TEMPORARYO nga napunggan ang pagpadala sang mga doktor gikan sa Western Visayas padulong sa Central Visayas matapos nga nagpalab-ot sang ila pagpamalabag ang mga doktor tuhoy sa plano sang Department of Health (DOH).
Ginsuspendir sang DOH ang pagpadala sang kapin sa 40 ka mga doktor matapos nagpamalabag bangud sa kakulang sang konsultasyon kag indi sila masyado ka pamilya sa sitwasyon sa Cebu kag madamo pa nga mga rason lakip na ang pag-uyang sang inadlaw kon i-quarantine pa sila sa ila pag-abot didto.
Plano sang DOH nga magpadala sang mga doktor sa idalom sang Doctors to the Barrios ukon DTTB program sa apat ka mga batch umpisa Hunyo 30 tubtub Setyembre 15 kag ang una nga batch ang kuntani magabiya sa probinsya sang Iloilo sadtong Lunes, Hulyo 6, apang ginpaiway anay.
Nagpadala sang sulat ang Alliance of Health Workers-Iloilo kag Filipino Nurses United- Iloilo Chapter sa kay Gov. Arthur Defensor Jr. kag lakip sa Sangguniang Panlalawigan nga nagtuon kag naghatag sang atensyon sa ila yamo tuhoy sa plano sang DOH sa mga rural doctor.
Bangud sini, nag-privilege speech si Board Member Domingo Oso tuhoy sa kabalaka sang mga doktor kon sa diin may pito ka doktor nga ginhingadlan nga una nga ipadala didto sa Cebu.
Ginapamatukan ang plano sang DOH bangud nakita sa sitwasyon sa probinsya sang Iloilo nga may yara sang pagsaka sa mga kaso sang COVID-19 kag dapat may nagaatipan nga doktor sa tagsa ka banwa nga ila ginaalagaran.
Kon madamo sang kaso ang Cebu, indi mahimo nga pabay-an ang sitwasyon sa Western Visayas bangud nga madamo man sang dapat atipanon ang mga doktor. Ginsiling sini nga wala sang klaro kon ano ang mangin papel sang mga doktor didto ilabi na ang mandu sa ila amo ang magpadulong lang, wala sang dugang nga paathag kon sa diin sila ma-assign, kon ano ang partikular nga trabaho kag iban pa nga detalye sa kon ano ang ila himuon didto.
Mas mabudlay pa gid kon pag-abot nila sa Cebu ipaidalom sila sa 14-day mandatory quarantine. Mangin kanugon ang 14 ka adlaw nga ila itenir nga kuntani ginahinguyang na nila sa pag-atipan sa mga pasyente.
Nakita man nga madamo sang medical schools sa Cebu nga mahimo kwaan sang medical personnel, hanason lamang agud nga makadugang sa pwersa sang mga doktor nga nagaatipan sa mga pasyente.
Suno kay Board Member Oso, nagasugod na ang tingulan kag madamo sang mga balatian nga dapat atipanon ang mga doktor sa mga kabanwahanan. Nagapakig-away kita sa COVID-19 apang nagahana man ang dengue, leptospirosos kag iban pa nga balatian nga dala sang panahon sang tingulan.
Nakamarasmas gid man ang DOH tuhoy sa ila plano matapos nga madamo sang indibidwal nga doktor ang nagpamalabag, magluwas pa ini sa madamo nga grupo ukon asosasyon sang mga doktor, lakip ang mga local chief executive nga nagpahayag sang ila pagpamalabag sa sini nga plano.
Nagalaum ang Sangguniang Panlalawigan sang Iloilo sa pagpamuno ni Vice Gov. Christine Garin kag sa pagtalupangod ni Board Member Oso sa yamo sang mga doktor nga mangin lubos na ang pagpaiway sa plano nga pagpadala sang mga doktor didto sa Cebu.
Dapat kita magpangapin sa aton ugsaran. Wala kita nagadinalok sa pagpahulam sang aton mga doktor apang kinahanglan anay nga pangitaan sang solusyon sa palibot sang Cebu. Dapat nga medyusan sa kon ano man ang available resources may yara sa ila lugar antes magtulok sa iban nga rehiyon.
Pasalamatan naton ang aktibo nga pagtalupangod sang Sangguniang Panlalawigan sang Iloilo sa sini nga yamo sang mga doktor. Gintalupangod gid ang mga hibubun-ot kag kahangawa kag gin-aktuhan sang nagakaangay tubtub nga napalab-ot sa mga natungdan ang sentimento sang mga apektado.
Ipadayon naton ang pagpanindugan nga indi lang sa punto nga napigaran ang plano kundi dapat mangin pinal na nga wala na sang tuyo pa ang DOH nga ipadayon ini bangud naga-amat-amat naman tahaw ang kaso sang COVID-19 sa Cebu paagi sa pagtalupangod kag pagdumala sang mga ahensya nga nagatutok sa ila kahimtangan.
Padayon ang aton pagbinuligay kag paghiliusa sa pagpangapin sa aton banwa batok sa anuman nga sahi sang balatian.
Maathag nga ang SP sang Iloilo wala lamang nagakahulugan nga Sangguniang Panlalawigan kundi nagakahulugan man nga Serbisyo sa Pumuluyo sang Iloilo. (bertladera@gmail.com/PN)
