HALOS tanan nga paghikay sang mga media, politiko kag bisan sang mga ntizens ara kay Mayor Jose Espinosa III. May nagasiling nga mahina sya, indi makahibalo maghambal, maila sa media kag kun anu-ano pa.
Sa pihak sini ngaa daw sa wala lang sa alkalde? Ngaa bala nga indi sya stressed?
Indi mo makitaan sang pagkabalaka si Joe III. Kun ano ang panic sang iban sa pagtipon sang mga kapitan, si Joe III daw sa wala lang. May rason ayhan sya nga nagapakampante sa sitwasyon?
Ari lang ang pila sa akun naobserbahan sang nag-abot si President Rodrigo Duterte sa syudad sang Iloilo agud magtambong sa national convention sang Philippine Councilors League (PCL):
Una, si Cong. Jerry Treñas gin-acknowledge ni Atty. Francis Tolentino nga amo ang masunod nga mayor. Ara mismo nagapamati si Joe III.
Pero sang nag-abot si Duterte, si Joe III ang nagsug-alaw kag malawig ang ila pagsugilanon. Inang kaangay bala nga madugay na sila nagkilalahay.
Ikaduha, halos wala ginasapak ni Duterte si Treñas. Wala gani gin-acknowledge sa iya nga speech. Kaangay nga daw wala lang naga-exist si Treñas.
Ikatatlo, wala sa gihapon ginsapak ni Duterte si Treñas bisan pa nga ginhambalan sya sang isa man ka opisyal sang PCL nga ara ang kongrsista. Nagsenyas lang sya nga daw ang buot silingon, “pabay-i da sya.”
Ikaapat, bisan didto sa VistaMall, malawig man ang sugilanon nanday Duterte kag Joe III. Bisan pa nga wala nadayun ang pormal nga meeting sang Nacionalista Party kay President, si Joe III nakasugilanon na sa iya.
Ikalima, ang partido ni Joe III nga NP malapit sa President, pati na ang party president, kaalyado man. Siling gani, isa ang NP sang mga Villars sa nagduso sang kandidatura ni Digong. Kita mo ang premyo amo ang Department of Public Works and Highways portfolio.
Kag ikaanom, si Joe III nakaupod man si Special Assistant to the President Bong Go. Teh, sigurado may maayo naman nga estorya nga nahuman.
Sa pagbisita ni Digong, left out si Treñas. Amo ini siguro nga bisan wala na kuno kaalyado sa konseho, all smiles sa gihapon si Joe III. (jpranco1975@gmail.com/PN)
