ANG AKTIBISMO mga hulag agud ipakilala, punggan – direkta man ukon indi – ang pagbag-o sa sosyodad, politika, ekonomiya kag palibot. Ini sa katuyuan nga para sa kaayuhan sang kadam-an.
Diri nabalay ang mga paghulag kontra sa mga lihok sang gobyerno nga ginapatihan indi makapaayo sa kadam-an kundi sa pila lang ka pili nga sektor sang sosyodad.
Sa malawig nga panahon, ang aktibismo ang nagpukan sa mga indi maayo nga pagdumalahan sang gobyerno sa matawhay nga pamaagi. Isa na diri ka halimbawa ang EDSA People Power nga nangin kabangdanan sang pagkapukan sa poder sang duha ka dekada nga rehimeng Marcos.
Apang ngaa makalipas ang 34 ka tuig padayun gihapon ang aktibismo sa pungsod? Ngaa wala sang katapusan ang pagmartsa sa dalan? Ngaa wala sang katapusan ang pagpas-an sang armas kontra sa gobyeno?
Indi balay ayhan bangud padayun nga madamo ang napatumbyaan sang gobyerno? Ukon may nagapanginlulos sa aktibismo?
Sa masami makasabat kita nga ina bangud may kakulangan ang gobyerno. Ina bangud nagapabilin ang sistema nga ang nagadumala, may pinilian. Wala na gani nagatupa sa tawo ang dapat para sa ila, mas nagabugana pa ang kabuhi sang mga kaalyado.
Sa pagbuyagyag ni Ka Eric, nga amo man si Jeffrey Celiz, nga ang mga aktibista nga grupo mga fronts sang New People’s Army (NPA), daw wala naman kita nakibot. Ini bangud sa malawig nga panahon, ginalibod na ina nga kampanya sang militar.
Ang nakapakibot lang sa atun bangud ang anay hardcore nga katibista nga nangin kadre pa sang NPA suno sa iya pag-ako, amo na karon ang manugtudlo sang militar kun sin-o ang ara sa hublag.
Masakit man ini sa iya mga anay kaupdanan, pero isa lang ang pat-ud sang nangin tikang ni Celiz – ini amo ang personal nga kaluwasan.
Pero indi kita dapat malipat kun ano ang nabulig sang aktibismo sa atun kahilwayan. Indi man malipat ang mga aktibista nga indi lang maglapas sa latid sang kawsa.
Tandaan lang nga kun ano ang hulag, indi para sa kaayuhan sang kadam-an./PN
