Ni Cyrus M. Garde
Syudad sang BACOLOD – Ang ika-lima sa lista sang nagabaligya sang ilegal nga droga sa banwa sang Valladolid, Negros Occidental ang nadakpan, lakip ang drayber sang motorsiklo nga iya ginasakyan sang Hunyo 20 sa banwa sang San Enrique, Negros Occidental.
Ang mga katapo sang San Enrique PNP ang nagdakop sining duha paagi sa buy-bust operation mismo sa puloy-an sang suspek nga ginkilala kay Rene Monsale, 46 anyos, may asawa kag pumoluyo sang Purok Boungainvillea, Brgy. Poblacion, Valladolid.
Ang upod naman sini nga drayber ginkilala nga si Donald Geniza, 31 anyos kag pumoluyo man sang amo nga duog. Ginapasuni nga naga-gamit man ini sang ilegal nga droga.
Nakuha sa paghinakop sang duha ang duha ka plastic sachet sang ginadilian nga shabu.
Samtang ginasulat ini nga balita, nahunong na sila sa San Enrique PNP kag pagakasohan sang paglubag sang Republic Act 9165 ukon Comprehensive Dangerous Drugs Act of 2002./H
