MAY MGA kabangdanan kun ngaa nagapakita sang nanuhaytuhay nga pagbinatasan ang tawo.
Ini mahimo iya duna nga batasan, impluwensya sang iban ukon may modelo nga ginasundan.
Subong nga panahon sang pandemya sang COVID-19, ngaa nagapinadungol ang mga tawo? Ngaa bala kabudlay sa ila hambalon nga indi maglagaw, indi magtipon-tipon kag magsunod sang mga minimum health protocols?
May iban nga nagatuman, may iban nga nagasupak sang indi hungod apang may iban gid nga nagasupak agud magpadungol.
Isa ka tuig kag tunga na ang pandemya apang tubtob subong wala kita sang nakita nga maathag nga solusyon magluwas sa bakuna. Ang kaso naganubo, apang hinali lang nga magtaas. Ginabasol sang gobyerno ang mga tawo nga masinupakon sa mga pagsulondan.
Sa nakaligad nga mga binulan, madamo kita sang balita angut sa gobyerno mismo nga nagalapas sang ginapatuman nga protocols – halin sa national government panaug sa local nga pamunuan.
Sining karong lang nangin isyu ang inagurasyon sang substation sang Bureau of Fire Protection sa Jaro bangud nga madamo ang nagtambong kag may catering pa kuntani. Ini sa pihak sang pagdumili sang tanan nga klase sang pagtililipon santo sa Executive Order No. 50-A nga ginpaggwa ni Mayor Jerry Treñas. Daw wala ini ginalauman nga matabu bangud iya ini kahiwatan sang gobyerno. Matuod nga may pagsunod man sa minimum nga health protocols apang paglapas naman ini sa no mass gathering nga mando.
Matapoos na-post ini nga isyu sa social media, nagbinaha ang reklamo sang mga ordinaryo nga tawo. Mga tawo nga ginahugtan sang gobyerno bangud sang ginapatuman nga protocols. Mga tawo nga nauntat ang trabaho, mga nadulaan sang negosyo kag bisan ang ordinaryo lang nga tawo sa balay nga nagapakuribong bilang pagtuman sang mando sang gobyeno.
Ini nga mga akto sang tawo sa gobyerno amo ang nagapadungol sa mga Pilipino. Ginatanom sa ila pinsar nga kun sa gobyerno okay lang, ngaa kun kami indi pwede? Resulta, nagapinagusto man ang tawo sang gwa kag wala na nagapati bisan ano pa ang kampanya sang gobyerno sa iya.
Kuntani magpakita sang maathag nga lihok ang gobyerno sa away kontra COVID-19. Indi pagsilutan ang tawo paagi sa pagkurong sa ila puluy-an nga wala na sang pangitan-an kag nagakalagutuman.
Bisan paano maayo ang sa uma nagapangabuhi kag hilway sa ila palibot maglagaw kag magpang-ipo sang utanon apang ang diri sa syudad, kun naka-lockdown ka, gutom ang imo madangatan. Indi man makasustento sang husto ang gobyerno sa kinahanglanon sang tawo gani indi mapilit nga magpanimuko sa balay.
Tani indi man magpinadungol ang tawo sa gobyerno agud mangin maayo sila nga ehemplo sa ordinaryo nga mga tawo./PN
