[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’NEW YEAR’S RESOLUTION’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”][/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
Subung ang maayo nga tion agud balikan ang nagkalatabu sa tuig nga nagligad. Tapus na ang Pascua, kag Bag-ung Tuig na.
Maayo man nga idea ang magbalay sang New Year’s resolution, nga bisan indi man tul-id kag hugut nga mapanindugan, makahatag sang direccion o pakadtuan sang aton kabuhi sa 2018.
Mahuyugun ako sa New Year’s resolutions. Bangud nakita ko nga nakabulig ang mga ini sa akon sumugud sang ako veinticinco años.
Simple lang ang akon mga New Year’s resolution: Indi mag-inum softdrinks (1998). Magkaun sang mas madamu nga utan (1996). Magbasa sang isa ka libro cada bulan (2008). Mag-iban sang horas sa Facebook (2014). Indi magkaun sang baboy (2009). Magsulat sang isa ka binalaybay o sugilanon sa cada semana (2012).
Sa masami, mapanindugan ko man ang akon resolutions. Kag bisan pa mapaslawan ako, o mapaidalum sa kahuyang, ako man gihapon ang nagadaug.
Halimbawa: Sang tuig nga naghambal ako nga indi mag-inum sang softdrinks, kon nag-inum gid man ako sang softdrinks, indi ini maglab-ut sa napulu ka veces. Bangud aware ako nga nanaad ako, kag sagrado para sa akon ang akon mga tinaga. Kon baliun ko man ang akon resolution, nahibaluan ko man ang akon ginahimu.
Kon ginapangita gid sang akon ginhawa ang softdrinks, indi man ako magdumili o magdingut sang akon kaugalingon. Basta nahangpan ko nga pagbali ini sang akon panaad. Makaanum gid man siguro ka veces nga nag-inum ako sang softdrinks sa 365 days sang 1998. Indi ina malain. In fact, maayo ina nga record. 98.4% success rate.
Kag sumugud sadto, malaka sa malaka na gid ako kon magsoftdrinks. Bangud maanad na ako maglikaw, kag mangindi sang softdrinks.
Malaka naman ako kon magkaon sang baboy subung. Kag daw nahibaluan ko man kon san-o ako sarang magkaun sang baboy.
Sa mga salosalo kon diin may lechon, nagakaun ako sang baboy, kag bisan pa magpaayaw ako, okay lang; bangud nahibaluan ko nga tuman ka malaka sang baboy sa akon kabuhi.
Sa subung, balik naman ako sa madamu nga horas sa Facebook. Nacontrol ko na kuntani ini sang 2014, apang sang 2015, akon nahangpan nga madamu gali ako sang fans sa Facebook, kag nagabaskug ang akon online presence kon ara ako sa Facebook.
Para sa iban nga tawo, indi kinahanglan, o indi applicable ini. Apang writer ako. Celebrity. Kag nabase sa popularidad ang akon career bilang manunulat.
Kon wala ako sang online presence, wala sang makakilala sa akon. Kon wala sang makakilala sa akon, wala sang mabakal sang mga libro kag pelicula ko. Kon wala sang nagasuporta o nagasakdag sa akon bilang nanunulat, paano ko mahambal nga manunulat ako?
Mahapus ang magbuhat sang New Year’s resolution. Indi lang kita magtam-an ka ambisioso kag magsiling nga madalagan kita sang tres kilometros adlaw-adlaw kon wala man lang kita sang exercise sang nagligad nga tuig.
Imbes magsiling nga madalagan kita sang tres kilometros adlaw-adlaw, sarang kita makasiling nga maexercise kita sang veinticinco minutos adlaw-adlaw. Puede ini nga lakat, dalagan, saut, Zumba, o calisthenics. It’s more do-able.
Kon magsiling kita nga indi ka mag-inum softdrinks, dapat ihanda mo man ang mga substitute mo sa softdrinks. Kalamay ang contra mo sa softdrinks. Ti, bisan indi ka magsoftdrinks kon sigue ka man orange juice nga indi ikaw mismo ang nagpuga, wala man gihapun pulus.
Gani kon kinahanglan mo gid ang savor sa ilimnon, maghanda ka sang suha nga wala kalamay, cha nga wala kalamay, tahu halin sa dinikdik nga luy-a, wala o diutay lang ang kalamay. Kinahanglan kabalu ka sang tubi nga may kinihad nga pepino, o kinumus nga oregano.
Promise small, and develop a new habit. Ina ang likum sang New Year’s resolution./PB
[/av_textblock]
[/av_one_full]
