
Writer na karon sang Iloilo City government si Merianne Grace Ereñeta. Ang pahimhutsimpot sang balita (nose for news) natun-an niya sa Panay News sa bulig sang iya mga editors – Sir Rex kag Sir Daryl.
Sila ang pila lang ka buto (eggs/egglings) sang agila.
Ang agila indi ordinaryo nga pispis. Ginakabig ini nga mapag-on kag may kaugalingon nga panan-awon kag pamensaron
Hangkilan na nga mga manunulat ang nabatiti sini over the years. Naglupad na ang iban sa pagsagap sang ila kapalaran. Apang bisan sang kabug-at nga ginadala sang isa ka agila, padayon gihapon ang iya pag-ubay sa mga bag-ong buto bangud kinahanglan nga mapalambo ang lahi nga magalupad kag magabantay sang masiut nga kabuhi sa sulod sang kagulangan, sang katilingban.
Lupad pa, Agila. (runjirjamolo@gmail.com/PN)
