SAGUNSON naman nga operasyon sang kapulisan batok sa ilegal nga druga ang aton mabatian ukon mabasahan.
Nagapatimaan nga liwat nga nagsagsag ang baligyaanay kag madamo naman ang nagakabuyo sa pag-usar sini. Nagpanumbalik na ang kinaandan nga pagsinarayo sang mga tawo kag halos nalipat na sa ginhatag nga leksyon kag eksperyensya sang naglabay nga pandemya.
Naglipas na ang panahon sang mga personalidad sadto nga ang mga ngalan nagalagting sa aton palamatin-an. Nagbulos naman ang bag-o nga mga personalidad nga kon kaisa ginakakibot naton kon ngaa naimbolbar sila ukon nalakip sila sa mga nagkaladakpan.
Mas masupog na ang nagaduso sang ilegal nga druga sa karon nga panahon. May mga magkahagugma nga ang ila pangabuhian amo ang pagbaligya sini. May estudyante nga wala nakasaka sa entablado para sa gradwasyon bangud naposasan sang nadakpan bangud sa druga. May punong barangay nga nadakpan mismo sa sulod sang barangay hall bangud sa pagduso sang druga.
Masami na nga mabatian ang pagkatikma sa mga negosyante, sa mga trabahante, sa mga opisyales sang barangay, mga estudyante, kag halos nasulod na sang ilegal nga druga ang tanan nga sektor sang sosyudad.
May mga personalidad nga naga-aku nga may direkta sila nga koneksyon sa Bilibid kag didto sila nagakwa sang ila suplay. Isa ka halimbawa man sini sadto ang nadakpan nga lola nga nagabiyahe gikan sa Manila padulong diri, sakay sa roro, bitbit ang ilegal nga druga nga nasulod sa karton sang gatas.
Kapigaduhon ang nagtulod, suno sa ila, agud nga magrisgo sila sa pagbaligya sang ilegal nga druga.
Indi malipod nga ang kapigaduhon amo ang magaduso sa iban nga magduso sang ilegal nga druga. Maathag man nga ang iban nagapahapos na lamang tungod nagatubod lang ang kwarta sa sini nga aktibidades. Mahapos, mamag-an kag dagaya ang pagsulod sang kwarta sa ila bangud sa ilegal nga druga.
Ginasakyan nila ang serbisyo sang mga nagapangabuhi gamit ang motorsiklo ukon mga rider. Diri sila nagapadul-ong sang ilegal nga druga sa ila mga kliyente, sa gamay nga kantidad. Kon tuman na ka daku, sila na mismo ang nagadul-ong sini.
Sadtong Hulyo 17, 2023, balor 360,400 pesos nga ilegal nga druga ang nerekober sa persona nga makapila na ka beses nga nadakpan nga nagaduso sini. Ang transaksyon ginahimo sa sulod sang drive-in hotel sa distrito sang La Paz.
Ginsundan ini sang pagkatikma sang isa pa ka persona sa distrito sang Mandurriao sadtong Hulyo 18, 2023 sang kaagahon nga nagabalor sang 442,000 pesos ang ilegal nga druga.
Kag pagkahapon sang Hulyo 18, 2023, balor 374,000 pesos naman nga ilegal nga druga ang narekober sa City Proper sa duha ka nadakpan nga persona samtang ang isa sa ila ang nakapalagyo nga naglusot sa likod nga bahin sang puluy-an.
Pila lamang ini sa mga ginsambit naton nga ehemplo kon ano ka dalagku sang kantidad ang imbolbado. Wala na naton masambit ang iban pa nga mga operasyon sang Philippine National Police kag sang Philippine Drug Enforcement Agency. Posible nga samtang ginasulat ko ini may mga nagkaladakpan na naman nga mga personalidad.
Kon balikan naton ang masami nga rason nga amo ang kapigaduhon. Masiling naton nga tuman ka balingag kag libagon ang ini nga rason. Madamo man sang pigado nga nagahimakas nga makakita sang kwarta agud makabakal sang pagkaon.
Kon magtuon kita nga magkomporme sa kon ano lang ang aton masarangan kag indi na maglapaw sa kurit sang risgo kag katalagman, mangin matawhay kag wala sang kulba ang aton pagpangabuhi. Apang, kon nagabatyag kita sang kahikaw kag luyag man naton mangin kaangay sa iban nga may ikasarang, posible nga maganyat kita ukon magpasulay sa ganyat sang dagaya nga kwarta gikan sa ilegal nga druga.
Sa akon paglantaw, bisyo ang nagatulod sa kadamuan nga magduso sang ilegal nga druga agud malibre ang ila paggamit sini. Bangud sa bugal sang iban nga makapadayaw nga may ikasarang, makabakal sang luyag nila, maka-night out upod sa barkada, kag makasagamsam sang pangabuhi nga hamungaya, rason nga naila sila nga magduso sini. Matuod nga may kulba sa una apang nagasupog sa padayon nga pagduso tubtob nga sila ang nasiod na sang mga otoridad.
Tuhay na ang istratehiya nga ginahimo sang mga durugista. Nagasakay sila sa kasulhay sang teknolohiya kag anuman nga makapahapos sa ila transaksyon. Kinahanglan sang aton otoridad nga makaabanse sa mga tikang batok sa ila, dapat nga maunahan sila antes makasabwag sang halit sa komunidad.
Dapat nga tultulon ang mayor nga gripo kon sa diin nagahalin ang sagawak nga tubod sang ilegal nga druga. Dapat sa dira pa lang matapna na, mapunggan na agud indi na malapta pa kag didto pa lang saparon nga dakpon.
Likawan naton nga magbalik kita sa una nga sitwasyon nga madata ang krimen, makatalagam ang gab-i, kag makatulublag nga sitwasyon sang palibot.
Indi dapat mangin maila sa aton ang kalinong kag katawhay. Pululihan naton nga matapna ang pagduging sang ilegal nga druga. (bertladera@gmail.com/PN)
