NANGIN sentro nga topiko sang mga sugilanon ang Iloilo River North Bank Road ukon mas kilala bilang Iloilo Sunset Boulevard.
Ini nga proyekto ang nagasakop gikan sa Molo-Mandurriao Road, ilabi na sa Barangay Tabucan, Mandurriao, Iloilo City, nagalapus sa Iloilo Business Park (Megaworld) tubtob sa Oton-Pakiad-Mandurriao Road, sa Barangay Cagbang, Oton.
Natunga ini sa tatlo ka bahin nga may kabug-usan nga kinahanglan nga pondo nga 2.261 billion pesos. Nag-umpisa ang multi-year project sadtong Nobyembre 2021 kag ginalakipan sang konstruksyon sang 5-kilometer, 4-lane Portland Concrete Cement Pavement (PCCP) road.
Maathag man base sa record nga ang ini nga proyekto ginapatuman ang DPWH Regional Office VI, inisyatibo ni former Ilonggo Senator Franklin Drilon kag napapondohan ni House Deputy Majority Leader kag Congresswoman Jam Jam Baronda sang 300 million pesos sadtong tuig 2021, dugang nga 100 million pesos sang 2022, dugang pa gid nga 150 million pesos sang 2023, ginpadugangan pa gid sang 150 million pesos sang 2024, kag 150 million pesos pa gid sini nga tuig 2025.
Kabug-usan nga 850 million pesos nga pondo ang ginhimakasan ni Congresswoman Jam Jam Baronda para matigayon kag matapos ang ini nga proyerto nga daku ang mabulig sa mga Ilonggo.
Suno sa DPWH, kabug-usan nga 1.591 billion pesos ang napagwa nga pondo umpisa 2021, nga may dugang nga 300 million pesos nga ginpain gikan sa Fiscal Year 2024 General Appropriations Act (GAA) kag ang Fiscal Year 2025 National Expenditure Program (NEP).
Maathag man nga indi lang isa ka busdak sang pondo kag indi matigayon sa isa lang ka tuig ang pag-implementar sang sining tuman ka daku nga proyekto nga nagakinahanglan sang tuman man ka daku nga pondo.
Nahangpan man naton nga indi makasarang ang pondo sang syudad sang Iloilo para sa sini nga proyekto kag kinahanglan gid nga magagikan ang pondo sa national government. Ang makapangita sang pondo didto sa national government amo ang aton tiglawas sa kongreso. Kinahanglan ang mahugod, mapisan, kag kahibalo manultol kon sa diin kuhaon ang dalagku nga pondo agud mahuman ang ini nga proyekto.
Madamo ang nagapangayo sa ibabaw, madamo ang nagakinahanglan kag may mga prayoridad man nga mga proyekto apang ang karisma sang aton kongresista sa pagpangabay isa ka daku nga bentaha kon ngaa may yara sang Iloilo Sunset Boulevard nga pagabuksan sa Biernes, Enero 24, agud nga magamit na sang publiko, ilabi na ang mga Ilonggo.
Kon kadungganan, madamo sang nagadupa agud nga mabalikdan. Madamo sang nagapang-angkon sa kadalag-an apang indi mahinago ang kamatuoran nga ang proyekto ginhimakasan nga mahuman ni Congresswoman Jam Jam Baronda.
Bisan sin-o, pwede makahimo sang istorya, makalubid sang sugilanon kag batakon ang iya kaugalingon bisan pa nga wala sang may naamot ukon daku nga partisipasyon agud mahatagan katumanan ang proyekto nga nagatib-ong sa pagkilala sa mga Ilonggo.
Indi mapanas sa mga kasulatan, indi matursi ang kamatuoran nga daku ang nabulig, tuman ang pagpaninguha kag mas may kabalaka sa mga Ilonggo si Congresswoman Jam Jam Baronda agud nga makadul-ong sang pinasahi nga proyekto sa mga Ilonggo.
Para kay Baronda, wala sang problema kon angkunon sang iban ang kredito sa paghuman sang sini nga proyekto tungod nga indi man mahingabunan ang kamatuoran.
Importante suno sa iya nga nahuman ang proyekto, mapabugal sang mga Ilonggo kag madamo ang makabenepisyo.
Dapat lang nga mahibaluan sang mga Ilonggo nga wala sila ginapaslaw sang ila ginpili nga kongresista nga magatiglawas sa ila sa kongreso, nga nagadala sang ila tingog agud mabatian ang ila kahimtangan kag mabahinan sang pondo para sa mga proyekto sa ila kapuslanan.
Sa akon personal nga paglantaw, sadtong panahon antes nangin kongresista si Baronda, wala man gid sing tuman ka dalagku nga mga proyekto ang nagtupa sa Iloilo. Ang mga pagtin-ad nga naghumlad sa aton panan-awan kahimuan pa sadto ni former Mayor Jed Patrick Mabilog. Ginpadayon lang sang nagsunod sa iya apang wala sang mga pinasahi nga proyekto nga gikan sa iya inisyatibo.
Matuod, mahapos mangpang-angkon sang ginhimakasan sang iban ilabi na kon sa imo kaugalingon nakita mo ang imo kapaslawan nga makapatigayon sang kaangay nga bagay para sa benepisyo sang imo nasakpan.
Kon magbiya na kamo sa pwesto, ano ang dumdumon sang mga Ilonggo nga gikan mismo sa inyo kaugalingon nga paghimakas?. Ang mga kadungganan nga naagom sang syudad ang bunga sang paghimakas sang iban nga sektor. Wala sang inisyatibo gikan sa nagadumala. Tagbaton lang siya sang plake bangud siya ang nagadumala.
Daku ang pasalamat sang mga Ilonggo nga may kongresista nga mapisan kag dedikado sa serbisyo, naga-ulikid kag nagapalangga sa mga Ilonggo.
Sa kapisan ni Congresswoman Jam Jam Baronda, nagalaum kita nga may dugang pa gid nga proyekto nga ipatuman sa syudad sang Iloilo. (bertladera@gmail.com/PN)
