GIN-ATAKE sadtong Enero 6 sang linibu nga supporter ni President Donald Trump ang US Capitol, ang “seat of power” sang pungsod sa Washington, D.C., nga ginbasol sa pang-udyok ni Trump sa iya supporters.
Gin-okupar nila ang capitol grounds kag pilit nga magsulod. Nakigtulakan sa mga security personnel kag namuka pa sang mga bintana kag ganhaan agud makasulod.
Pinunggan kag ginhabuyan sang smoke bomb, apang nakasulod gid.
Tinultol ang mga hulot, lakip na ang session hall sang Senado kag ang mga hulot sang mga lawmakers. Nangguba man sila sang mga kagamitan diri kag may nangawat pa samtang ginasinggit ang ila pagsuporta kay Trump.
Maayo lang kay natapos gid man ang pagbotohay sang Senado – upod man ang mga kapartido ni Trump sa Republican Party. Diri gin-confirmar na nila ang pagdaug ni President-elect Joe Biden upod kay Vice President-elect Kamala Harris halin sa electoral votes.
Sa natabo nga “riot”, isa ka Trump supporter ang naluthangan patay; ang pila pa gid tungod sa atake sa korason kag sang pagdinagoso.
Madamo man ang nasamaran kag na-ospital lakip ang pila ka security personnel sa kapitolyo. So far, 83 ang naaresto samtang ginapangita pa ang iban.
May nasapwan pa nga 11 ka molotov bomb sa isa ka van sang isa ka protester kag madamo nga inuglampos nga mga bagay nga dala sang iban.
Samtang, nahimo pa ni Trump nga ipahibalo sa iya tweet sa Twitter nga wala siya plano agud patigayunon ang isa ka malinong kag orderly nga pagbulos sa poder ni Biden.
“They will have a giant voice into the future; and they will not be disrespected or treated unfairly in any way, shape or form,” paathag pa niya.
Ginpat-ud man niya nga indi siya magtambong sa inagurasyon ni Biden sa Enero 20 tungod wala niya ginakilala ang pagdaug ni Biden.
Kag ina bisan pa sa iya pagkalutos sa inisipay sang boto, sa pagkalutos sa korte, kag bisan pa sa pagbaton sang iya mga kapartido sang iya kalutosan.
Tungod sini, gin-supende na sang Twitter kag bisan sang Facebook ang mga account ni Trump agud indi na mabasahan pa, sandig sa ila polisa batok sa “misinformation” kag “inciting to violence”.
Naakig na gani si Biden kag nagpaandam sing: “Enough is enough is enough is enough…!”
Sa ulihi na lang nagpanawagan si Trump – sang madamo na ang nadisgrasya kag nahalitan – nga magpakalinong na ang mga supporter niya kag indi na pagsamungan ang pagpungko sa poder ni Biden.
Samtang, ginpakamalaut sang madamo ining pag-atake sa kapitolyo sang mga supporter ni Trump. Indi lang sang mga Democrat, kundi pati na sang mga kapareho niya nga Republican, kag bisan sang madamo nga lideres sang iban nga pungsod.
***
Wala ugaling salig sa panawagan ni Trump si House Speaker Nancy Pelosi (Democrat), labi na gid sang nagwa ang intelligence report nga gaplano pa ang mga supporter ni Trump sang liwat nga pag-atake sa kapitolyo sa Enero 17.
Ginakulbaan gani ang iban sa pagpakita ni Trump sing “unbalanced behavior”, samtang presidente gihapon tubtub Enero 19, 2021.
Basi kuno mag-order ini, sa hingapos sang iya termino, sang “nuclear strike”, ukon ang paggamit sang armas nuclear. Batok kay sin-o pa kundi sa China, nga ginadumtan gid niya kag ginagarit-garit sa mga isyu sa China Sea, nga makadabuk sang makasiligni nga 3rd World War!
Tungod sini, nanawagan na si Pelosi sa Joint Chiefs of Staff sang US Armed Forces nga indi gid pagpasugtan si Trump sa pag-order sang “nuclear strike”.
Maayo man kay nagpasalig sila nga indi nila pagtumanon ining isugo ni Trump, labi na sa pagkilala na sang pagdaug ni Biden. Pila ka kasuguan nga ginaduso ni Trump wala na gani ginsapak sang Kongreso.
Gin-aha man si Vice President Pence agud mag-takeover sa presidency ni Trump tungod indi na ini “able to govern the US government”.
Namalibad si Pence, gani nagplano na ang House nga mag-file sang impeachment batok sa kay Trump.
Kon ano man ang matabo thereafter, kabay lang nga magbalik na sa normal ang kahimtangan sa United States nga sa karon nabutang sa daku nga kahuy-anan. Kag syempre sang paglibak sang iban nga pungsod sa ginapabugal gid sini bilang ejemplo sang Demokrasya sa bilug nga kalibutan./PN
