NAGAPANGIBABAW ang kinaiya sang mga Ilonggo sa pagbulig sa iya isig-kapareho sa anuman nga panahon, ilabi na gid kon may kalamidad ukon trahedya. Nakita gid ang ini nga pinasahi nga kinaiya sang mga Ilonggo sa sini nga panahon sang pandemya.
Antes pa man nasiplatan sang mga camera kag nahumlad sa mata sang mga tumalan-aw sa bug-os nga pungsod kag kalibutan, mas nauna na ang mga Ilonggo sa paghimo sa sini nga lihok. Indi pa ini kilala sa tawag nga community pantry, madamo na sang mga Ilonggo ang nabuligan kag ginadul-ong pa sa ila tagsa ka mga ugsaran.
Nangin bantugon lang ang community pantry sang ginhatagan sang importansya kag bangud sa kadamo sang dapat nga buligan didto sa Metro Manila. Bangud sa ila kahimtangan, ang gamay nga lihok nga nakahatag sa ila sang benepisyo nangin kaangay sang balud nga nagsalya sa bisan diin nga bahin sang Metro Manila kag mismo sa Luzon kag nangin kabahin na sa matag-adlaw nga mga balita kag impormasyon.
Nagpukaw ini sa interes sang iban nga magpakigbahin sa mga nagapatigayon sang community pantry. Nagtulod man ini sa iban pa nga magpanguna sa lihok kag magganyat sa mga kaingod nga pagpahamtang sini sa ila komunidad.
Madamo ang nagbinuligay agud nga makapahamtang sa mga tapangko ukon lamesa sang mga pagkaon ukon goods nga ila mapuslan kag nagahatag man diri ang may mga sobra sa ila panimalay agud nga magamit man sang iban nga ginakulang.
Bangud sa sini nga mga lihok, ginduso ni 5th District Board Member Carol-V Espinosa-Diaz ang resolution nga nagasuporta kag naga-apresyar sa magkatuhay nga grupo sa ila community pantries sa probinsya sang Iloilo.
Gin-aprubahan unanimously sang tanan nga katapo sang 13th Iloilo SP nga nagtambong sa 89th Regular Session ang resolution nga may tigulo “A Resolution Expressing Support and Appreciation to the Different Organizers of Community
Pantries in the Province of Iloilo and Further Encouraging the Organizers of The Same or Similar Activities to Observe Proper Health Protocols.”
Suno sa iya nga ang community pantry magapasanyog sa volunteerism kag bayanihan sang mga Ilonggo ilabi na sa sini nga panahon sang pandemya kag ang mga naga-organisar sini ang dapat hilway sa anuman nga harassment, abusar, ukon red-tagging kag dapat magbaton sang suporta, pag-apresyar kag pagpasalamat bangud sa ila dalayawon nga lihok.
Ginpangabay man sini nga ang mga organizer nga ipasiguro nga tumanon ang minimum health protocols kag mangita sang mas luwas kag epektibo nga paagi agud nga makapasakop ukon mabenepisyuhan ang mga senior citizen kaangay sa pagdul-ong sa ila sang goods sa ila mga puluy-an.
Pagahatagan sang kopya sang resolution ang mga organizer sang community pantry kag ang mga nagaplano ang ma-ingganyo man nga magtukod sini agud nga makabulig sa mga pumuluyo.
Buylugan na lang sang mga LGU ang mga nagatukod sang community pantry paagi sa pagpasar man sang resolution, buligan sila kon wala sang napasad nga kaangay sini ang mga LGU kag mangin katimbang na lang sa sini nga lihok.
Ginadayaw sang bise gobernador ang ginapakita nga pagbuyluganay sang mga Ilonggo sa gin-organisar nga mga community pantry sa bug-os nga probinsya sang Iloilo.
Ginpahayag ni Vice Gov. Christine “Tingting” Garin nga ila ginpasar unanimously ang resolution nga nagaganyat kag nagasuporta sa gina-organisar nga community pantry sa probinsya.
Ginsiling sini nga ang community pantry isa ka boluntaryo nga pag-amot sang goods ukon items sang mga indibidwal kag ang mga pigado nga pumuluyo nga wala sang inugbakal sa sina nga adlaw ang makapadulong diri agud nga mahatagan.
Gindugang sini nga may isyu sang red-tagging sa iban nga lugar bangud sa sini nga lihok apang kanami diri sa Iloilo bangud nagabuligay ang tanan nga yara sa isa ka komunidad.
Ginaganyat sini ang iban pa nga mag-organisar man sang community pantry kag ginasuportahan gid sang mga katapo sang 13th Iloilo SP ang ini nga hilikuton sa mga komunidad bangud kanami lantawon nga ang pumuluyo nagabinuligay para sa ila isig-katawo.
Nangin sagunson na ang lihok tuhoy diri, nagabuyluganay ang pribado nga sektor kag mga talatapan sang gobyerno agud nga mapatigayon ini.
Mismo ang kapulisan sa ila tagsa ka presinto sa syudad ukon police station sa kabanwahanan sa bug-os nga probinsya sang Iloilo ang may ginapatigayon man nga community pantry. Pamaagi man ini nga mapalapit sang kapulisan ang ila serbisyo sa mga pumuluyo.
Ang community pantry wala lang nagakahulugan nga maalwan ang nagahatag ukon kulabos ang nagaambot sini, kundi isa ini ka pagpakita sang kinaiya sang mga Ilonggo nga indi makatulok sa kahimtangan sang iya kasilingan.
Duna sa aton ang magbalikid kag magtan-ay sang bulig. Duna sa aton ang magkabalaka kag magpangita sang paagi kon paano makabulig. Ini nga kinaiya ang nagatungtong sa mga Ilonggo sa pinakataas nga pagdayaw kag ginahangad gid sang iban nga mga Pilipino.
Kabay nga magapadayon ini kag kabay nga tubtub may nagakinahanglan magapabilin nga bukas ang aton dulunggan sa pagpamati sa nagahibi, bukas ang aton tagipusoon sa pagbatyag sa ginagutom, kag bukas ang aton konsensya sa pag-ulikid sa ila.
Kon masami nga bukas ang aton dulunggan, tagipusoon kag konsensya, wala sang Ilonggo nga mabilin sa tabtaban, wala sang Ilonggo nga indi mabuligan. (bertladera@gmail.com/PN)
