TUBTUB Marso 2021 ang dominante nga COVID-19 variant sa India amo ang Alpha (UK) variant, nga sa amo nga tion naghatag sing kabalaka sa mga health expert tungod mas madasig ini mag-infect sangsa orihinal nga COVID-19.
Wala ugaling malingkang ining pungsod nga may 1.38 ka bilyon nga pumuluyo sa pagsulod sining variant halin sa United Kingdom. Nga daan kilala ini bilang nagapanguna nga producer sa kalibutan sang mga bulong, labi na gid sang generic drugs, kag bisan sang mga bakuna. May kaugalingon ini nga produksyon sang Covaxin kag Covishield.
Sa gihapon napatuman nila ang mas madasig nga pag-immunize (vaccinate) sang ila pumuluyo bisan pa sa padayon man nga pag-infect sining Alpha virus.
In fact, madasig na nila sadto malab-ut ang “herd immunity” sa New Delhi, nga dakbanwa sini, bisan pa sa padayon nga pangdalasa sining UK variant.
Tungod sini, ugaling, nangin complacent kag nagpasayang-sayang na ang mga pumuluyo. Gintugot na gani ang indi paggamit sang face mask kag pagbalewala sa social distancing. Gintugot man ang political rallies kag religious festivals.
Pero nakibut lang sila sang nagtuhaw ang Delta variant dira mismo sa India sadtong Abril 2021.
Nadiskubrihan sang mga health experts sa India’s National Centre for Disease Control kag sang CSIR Institute of Genomics and Integrative Biology nga sobra gali kadasig mag-infect ini sangsa Alpha variant.
Napamatud-an nila sa 878 test samples nga mas madamo ang na-infect sining Delta variant sangsa Alpha variant sing mga 50 ka porsyento.
Ang natabo sang ulihi amo nga indi na malab-ut sang immunization (vaccination) rate ang infection rate sining Delta variant. Sa simple nga ejemplo, kon ang nabakunahan mga 100 na ka tawo, sa amo man nga tion 150 na ang na-infect.
Tungod sini, nag-alawas na ang mga pasyente sa mga ospital kag ginkulang na ang mga healthcare facility kag mga equipment katulad sang mga oxygen machines kag breathing apparatus, kag mga anti-viral drugs para paayuhon ang mga “severe” kag “critical” cases. Kulang naman ang mga kinahanglanon nga mga personnel – doctor, nars kag contact tracers kag kinahanglan manglaghap pa sang ma-hire nga tinawo para sa healthcare.
Gani napabay-an ang madamo nga pasyente nga bisan ang mga indi “severe” ang kaso nangin malala ang kahimtangan kag upod nga napatay sa mga “critical”.
Tungod sini, indi na gani ma-cremate ang iban nga mga bangkay kay indi na masarangan sang mga crematorium. Gintutdan na lang gani ang pila ka bangkay sa wayang. Ang iban nasapwan na gid lang nga naga-utaw-utaw sa suba.
Liwat ginbalik ang istrikto nga pagpatuman sang health measures lakip na ang lockdown sa mga COVID-19 hotspots kag mga “essential” lang nga hilimuon kag kinahanglanon ang gintugutan. Gin-ban ang mga pagtililipon nga sobra sa lima ka tawo. Ginpadasig man ang pag-produce sang bakuna kag ang pagpangbakuna.
Sa gihapon gin-prioritize sa pagbakuna ang mga health workers kag mga elderly. Gin-prioritize na ang mga super spreaders katulad sang mga empleyado, nagatinda sa mga merkado kag mga store attendants nga masami nagaatubang sa mga pumuluyo.
Tubtub nagkalma na ang sobra kadasig nga infection sang Delta variant. Sa sining ulihi lang, sa Navi Mumbai sa report sadtong Agosto 4, nag-report ini sang 66 lang ka new cases kag 72 ka recoveries kon diin wala sing napatay.
Samtang nakalab-ut na ang Delta variant sa Indonesia, Malaysia, Thailand, sa Middle East kag tubtub na sa Uropa kag sa Americas sa United States kag Canada.
***
Ining experyensya sang India nakapamuklat sang mga health authorities sa India kag sang iban nga mga pungsod kon ano ka mahaliton ang Delta variant.
Maabtik man ang reaksyon sang mga naapektuhan, lakip na ang may mataas na nga vaccination rate. Ginpabakud ang pagpatuman sa mga pumuluyo sang health measures katulad sang paggamit sang face mask, social distancing, paglikaw sa pagginutok (crowd) kag pagtuman sang nagakabagay nga mga personal hygienic practices.
Tungod bisan ang mga nabakunahan pwede ma-infect man kag maka-infect sang Delta variant, ini sila, without exception, ginapatuman man sining health measures.
Ginapatuman man ining istrikto nga health measures diri sa aton pungsod, samtang ginapadasig man ang aton pagpangbakuna kag ginapabakud pa gid ang aton healthcare agud malagas ang infection rate. Na-lockdown man gani ang pila ka COVID-19 hotspots./PN
