GINMANTSAHAN, ginpasipalahan, ginpatu-patuan apang sa gihapon siya ang napilian.
Kaangay ini sang nadangatan ni Cong. Jerry Treñas nga napilian bilang presidente sang Iloilo City Council sang Partido Demokratikong Pilipino ukon PDP.
Sa pihak sang mga nagwa nga mga larawan nga nagaangot sa iya sa ginapasuni mga persona nga may kaantanan ukon imbolbado sa ilegal nga druga, sa gihapon iya nabugsay sang masulhay ang iya ngalan kag nakadungka sa posisyon nga ginadamgo sang tanan.
May nagasiling nga tuman ka lipot sang mga padugi ni Treñas kon ngaa iya nalutsan ang mga nagatinguha man nga makatapik kag makauyat sang posisyon sa PDP-Laban.
May nagasiling pa gid nga tuhay ang mga istratehiya nga ginahimo sa karon ni Treñas bangud nga mas magahod na siya kag mas ginapahibalo niya ang iya mga plano sa iya mga kontra sa pulitika.
Naandan na nga tuman ka sikreto, wala nagasugid, kag sorpresa ang ginahimo nga istratehiya ni Treñas sa iya nga pamulitika sa syudad sang Iloilo. Indi niya luyag nga mahibaluan sang iya mga kasumpong sa pulitika ang iya mangin masunod nga tikang kag halos indi magpadakop sa iya mga sabat apisar nga ginakorner na siya sang mga pamangkot.
Posible nga nakatuon na si Treñas sa mga padugi nga angay himuon, nakabatyag na siya nga ang mga tawo nagaduda na sa iya tagsa ka mga pahayag, kag halos indi na magpati sa mga iya ginahimo nga tikang bangud nagakahangawa nga basi sila ang ginapalapaw lamang. Nabatyagan man ni Treñas nga dapat may bag-o nga padugi agud nga makumbinser ang mga tawo sa iya nga katuyuan.
Posible man nga gintayming sini ang pagpagwa sang appointment niya sa PDP antes ang adlaw sang kampanya sa Barangay kag SK elections agud nga makumbinser ang iban nga mga incumbent kag mga mangin bag-o nga opisyales sang barangay nga siya ang gintugyanan sang partido sang administrasyon nga magtipon sa luyag mag-upod sa PDP kag sa pagpalapnag sang ila mga programa kag adbokasiya.
Ginakabig sini nga natural kag kinaandan na nga may yara sang kritiko kag sa masami siya ang pakamalauton. Naanad na siya sa paghaboy sa iya sang mga isyu kag sugilanon apang para sa iya ang importante nga nagapadayon lang siya sa iya mga hilikuton kag ginatugyanan siya sang administrasyon.
Nagapabilin lang sa higad nga nagalantaw ang mga kritiko kag ulayhon ang katingala nga makita sa ila mga nawong, nagadalom ang pinsar sa pagtungkad sa mga sabat kag nagakaudungan kon ngaa nagakatabu ang ini nga mga bagay.
Tubtub subong wala pa sang masanag nga kandidato si Treñas nga magabulos sa iya sa kongreso.
Ayhan ginareserba niya ini sa iya nga bilas? Ayhan matuod man ang nagakatabu nga tima-tima sa tunga nila, apang ngaa nga wala sang klaso nga direkta nga sinungayay nga nagakatabu sa tunga nila?
Ang nagakatabu amo ang pag-ayag agud mahibaluan kon kanday sin-o ang yara sa iya kag kon kanday sin-o man ang yara sa iya bilas.
Kon tingbon nila ang ila pwersa, ang oposisyon ayhan amo ang mapanas?
Sa tunga sang kritisimo, si Congressman Jerry Treñas ang padayon nga nagahimakas. (bertladera@gmail.com/PN)
