ILISIPON na lang ang adlaw kag oras sa pag-abot sang highlight sang 2020 Dinagyang Festival sa syudad sang Iloilo.
Matuod nga indi magpalareho ang ginatawag nga ‘intensity’ sang tagsa ka nagapalakat sini. Kahibalo kita nga ang kadamuan sa ila, namag-uhan sa tuman ka daku nga hilikuton nga ila ginakasakuan nga mahatagan sang katumanan. May pila sa ila nga lunsay lang mandar ang nahibaluan sa kon ano ang ila napinsaran nga maayo para sa pag-abante sang katuyuan sang Dinagyang.
May pila sa ila nga masaku ang pagparik-parik bangud indi luyag mapaslawan, mahikayan, ukon mabutang sa alang-alang ang preparasyon sang kahiwatan.
Nakahibalo kita nga nangin ‘observer’ man ang mga katapo sang Iloilo Festivals Foundation Inc. sa nangin sahi sang pamalakat sadto sang Iloilo Dinagyang Foundation Inc. kag ang kada isa sa mga katapo ang may ‘circle of influence’ ukon ‘network of friends’ nga ila mapakig-angutan agud nga makabulig sa ila agud mapasanyog kag mangin madinalag-on ang pagpatigayon sang selebrasyon.
Kaangay sa mga katapo sang IFFI, ang mga tawo nagalantaw man sa ila mga akto, ilabi na kon paano nila ipatigayon ang kadalag-an sang selebrasyon. Nagadepende sa ila hulag ang pag-apresyar sang mga tawo sa ila ‘intensity’ sa pagduso kag paghatag sang katumanan sa ila hilikuton.
Matuod nga tuman ka daku ang ginalauman sang mga pumuluyo sa IFFI, ilabi na nga naghalad sila sang bag-o nga konsepto nga ‘360 degrees’ nga may daku nga kinaiya kag kinatuhay sa naandan na nga pagselebrar sang Dinagyang.
Nagpasalig sila nga mangin mas makahulugan, mas maduagon, mas maapresyar sang tumalan-aw ang ila ginahandom nga masaksihan nga performance sang tagsa ka tribu nga nagapasakop.
May ginpahibalo na ang IFFI nga mga pagbag-o, may ginpangligwat, may ginpangbuhinan, may ginpanghipid kag madamo pa sila nga ginpanghimo nga tuhay sa kinaandan, ilabi na sa iban nga mga komitiba sa idalom sang IFFI.
Luyag nila nga magpakita sang ila ikasangkol sa pagpatigayon sang hilikuton nga mangin madinalag-on.
Madamo man sang naga-obserbar sa kon ano ang mga resulta sang ila paghimakas, ilabi na nga may yara sang kumparasyon nga ginahimo ang mga naga-obserbar sa kon ano ang karon kag kon ano ang sang nagliligad.
Ginakabig man ini nga ‘baptism of fire’ sang mga katapo sang IFFI. Nagahimakas sila nga masolbar ang hinali nga pagtuhaw sang mga wala ginalauman nga problema. Padayon ang ila pagpakig-angot kag pagkonsulta sa kon ano ang angay nga buhaton. Nagapangayo man sila, posible, sang mga giya gikan sa mga may ideya.
Apang matalupangdan man nga may mga katapo sang IFFI nga mas dominante ang ila paggamit sang poder agud nga makaabanse sa ila kasumpong sa negosyo. Kahibalo sila maggamit sang tanan nila nga bentaha, apang nalangsahan ang iban nga nakahangop sa ila malipot nga padugi.
Sa pihak sini tanan, indi kita anay magtakus sa IFFI sa kon ano ang sitwasyon sa karon. Hatagan naton sila sang higayon nga mapakita ang ila ikasangkol sa pihak sang mga kakulangan. Tugutan naton nga maplastar nila sang lubos ang ila tinutuyo kag handom suno sa ila ginbungat sa umpisa pa lamang.
Nagapanglubaybay pa ang IFFI sa ila tagsa ka tikang. May mabutungan kag makapyutan. May yara sang makamrasan sa iya paghugakom. Apang bangud nga bag-uhanon, aton na lang anay nga hangpon sa karon. (bertladera@gmail.com/PN)
