NAHUMAN na ang linya ni Cong. Ferj Biron.
Ginkumpleto ni former Iloilo 1st District kag karon Guimbal mayor Oscar Garin ang missing sa puzzle sang grupo ni Biron. Kun sa mga hulubaton pa, sya ang nagkumpleto sang katapusan nga bloke sa lulubngan sang pamulitika sang mga Defensor.
Pero anay ka, may kaangay gid man bala nga impact si Garin sa kandidatura ni Iloilo 3rd District congressman Arthur “Toto” Defensor Jr.?
Kun may pinakabalimbing nga politiko sa Iloilo, wala sang makatumba sa mga Garin. Ang ila matahum nga stratihiya kun san-o magsaylo kag kun sin-o ang updan kada election amo ang lyabe sa ila kadalag-an sa tagsa ka election kag pagpabilin sa poder nga halos indi na mapukan.
Sa pag-updanay sang mga Garin kag Biron, dako ang ginansya sang mga Garin. Kun si Biron may pabor nga nakuha sa ila, ang mga Garin triple ang ginansya sa pagpakig-alyansa samga Biron.
Gin-ako mismo ni Oca Garin nga labaw sa tanan, ang ila pag-upod sa mga Biron para sa ila kaugalingon. Sa tanyag ni Biron nga ginbaton ni Garin, wala duda ginansya si Manong Oca. Hamakon mo adoptaron ni Biron ang party-list sang mga Garin nga AAMBIS-OWA kag talikdan sini ang iya kaugalingon nga party-list nga Abyan Ilonggo.
Suportahan man ni Biron ang tanan nga mga kadidato sang partido ukon personal sang mga Garin sa 1st District kag ila pa ang bise gobernador.
Pero anay ka, may wala namitlang si Manong Oca. Ini amo ang isyu sang Dengvaxia. Sakit sang ulo ni anay Department of Health secretary Janette Garin ang Dengvaxia. The base sang alyansa, matunaw na ang isyu sang Dengvaxia.
Makabig gid ng astute politician si Manong Oca. Kun nagahuman sang alyansa, indi sya gusto nga patas lang kundi dapat ara sa iya ang bentaha.
Sa malawig nga binulan nga pinangitaay sang mangin running mate ni Biron kag ni Toto Defensor, maathag nga pareho sila nga naganegosyar sa mga Garins. Pero sigurado nga sa Biron na ang pag-upod sang mga Garin. Matawhay ang dalan kun sa mga Biron sya mag-upod.
Bisan pa nga may Biron ukon wala, sigurado naman ang kadalag-an sang mga Garin sa ano man nga posisyon nga ila handumom luwas lang sa pagkagobernador. Apang sa pagpakig-alyansa kay Biron nangin mas matalunsay pa gid ang ila byahe padulong sa kadalag-an lakip na ang posisyon sa party-list.
Sa liwat, ginpamatud-an ni Garin nga kinahanglan ang timing sa paglukso sa pihak nga kudal sang politika. Mas dramatic pa ini sa hinali nya nga pagsaylo kay Duterte sadtong 2016 elections kag ihatag sa karon President ang isa ka boto nga abanse sa iya banwa.
Kun ang mga buyong pa…si Manong Oca na ‘ya…Garin pa! ((jpranco1975@gmail.com/PN)
