MAY DULUNGGAN pa gid man si City Councilor Romel Duron nga makabati sa hakroy sang mga tricycle drivers nga nagaagunto sa ila palangitan-an kag nagasulay sa mga risgo sa dalan.
Posible nakalab-ot man sa iya ang aton pagpahibalo paagi sa sini nga column nga nabalhag diri sa Panay News sadtong Abril 19, 2021 nga may tigulo “Traysikol”. Diri naton ginplastar ang mga punto tuhoy sa angay nga himuon ni Duron agud nga mabuligan ang mga tricycle driver sa ila sitwasyon.
Yari ang kabahin sang aton ginpabutyag sadto:
“Imbis nga magpamusi-musi, dapat ginpakigbato ang kahimtangan sang mga apektado. Indi kita magsupak, wala kita nagasupak sa plano apang samtang wala pa sing klaro, dapat padayon anay ang ila pagbiyahe.
“Mabatas man ninyo nga pagutman ang tawo samtang padayon ang inyo nga pagplano?
“Dapat hangpon ni Duron ang rason kon ngaa yara siya sa konseho. Dapat tindugan niya ang mangin tingog sang mga apektado.
“Pwede man hingyuon sa DOTr kag DILG nga athagon ang moratorium kag tugutan anay ang mga may prangkisa na nga makabiyahe samtang wala pa sang LPTRP nga naaprubahan.
“Nabudlayan ang pila ka katapo sang asosasyon nga makapa-renew bangud sa kapigaduhon dala sang pandemya. Kon may kabalaka si Duron, pwede man niya pasaran sang ordinansa nga hingyuon ang discounted fee para sa prangkisa agud indi mabug-at para sa ila ang pag-renew kag ibalik lang sa normal nga balayran kon makalampuwas na kita sa pandemya.
“Pwede man niya hingyuon sa DOTr kag DILG nga ipaiway anay ang moratorium bangud may pandemya.
“Bangud sa moratorium, ang syudad sang Iloilo indi maka-isyu sang bag-o nga mga prangkisa kag bisan pa sini, ang mga traysikol padayon nga nagabiyahe kag padayon nga nagadamo. Bangud man nga indi sila makakwa sang prangkisa, napilitan sila nga magbiyahe nga ilegal nga kalabanan nagabiyahe kon gab-i agud makalikaw sa dakpanay.”
Gilayon nga naghulag si Duron. Sadtong Abril 20, nag-deliver siya sang privilege speech agud nga ipabutyag ang sitwasyon sa sektor sang transportasyon sa syudad sang Iloilo, ilabi na sa ginapangatubang nga problema kag risgo sang mga nagabiyahe sang traysikol kag sang mga tag-iya ukon operator nga wala naka-renew sang ila prangkisa.
Sadtong Abril 21, nagpatawag sang public hearing si Duron bilang chairman sang Committee on Transportation sa City Council agud nga matalakay ang tuhoy sa pag-isyu sang prangkisa sa mga nagataris nga traysikol sa palibot sang syudad sang Iloilo.
Agud nga wala sang huol sa pagbiyahe sang mga traysikol, ginkonsiderar sini nga hatagan sang provisional authority ang mga traysikol.
Ginpangabay man ang Public Safety and Traffic Management Office ukon PSTMO nga halugan anay ang ila operasyon kag ipaiway anay ang pagpangdakop sa mga traysikol.
Ginahingagaw man sang City Planning and Development Office nga makasumiter sang Local Public Transport Route Plan sa sulod sang duha ka semana bangud ini ang nagadetalye sa route network, sahi kag kadamuon sang sahi sang mga unit nga nagalabay sa ruta ukon nagatan-ay sang serbisyo, lakip na diri ang mga traysikol.
Sa pinakaulihi nga update, gin-aprubahan sang konseha paagi sa rekomendasyon sang komitiba ni Duron nga aprubahan ang renewal sang prangkisa sang kapin sa 69 ka mga traysikol nga nagabiyahe sa magkatuhay nga ruta sa syudad sang Iloilo.
Ginbuylugan sang tanan nga katapo sang City Council ang hingyo sini nga isyuhan sang provisional auhority ang mga tricycle operator nga may expired permits.
Nagpahayag man sang suporta sa sini nga inisyatibo ni Duron ang DILG-Iloilo City kag ang LTFRB-6.
Kinahanglan lang ang ni Duron ang paghulag santu sa husto nga panimuot kag pagbatyag sa kahimtangan sang mga nagabiyahe sang traysikol.
Ang polisiya tuhoy sa moratorium kag iban pa nga ginapatuman sang national agencies ang may maayo nga tuyo sadto para sa karon nga sitwasyon. Apang ang tanan nagbag-o bangud sa pandemya kag dapat ikonsiderar ang ini nga kahimtangan.
Kon wala sang pandemya, kita mismo ang manawagan sa mga owner kag operator sang traysikol nga mag-obligar sang ila katungdanan sa kasuguan. Apang, indi kita makapursige sa ila bangud sa pandemya. Kinahanglan naton ang maghangop kag indi magpabug-at pa sa ila ginaabaga nga sitwasyon.
Nagpangabay lang kita kay Duron nga hangpon ang kahimtangan sang sini nga sektor kag bilang tingog nila sa konseho, angay nga magpanguna ini sa pagpabutyag agud nga mabatian sang natungdan nga ahensya sang gobyerno kag agud maaktuhan ang ila ginapangabay.
Nagapati kita nga may solusyon si Duron bangud abogado siya kag nakatrabaho sa LTRFB. Mas masangkad ang iya ihibalo sa sini nga bagay.
Kabay nga magapadayon ang paghulag ni Duron agud nga masolbar sing lubos ang ini nga palaligban sa paghuman sang LPTRP. Kon kinahanglan nga tukbulon ni Duron, dapat niya nga tukbulon ang City Planning and Development Officeagud nga matapos na ang LPTRP.
Tandaan lang sang naga-obra sang LPTRP nga samtang nagadugay ang ila pagplano, mas nagadamo ang magutman nga nagapangita sang sentimos sa dalan.
Ang paghulag ni Duron patimaan lang nga nagapamati siya sa panugyan, nagabatyag siya sa sitwasyon kag nagatindog siya sa iya katungdanan bilang tingog sang mga yara sa sektor sang transportasyon. (bertladera@gmail.com/PN)
