MASANAG na ang palaabuton sang syudad kag probinsya sang Iloilo bangud natigayon na ang groundbreaking kag capsule-laying ceremony sang Jalaur River Multi-Purpose Project Stage II sang Pebrero 27, 2019 nga ginhiwat sa banwa sang Calinog.
Patimaan nga opisyal na nga maga-umpisa ang pagpatuman sang ginahulat kag ginakinahanglan nga proyekto diri sa Iloilo.
Ginpangunahan sang National Irrigation Administration ang nasambit nga seremonya kag ginsiguro na sang kapulisan kag militar ang seguridad sa palibot bangud kahibalo ang tanan nga madamo sang mga grupo nga nagpamatok sadto kag ilabi pa nga ang lugar ang ginahukmungan man sang mga rebelde.
Mahimo nga magabag-o ang panan-awan sang mga nagasupak sa tion nga magdaludo na ang tubig gikan sa dam padulong sa mga talamnan, sa mga puluy-an kag sa mga nagakinahanglan sang suplay sang matinlo nga tubig.
Ginalauman man nga makabulig sa suplay sang kuryente ang makwa nga elektrisidad gikan sa nagatiyog nga tsubibo.
Madamo sang mabulig ang segurado kag tayuyon nga ilig sang tubig gikan sa dam para sa mga pumuluyo sang syudad kag probinsya sang Iloilo.
Apang antes pa man makita ang nagadaludo nga ilig sang tubig, una na nga nakaagom sang matag-adlaw nga kita ang mga trabahador nga nagapakigbahin sa konstruksyon sang dam nga mahuman sa sulod sang apat ka tuig.
Pila ayhan ka panimalay ang magaayuhan kon ang haligi sang ila puluy-an may sigurado nga kita sa tagsa ka magsweldo bangud nagatrabaho sa sini nga proyekto?
Pila ayhan ka ulumhan ang mahatagan sang sigurado kag tayuyon nga suplay sang tubig sa ila irigasyon kag magaayo ang ila patubas?
Pinsaron naton nga nagapaandam na ang PAGASA sang posible nga pagluntad naman sang El Niño phenomenon nga kon matabu magabangag naman ang duta sa sobra ka init sang panahon.
Una nga makabenepisyo sang lubos ang mga banwa nga yara sa palibot sang dam kag ang mga yara sa alagyan sang ilig sang tubig gikan sa dam nga ginalakipan sang Calinog, Lambunao, Badiangan, Janiuay, Cabatuan, Santa Barbara, Pavia, Alimodian, Leon, San Miguel, Oton, Tigbauan, Duenas, San Enrique, Anilao, Dingle, Barotac Nuevo, Dumangas, Mina, New Lucena, Pototan, Zarraga kag Leganes, Passi City, kag Iloilo City.
Tuman ka daku sang pondo nga ginpain sang gobyerno para diri apang indi kita magkanugon bangud nga tuman man ka daku ang magabalik nga benepisyo kag pila ka henerasyon ang mahatagan sini nga kaayuhan.
Masarangan naton nga bayaran ang pondo nga ginpahulam sang gobyerno sang South Korea nga 8.9 billion pesos paagi sa aton husto nga paggamit sang sini nga proyekto kag husto nga pagbayad sang mga buhis sang pumuluyo.
Lauman naton nga sa tion nga mag-ilig na ang tubig gikan sa dam, mangin kaangay ini sang manggad nga ginasalud sang tanan, kag ang tagsa sini ka mailigan ang magalambo, magatin-ad kag makaagom sang kauswagan.
Kahibalo kita nga ang tubig amo ang kabuhi, kon sa diin may tubig didto nagatuhaw ang kabuhi, ang sibilisasyon, kag ang pag-umwad.
Sa paghatag sang katumanan sang sining pinakadaku nga dam, kaangay man nga mahatagan sang katumanan ang aton damgo nga kauswagan. (bertladera@gmail.com/PN)
