NALUOD ang gobernador sa sistema sang pagbinaklanay sang boto kag paggamit sang kwarta agud impluwensyahan ang resulta sang eleksyon.
Nangin matigdas ang pahayag ni Governor Arthur Defensor Sr nga indi siya magpasilabot sa eleksyon sang Liga ng mga Barangay sa probinsya bangud nakita na sini ang natabu sa eleksyon sa tagsa ka banwa kag kon paano nag-impluwensya ang kwarta sa nangin resulta.
Bangud sa mga nakita nga hitabu sa eleksyon sa tagsa ka banwa kon sa diin nangin mayoriya sa mga nagdaug ang suportado sang iya ginalantaw nga mangin kasumpong sang iya anak sa pagka-gobernador sa palaabuton nga eleksyon. Halos ilisipon lamang ang kadamuon sang iya ginapatihan nga yara sa iya nga kampo.
Ginbungat pa sini nga sa pila ka banwa nga ila namonitor tuman ka dalagku sang kantidad ang ginatan-ay sa mga punong barangay agud nga magligwat sa ila panindugan, mahaylo nga mag-upod sa nagatan-ay kag magsugot sa kondisyon nga ginaplastar sa ila.
Bangud sa kwarta nga nagkamang kag nagpabag-o sa pinsar sa mga punong barangay diri kag nagparumatay ang gobernador sa piniliay para sa Liga sa probinsya.
Gintugyan na lamang sini sa iya mga kasumpong ang paghurma sang banas kag ang pagpagusa sa paggasto sang ila madamo nga kwarta. Naghulat na lamang siya sa resulta kag magalantaw sa mangin kahimtangan nila.
Ngaa nagparumatay lang siya? Matuod bala nga naluod siya sa nagakatabu? Ukon may iban siya nga bagay nga luyag ipatudok sa mga pumuluyo.
Posible nga luyag sang gobernador ipahangop sa mga tawo nga ang mga punong barangay nga ila ginsaligan ang mahapos nga mahaylo sang kwarta kag kaugalingon lang nga interes ang ginapaminsar. Gusto sini ipabatyag sa pumuluyo nga wala sang pagkabalaka sa ila palaabuton ang mga punong barangay nila ilabi na kon maghutik ang kwarta.
Luyag sini ipalab-ot ang mensahe nga sa tion sang piniliay sa masunod nga tuig indi dapat nga magkumpiyansa sa ila kapitanes bangud basi ibaligya sila ukon gamiton agud ini ang makapangwarta.
Sa sini nga punto, madulaan man sang punong barangay si Defensor apang linibo ka pumuluyo ang iya makumbinser para sa ila masanag nga palaabuton kag sa pagpatudok nga ang kwarta umalagi apang ang bulig sang gobyerno ang mangin sige-sige.
Kaangay man sa syudad ang sitwasyon, nagparumatay man si Mayor Jose Espinosa III sa nangin resulta sang piniliay sa Liga.
Posible nakita sang alkalde kag sang Gobernador nga apisar magdaug ang manok sang ila mga kasumpong, mangin wala ini sang pulos bangud sa palaabuton nga eleksyon. Kon mabakod sila nga kandidato kag ang ila kasumpong mahuyang, ang mga kapitanes ang mas magatapik sa ila gahum kag mas maganyat sa ila liderato kag ang naagom nga kadalag-an karon sang ila kasumpong ang mangin balewala sa ila na mismo nga pagpapili.
Kon makuha niya ang mayoriya, mangin indi salapakon ang isa ka punong barangay. Kag ang programa ukon proyekto ang sarang niya nga madirekta sa pumuluyo kag indi na pag-ipaagi sa punong barangay.
Ang nasilaw sa pilak ang karon nabulag kag indi makakita sa mas masanag nga palaabuton.
Ang nagparumatay sa piniliay may ginalantaw nga kasulhay./PN
