NABUTANG sa kontrobersiya ang pamunuan sang Bureau of Fire Protection 6 bangud man sa katapo sini nga 26-anyos nga babaye nga may rangko nga Fire Inspector nga ginapasuni naglapas sa protocol sa proseso sang pag-quarantine sa iya.
Kaangay ini sang kalayo nga nagmakot, hinali nga nag-ibwal sang natukiban ang iya nangin akto, kag karon naga-ut-ut sa tagsa ka haligi sang ila talatapan.
Mabudlay mag-away sa kalayo nga ikaw mismo ang nagtuga, nga ikaw mismo ang kawsa, nga sa imo lawas mismo nagamakot tuga sang pagpatumbaya.
Ginakabig nga locally stranded individual ukon LSI ang nasambit nga persona nga nag-abot gikan sa Cebu sadtong Hunyo 5.
Gilayon siya nga nag-tenir sa hotel kag sadtong Hunyo 6 siya ang ginpaidalom sa rapid test kag RT-PCR test. Ginrason sini nga ini ang panugyan sang DOH nga sa hotel siya mapa-quarantine bisan pa nga naganginwala ang DOH-6 nga wala nagpanugyan sa iya, naglawig sang tatlo ka adlaw tubtub nga sang Hunyo 9 siya ang ginsugat sang iya kaupod sa trabaho kag didto gindala sa ila opisina sa BFP-6 nga wala nagpahibalo sa City Health Office nga amo ang naga-monitor sa iya.
Ginpangita siya sang City Health Office, makaduha ka beses nga nagpanginwala ang ila ila regional office nga nagasiling nga wala sila kahibalo kon sa diin siya nahamtang matapos nga sadtong Hunyo 14 naggwa ang resulta nga COVID-19 positive siya.
Nag-abot sa isla sang Boracay ang BFP personnel sadtong Hunyo 12 sang hapon nga ginkabig na nga ika-144 nga pasyente suno sa bulletin sang DOH-6.
Kabahin siya sa 28 ka mga personnel sang BFP nga nagpadulong sa Boracay kag pagkatapos sang ginapasuni nga despedida party, mansig pauli sa ila tagsa ka lugar ang mga nagtambong.
Ginmandu ni Mayor Jerry Treñas ang pag-lockdown sa BFP regional office lakip na ang Iloilo City Fire Station kag ginpaidalom sa rapid test kag RT-PCR test ang tanan nga personnel.
Nagabalingaso sa kaakig ang alkalde kag ginahanda na ang kaso nga ipasaka didto sa national inter-agency task force batok sa sini nga mga persona.
Gin-lockdown man ang BFP-Boracay Sub-Office kag BFP-Malay bangud man sa kaangay nga sitwasyon kag magapasaka man sang reklamo ang alkalde sang Malay, Aklan batok sa ila.
Apektado ang isla sang Boracay bangud sa natabu, gin-contact trace na ang 35 ka mga tawo nga ginalakipan sang mga LGU frontliner, mga pasahero, kag mga boatmen sa apat ka bangka.
Natagam man ang mga nagatuyo nga magpadulong sa Boracay nga nagresulta sa pag-iwat sang tawo nga nagapadulong didto bangud man sa kahangawa nga sila ang malatnan sang virus.
Tuman ka daku nga halit ang natuga sang indi pagsunod sa protocol sang nasambit nga persona. Kuntani ginhulat niya nga maggwa ang resulta, kag kon negatibo na, amo lang ang iya paghigya-higya.
Maathag nga wala sang pasunaid ang ini nga persona bangud mas ginpasulabi niya ang iya kaugalingon nga kalipayan labaw sa iya katungdanan sa publiko nga mapangapinan batok sa sini nga pandemya.
Nagakaangay nga manabat sa ila kapalthan ang mga natungdan, gikan sa sini nga babaye tubtub sa mga naghimbon kag nagpasugot nga makaupod siya didto sa isla sang Boracay.
Gintutdan nila ang handom sang isla sang Boracay nga makabangon. Nagadabdab sa kalayo sang kahangawa ang syudad sang Iloilo nga nagahimkas nga makabangon ang ekonomiya. Madamo sang ordinaryo nga trabahador nga nagahimakas kag nagapasalamat nga nakabalik na sa ila palamugnan ang liwat naman nga mawad-an sang kita bangud sa huol nga gintuga sang sini nga babaye.
Kahibalo sila kon paano nagahalong ang tanan, nagasakripisyo ang mga Ilonggo agud nga indi maglala ang sitwasyon, agud nga mapunggan ang mas malapnagon nga paglaton sang virus, apang yari siya nga wala sang patugsiling sa iban, wala sang kabalaka sa mga nagasakripisyo.
Dapat nga aktuhan sang national office sang Bureau of Fire Protection kag sang Department of Interior and Local Government ang ini nga paglapas sa protocol.
Dapat nga mapenahan agud nga indi na pagpamarisan ukon ilugon sang iban.
Mabudlay mapalong ang kalayo nga ginasabak mismo sang mga bombero. Nahapdian na sila sa naagom nga pasu, ginaagwanta nila. Balos ini sang ila sinadya sa tunga sang pandemya.
Kinahanglan sang mga bombero ang abilidad, konsensya kag kabalaka agud nga mapalong ang ila ginasabak nga kalayo. (bertladera@gmail.com/PN)
