GINADUMDOM mo ang imo pagbatas sa nakalipas nga tuig. Nakita mo kon paano ka naghimakas nga makalampuwas sa mga palaligban nga nagduaw sa imo kabuhi. Nalipay ka nga nasaksihan mo ang pagbulag sang naglipas nga 2024 kag ginsug-alaw mo nga may paglaum ang 2025.
Ini ang esensya sang aton pagselebrar. Ini ang nagahatag sa aton kapagsik agud nga mas maghimakas pa gid sa palaabuton.
Matuod nga may mga pagbag-o sa ato ginahimo sa sahi sang pagsaulog sa pagsug-alaw sang bag-ong tuig apang ginahakus naton ang pagbag-o bilang kabahin sang selebrasyon.
Umpisa sang bata pa kita, nakunyag kita sa ma aktibidades sa palibot. Maduagon kag puno sang kasadya, may nagalinagabong nga sonata nga ginadunganan sang mga pagsinaot kag pagkinanta. May mga nagalanog man nga mga palupok nga sang una mo nga bati dayon mo pisik bangud sa kakibot. Sang ulihi, naka-adoptar na ang imo nga lawas kag naanad na ang imo dulunggan sa pagpamati gani halos wala ka na sang reaksyon nga nagapisik
Sa pamuno sang selebrasyon, daw kaangay sang piyesta ang aton nakita bangud sa dagaya nga pagkaon nga yara sa ibabaw sang lamesa.
Sadto, may bihon, tinapay kag softdrink lang ayos na para sa sa aton. Apang subong, indi madula ang salad, cake, litson kag iban pa nga naga-idas sa lamesa.
May mga panimalay nga wala sang dagaya nga handa bangud sa kapigaduhon. May mga panimalay nga ginpili nga sa iban nga lugar magsaulog kag nagakomporme lang sa gamay nga salo-salo. May iban nga bisan makasarang magbakal sang madamo nga handa apang ginpili nga kasarangan lang ang ila handa para lang nga may gamay nga saluhan sa pagsug-alaw sa bag-ong tuig.
Magkatuhay ang kahimtangan sa kabuhi, magkatuhay ang pagpati sa paghanda, magkatuhay ang huyog sa pagselebrar.
May mga pamilya ukon himata nga didto sa luwas sang pungsod, ilabi na ang may ikasarang. May iban nga yara sa ila ugsaran bangud nga ini ang ila naluyagan.
Magkatuhay ang aton kahimtangan sa kabuhi, apang isa lang ang aton ginatulok sa sini nga okasyon. Luyag naton nga talikdan ang mapait nga mga inagihan sa kabuhi kag ilubong sa limot ang mga masakit nga lahog sang kapalaran.
Luyag naton nga atubangon ang bag-o nga tuig nga puno sang paglaum kag positibo nga enerhiya nga ubayan kita sa aton mga lihok kag mga handom.
Nangin daku nga leksyon ang nakalipas agud nga mangin mapag-on sa pag-atubang sa karon nga sitwasyon ka sa palaabuton. Indi naton luyag nga masulit ang hitabu ukon mangin makaluluoy sa lahug sang kapalaran.
Nagapasalamat kita nga nakaagom kita sang kaalam sa pagtumod sa mga bagay kag sirkumstansya nga dapat likawan kag magaserbe ini nga giya sa aton kon paano ini atubangon kag kon paano makalikaw agud nga indi na masulit nga matilawan ang kapintas sang kapalaran.
Nagapasalamat man kita nga wala sang daku nga unos nga naglabay diri sa aton sa Iloilo. Nagalaum kita nga padayon kita nga bugayan kag ipahilayo sa mga katalagman agud indi naton mabatyagan ang hapdi sang kahul-anan.
Nasentro sa pagpalasamat ang pagsug-alaw sang bag-ong tuig tungod nga yara kita nga nagaselebrar, nagatingob sa pamilya, nagabuylog sa komunidad.
May mga tawo nga yara sa ospital nga indi makaselebar, ang iban yara sa ila trabaho kag indi makadungan sa aton kinasadya. May mga yaera didto sa luwas sang pungsod nga nagalangot ang buot nga gusto man magselebrar sa iya mga himata diri sa Pilipinas apang wala nakapauli.
Gani bulahan ang mga yara sa ila tagsa kapanimalay nga kumpleto kag wala sang may ginabatyag sa ikaayong-lawas.
Ini ang rason kon ngaa ginahatagan naton sang igtalupangod ang sitwasyon sang mga nakalampuwas sa nakaligad nga tuig tungod nga bulahan kita nga nagasugata sa pagsulod sang tuig 2025 nga wala sang sablag sa lawas bisan pa nga manipis ang handa sa lamesa.
Sa pihak sang paghan-os sang mga sirkumstansya sa aton kabuhi, nagpabilin kita nga mapag-on, ginpilit naton nga magpakalig-on, kag ginsumalang naton ang tanan nga mga pagtilaw sang kabuhi.
Nangin bulahan kita nga nakalampuwas sa pagtilaw sang 2024 kag ssubong bitbit naton ang paglaum, sul-ob naton ang roba sang pagtuo, kag kaalam gikan sa eksperyensya agud nga atubangon ang kapalaran sa tuig 2025.
Kahibalo kita nga madamo sang pagpanghangkat, posible tuhay sa natabu sadtong 2024, kag basi mas masupog ang 2025, apang ang aton kapag-on kag kahugod makapalig-on sa aton agud malampuwasan naman ang tuig 2025.
Bisan ano pa ang mga pagbag-o sa sahi sang aton selebrasyon, kon dagaya ukon kabus sa handa, kon nagtahaw na ukon nagadabdab pa ang init sang aton pag-apresyar sang sin inga okasyon, yara lang sa gihapon ang aton positibo nga paglantaw sa palaabuton nga malampuwasan naton ang hangkat sang panahon. (bertladera@gmail.com/PN)
