MADASIG ang pagsaka sa poder sa national scene sang mga Marcos.
In fact, nangin senador na si Bongbong kag senador man sa karon si Imee. Nagplano na gani si Bongbong agud mangin Vice President ugaling lang kay nalugaw-an ini batok sa balo sang maki-Aquino nga anay DILG Secretary Jess Robredo.
Apang handom gihapon ni Bongbong mag-Presidente sa masunod nga eleksyon, kag daku ang tsansa sini nga matuman ini kon suportahan siya ni Presidente Duterte, nga may impluwensya gihapon bisan wala na ini sa poder, kon indi mapunggan sang mabakud nga kasumpong.
Indi ayhan ining ambisyon sang mga Marcos amo gid ang dulaon ang legasiya sang mga Aquino kon Presidente na si Bongbong?
Kon presidente na si Bongbong, no doubt, lubos na nga madula ang ngalan sang mga Aquino sa madamo nga landmark, katulad sang Ninoy Aquino International Airport, ang matahum nga handumanan sang martyrdom ni Ninoy batok sa martial law regime ni anay Diktador Marcos, kag, labaw sa tanan, ang matahum nga ngalan sini sa mga libro sang kasaysayan sang pungsod nga maligwat pabor sa naulihi kon presidente na si Bongbong.
In fact, amat-amat na nila ini natuman, katulad sang pagpalubong kay Diktador Marcos sa Libingan ng mga Bayani kag ang mga lihok nga dulaon ang ngalan ni Ninoy sa NAIA. Ginapatuman naman gani nila ang a la martial law nga panglagas sa mga kritiko paagi sa kay Presidente Duterte.
Gani, indi naton mabasol ang isa ta ka abyan nga luyag nga liwat magbungguanay ang mga Marcos kag Aquino sa pulitika.
Nagapati gani siya nga ang pagpadalagan lang ni anay Presidente Noynoy Aquino sa pagka-Presidente sa 2022 ang makaupang sining ambisyon ni Bongbong kag mapadayon ang matahum nga ngalan sang mga Aquino.
Ano abe sa inyo?
***
Ngaa kinahanglan ipatuman gihapon ang mga health protocol bisan nabakunahan na batok sa COVID-19?
Panugyan ini sang aton mga health authorities tungod sa posibilidad nga na-infect bag-o nabakunahan, tapos sang pagbakuna samtang wala pa maka-develop ang mga antibodies; kag tungod sa posibilidad nga ma-infect liwat, ukon maka-infect gihapon sang iban.
Ngaa amo sina? Ang ginhatag nila nga paathag amo nga tungod indi pa lubos maseguro kon ano kalawig ang immunity nga mahatag sang antibodies nga na-develop bangod sa bakuna (vaccine) sa kada tawo nga nabakunahan.
Lain-Lain man kuno ang longevity immunity sang kada tawo. Pwede kuno sa sulod sang pila lang ka adlaw, isa ka bulan, tatlo ka bulan, anom ka bulan, isa ka tuig, ukon sobra pa sa isa ka tuig.
In other words, indi pa maseguro sang kada isa kon bala tubtub san-o ang epekto sang immunity nga maangkon nila halin sa bakuna. Gani maniguro anay kita tubtub mahusayan ining problema paagi sa blood analysis sang na-develop nga antibodies, ang T-cells nga naga-develop immediately after infection, kag ang bagay nga trabaho sang immune system signalling molecules.
Kinahanglan man maseguro kon bala neutralizing antibodies ining nakuha sa bakuna nga amo gid ang maaway sa COVID-19. Kon neutralizing antibodies gid man, ma-categorize bala ini sila?
Sa pagtuon sa 164 COVID-19 patients sang mga scientist sa Duke-NUS Medical School sa Singapore na-categorize nila ini sa lima ka grupo.
Ang una nga grupo gintawag nila nga “Negative Group”, nga wala gid nag-develop sang detectable neutralizing antibodies. Mga 11.6% ini sila sang mga pasyente.
“Rapid Waning group”, mga 26.8% sang mga pasyente nga may varying level sang antibodies nga madasig mag-wane, ukon manghina, ang epekto.
“Slow Waning Group”, 29 % nga mostly positive for antibodies sa sulod sang 6 ka bulan.
“Persistent Group, mga 31.7%. Nagpakita ini sang diutay nga pagbaylo tubtub sa 180 ka adlaw.
“Delayed Response Group”, mga 1.8% nga nagpakita sang significante nga pagsaka sang neutralizing antibodies sa late covalescence.
Note, however, nga ining pagtuon ginhimo sa mga pasyente nga ang proteksyon amo lang ang ila natural immunity tungod wala ini sila mabakunahan.
Amo man bala ini nga mga longevity immunity (adaptive) ang mahatag sang antibodies sa nabakunahan?
Kon amo man ini, dapat gid man kita mangamlig gihapon bisan nabakunahan na kay indi pa makaseguro ang kada isa kon ano gid ka lawig nga immunity ang naangkon nila halin sa bakuna./PN
