NASOBRAHAN sa pagpangapin ang pila ka mga barangay sa syudad kag probinsya sang Iloilo. Natapakan na nila ang kinamatarong sang ila isig-kapareho.
Wala sang may nagapugong sa kada isa agud nga mapangapinan ang kaugalingon batok sa makatalagam nga COVID-19. Kinahanglan sang kada isa ang magpangita sang paagi agud nga indi malatnan sang virus.
Madamo sang pamaagi agud nga indi malatnan sang virus, isa na dira ang social distancing ukon physical distancing. Lakip man ang pagsunod sa mga panugyan sang Department of Health tuhoy sa husto kag masami nga paghugas sang kamot gamit ang habon kag tubig, ang masami nga paghugas sang alcohol, kag ang pagpaiway sa pagtandog sang ilong, baba kag mata.
Apang may mga barangay nga nagapatuman sang “no mask, no entry” kag “no mask, no exit” nga lunsay wala sang salandigan sa kasuguan, patarasak nga patakaran kag wala sang lohikal nga balasehan.
Makabig ini nga diskriminasyon kag wala nagasinantu sa ginapatuman sang gobyerno ang ini nga lihok ukon akto sang mga tinugyanan sa barangay.
Nagasupak man sa kinamatarong sang isa ka tawo kon indi siya pagtugutan nga makapadulong sa persona nga nagapuyo sa sina nga barangay bangud nga indi siya tumandok dira ukon indi siya residente sang sina nga lugar, ilabi na kon may importante siya nga tuyo.
Ang ginadumilian lamang amo ang paglagaw nga wala sang katuyuan, wala sang intensyon, ukon indi mapuslanon ang lihok.
Ginatuman naton ang ‘social distancing’ apang wala sang pag-ipit sa kinamatarong nga makahulag ang tawo. Makita ini sa mga patakaran nga ginapatuman sang gobyerno nga ang tanan hilway sa gihapon sa ila hulag, bisan nga limitado lamang agud nga mapatuman ang ‘social distancing’ kag agud nga wala sang paglaton sang virus nga matabu.
Wala na nagahilituhog ang hulag sang barangay sa husto nga patakaran nga ginapatuman sang gobyerno. Nagamatu-mato sila sa pagpatuman sang ila luyag bisan pa nga wala sang mabakod nga salandigan kag nagalapak na sa kinamatarong sang ila kaangay nga tawo.
Naobserbahan man ang paglambat sang lamesa, lubid, kag barikada sa mga alagyan pasulod sa barangay. Maathag nga ang kada isa nagapasad sang ila kaugalingon nga pagsulundan nga nagasupak sa kasuguan.
Bangud sa sini nga mga lihok, nakalab-ot sa nasyunal nga pamunuan kag ginmandu sa lokal nga pamunuan nga manduan man ang ila nasakupan nga mga barangay nga kakason ang tanan nga pagpanglaksam ukon sablag ukon ilegal nga ginpangplastar sa karsada, dalan, taytay kag tanan nga gina-agyan sang publiko.
Nasobrahan sa pagkabalaka ang kabarangayan, nalipat sila sa kon ano ang angay nga himuon nga wala nagasupak sa kasuguan kag wala nagalaoas sa kinamatarong sang tawo.
Bangud sa memorandum nga ginpapanaog nga dapat kakason ang sablag sa alagyan, kaangay sa nag-igrab nga kilat sa kalangitan ang kadasig sang ila pagpanghimos. Nahadlok man sila nga kasuhan sang gobyerno nga ila ginapangalagaran.
Ang papel sang barangay amo ang pag-monitor kon may mga person under monitoring ukon patient under investigation sa ila nasakupan kag kon may mga bag-o nag-abot gikan sa iban nga lugar nga may kaso sang COVID-19, ila ini nga aktuhan kag ireport sa natungdan nga ahensya sang gobyerno.
Ang mga barangay tanod kag mga ginaswelduhan sang cash-for-work sa barangay agud nga magbulig sa pagbantay, sa adlaw agud nga wala sang may maglagaw kag indi makapagusto ang wala sang quarantine pass, kag sa gab-i agud nga ipatuman sang hugot ang curfew. Ini lang ang ila obligasyon. Wala nasaad sa ila katungdanan nga magtapak sa kinamtarong sang iban.
Ginkalis na sang gobyerno ang nagapasubir nga lihok sa kada barangay. (bertladera@gmail.com/PN)
