[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’NOVIE ONDICE Ika-6 nga gua’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”][/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
Tuman katam-is sang mga tulalay nga ginatukar ni Sebastian. Makabuluang. (Kon kabuangan gid man ang madula sang makadali gikan sa kamatuoran nga napun-an sang kapait, kasakit, kag pag-antus.) Luyag matunaw ni Ariel sa gahum ni Sebastian. Luyag niya mangin-dulaan sa katahum sang pagkatawo ni Sebastian. Luyag man niya kaunon si Sebastian. Tunlon sang bilog. Agud mahimpit sila.Mahiliusa.Mahiliugyon.Mahiliangot.
Nagtulon sang laway si Ariel. Dayon, ginhuluhapulas niya ang buhok sang abyan. Padayon lang si Sebastian sa pagtukar sang langitnon nga tulalay sa organ. Nagpiyong si Sebastian. Amat-amat nga nangalapkap ang mga tudlo ni Ariel sa mala-anghel nga nawong ni Sebastian.
*
Naglibog ang ulo ni Corazon. Magamo ang iya pamensaron.Indi mapahamtang ang iya huna-huna. Indi niya mahangpan kon ngaa indi masambit ni Sebastian ang mga tinaga nga luyag niya mabatian. Madugay na niya nabatyagan. Wala nalipud sa iya ihibalu nga may tinago nga balatyagon si Sebastian para sa iya. Nagahulat lamang sia nga magtanyag si Sebastian sang paghigugma.
Nahangpan niya nga indi palahambal si Sebastian. Nahibaluan niya nga magluwas kay Manong niya Ariel, wala na sang iban pa nga abyan si Sebastian. Apang indi mabaton ni Corazon nga sia pa ang kinahanglan magpangaluyag sa ulitawo. Indi niya mabaton nga sia nga babaye pa ang una magpa-utwas sang paghigugma kay Sebastian. Sin-o gid bala si Sebastian? Indi bala ginapakanubo sia sang bug-os nga Matalinga? Ginatamay?
Dugang pa, nahadlok man si Corazon sa sarang ihambal sang iban. Ilabi na sang iya amay nga sining ulihi nga mga tinuig, nalubong sa utang sa mga Mucho. Halos naubos na ni Don Orestes ang ila manggad sa sugal. Markado na si Corazon nga pambayad sa kautangan. Nagpamat-ud si Corazon. Ginsabat niya ang ginapilit nga paghigugma ni Luis.
Si Luis Mucho, heredero. Solo nga anak. Manunubli sang mga baka. May ipabugal.May ikasarang. Sigurado nga maga-ayuhan ang pangabuhi ni Corazon kon pamanahon niya si Luis. Maga-ayuhan man ang palaabuton sang bug-os niya nga pamilya. Madula ang mga kautangan sang iya amay. Sa pagkamatuod, indi man sia dehado kay Luis. Mabukod si Luis.May hitsura.Mapagrus. Ginahandum sang mga kababainhan.
*
Sa simbahan, liwat nga nasolo ni Ariel si Sebastian. Ginsuguran nga hurikapon ni Sebastian ang organ. Nabuhi ang iya mga tudlo.Nagpirik.Mapagsik ang iya pagtukar apang indi niya mabatian ang musika.Sa baylo, nagadaguob sa iya pamatin-an ang mga ugayong. Mga igot.Mga ingos. Mga gahud sang uhot samtang gina-angkon ni Luis si Corazon sa turil sang mga Mucho. Uhaw si Luis.Dalok.Daw gutom nga sapat. Nagpaayaw sia sa matibsol nga lawas ni Corazon.
Nagdululugo ang mga talinga ni Sebastian. Nag-ilig ang dugo gikan sa iya mga dulunggan. Naglumaw-lumaw ang iya mga mata.Nag-agay ang mga luha. May simbog nga dugo ang mga luha nga nagtulo gikan sa iya mga mata. Nag-ilig sa iya guya.
Ang sugilanon nga “Novie Ondice” ni Peter Solis Nery ginsulat antes pa ang 2004. Nakaangkun man ini sang iban nga tig-ulo kasubong abi “Matalinga.” Para sa iban pa nga sinulatan ni G. Nery, visitahi ang iya website: www.petersolisnery.com. Madamu gid nga salamat.
[/av_textblock]
[/av_one_full]
