SA MASANGKAD nga kampanya sang gobyerno batok sa ilegal nga droga, ngaa nagadaug pa ang mga ginapatihan nga may kaangtanan sa ilegal nga droga?
Bisan pa gani ang mga namitlang na sang Philippine Drug Enforcement Agency (PDEA) nagdaug man. Ano ayhan ang kabangdanan?
Indi malipod nga ang mga ginaalegar nga drug protectors tuman man kaalwan sa ila mga kaingod. Ginahingalitan nila ang pagkakinahanglan sang mga imol nga residente. Bangud sini padayun sila nga ginahangad sang mga imol nila nga kabarangay. Sila ang nagapuno sa kakulangan sang gobyerno sa nagabakho nga mga pumuluyo.
Kun inyo matalupangdan, kadam-an sang mga ginakabig nga pugaran sang ilegal nga druga amo ang mga ginapuy-an sang mga imol. Ang mga residente halos na makakaon sang kumpleto nga tatlo ka kaon sa isa ka adlaw. Kun ikaw ginagutom kag wala ka man sang hangpon sa gobyerno, diin ka madalagan? Syempre sa nagatawtaw sa imo sang bulig bisan ilegal pa ang kabaylo.
Nagdaug ang mga drug personalities bangud napaslawan ang gobyerno nga mapalambot ang matuod nga mensahe sang pagpakig-away sa ilegal nga droga. Wala nakita sang mga Filipino ang katampad sang otoridad sa pag-away sang ilegal nga droga.
Maathag ini nga sa umpisa pa lang ginakontra na nila ang ginpaggwa nga listahan sang narco politicians sang gobyerno. Tuman man abi ka questionable ang intention sa pagbuyagyag sang mga ngalan.
Mentras indi makuha sang gobyero ang lubos nga pagsalig sang mga pumuluyo nga maamligan sila sang otoridad kun magbuylog sila sa kampanya kontra ilegal nga droga, indi sila makalaum sang lubos nga suporta sa mga Filipino.
Sin-o man abi ang magpangisog nga mag-away sang ilegal nga droga sa imo barangay kun ang gobyerno indi man makaamlig sa imo? Bisan sin-o man mas pakamaayuhon na lamang nga maghipos kag ang malala kun magbuylog pa sa mga durogista.
Ang suporta sa away sa ilegal nga droga indi lang madali nga makuha gikan sa komunidad. Nagakinahanglan ini sang mas madalum nga pagkuha sang simpatiya kag pagsalig sang pumuluyo. Tubtob nga indi ini mahimo sang gobbyerno padayun nga magakabuhi ang ilegal nga droga. Mentras nga may mga tawo nga ginagutom kag nagasalig sa matag-adaw nga pagpaningakaras, ang ilegal nga druga magapadayun. (jpranco1975@gmail.com/PN)
