Mahakalam-ot pamatian nga ang duha ka matag-as nga opisyal sang syudad ang nagahabuyanay sang lunang. Mansig sila pambulit, mansig sila pamahid.
Pagkatapos sang ila pag-file sang tagsa nila ka certificate of candidacy, lunsay nangin mabaris na ang ila nga paghabuyanay sang mga tinaga. Nagapakita sila sang ila kasupog sa mga pumuluyo, mansig sila pakalain sa isa kag isa, samtang ila nga ginabatak ang ila kaugalingon.
Nagbinantayanay sila sa kon sin-o ang may madamo nga maga-upod sa ila pagpadulong sa opisina sang Commission on Elections, kon ang ginahakot mga sumulunod ang ginbayaran kag kon pila ang bayad sa ila agud nga mag-upod.
May mga akusasyon nga madugay na naton nabatian, gikan pa sa pila ka nagliligad na nga eleksyon nga ang mga naga-upod ginahatan sang plete ukon pamahaw kag ulayhon ang pagpahog nga sila ng mawad-an sang trabaho ukon makakas sa listahan kag madulaan sang benepisyo.
Natapos na ang semana sa pag-file sang COC apang wala pa natapos ang ila banggianay. Mas pa gid nga nag-init bangud wala na nagapaumod ang isa sa ila kag halos nagasabat kag nagasaligbat sa kon anuman nga sugilanon nga ila mabatian.
Gintuad ni Congressman Jerry Treñas nga masami nga hubog si Mayor Jose Espinosa kag wala sang gab-i nga wala naga-inom. Nagsabat naman si Espinosa nga mas maayo pa ang mahubog sa whisky kay pagkaaga maampawan na apang ang hubog sa kwarta kag poder ang wala sang kaayawan.
Ginsiling ni Treñas nga malahalon nga ilimnon ang ginainom ni Espinosa. Nagsabat si Espinosa nga sa balay lamang siya ni Treñas nakainom sang malahalon nga ilimnon.
Ginpaathag man ni Espinosa ang isyu natuhoy sa ginapanghatag nga liston sang iya nga opisina sa tion nga may okasyon, piyesta ukon may okasyon sa syudad kag may nagapangayo sang sponsorship sa iya nga opisina. Ginsiling sini nga diskresyon sang iya opisina ang maghatag sini kag normal na nga sitwasyon kag sadto pa man ginahimo na. Gindugang sini nga paathag nga nagahatag man ang iya opisina sang korona sang bulak sa mga namatyan kag mas maayo na lang ini nga ihatag sa patay bangud malain man nga hatagan sang korona sang bulak ang buhi nga tawo.
Madamo pa kita sang lauman sa ila nga magbilas samtang nagalakat ang inadlaw kag samtang nagahilapit ang adlaw sang kampanya kag piniliay.
Ayhan makasiling kita nga ginalingaw lamang kita nila nga duha paagi sa pagdogsing, ukon luyag lang nila nga agawon ang atensyon sang tanan agud nga adominar nila ang kahanginan, pamantalaan kag lakip na sa internet.
Manabaw ang ila habuyanay sang sugilanon. Daw mga bata nga luyag mag-agaw sang atensyon.
Mas maayo kuntani nga ila istoryahan kon nga sahi sang serbisyo ang ila matan-ay kag kon ano ang ila ginaplano para sa syudad sang Iloilo.
Basi sa sobra nila ka ukay, may yara sila sang masalapay nga takop sa nagliligad nga kon makasungaw basi sila mismo ang mangil-ad.
Mas dungganon nga lihok ang paghimos sa mga lagu gikan sa dalan kag didto kusuon sa sulod sang tagsa nla ka ugsaran./PN
