Halos apat man ka tuig kag nakabugtaw ang DPWH-6 nga wala pa gali napuslan ang ila gintukod nga proyekto nga overpass nga may elevator sa matimbang nga pamusod.
Sa tagsa ka adlaw nga maglabay sila sa Diversion Road, posible ginalikaw nila ila mata agud indi makita ang proyekto, posible man nga nagapiyong agud nga indi mamulalungan ukon nagapulupanguy-ab agud maagaw ang atensyon kag indi magpokus sa proyekto nga gin-ulanan kag gin-initan apang wala pa mapuslan.
Salamat sa singgitan, nakabalikid ang ila dulunggan kag nakapabugtaw sa ila mahamuok nga tulog ang madugay na nga yamo kag katingala sang mga tawo.
Gin-umpisahan ang proyekto sadtong 2014 kag natapos sadtong 2015 kag natigayon ang inagurasyon sadtong Enero 9, 2015 nga gintuyo nga makatayming sa paghiwat sang 2015 Dinagyang Festival.
Tuman ka mahal sang proyekto nga gingastuhan sang Php 19,302,321.00 apang ginhuman lang kag ginpayab-ukan, agud nga may ipakita sa tanan nga nagatuman ang proyekto sa PWD-related laws ukon ang RA 9442 (An Act amending Republic Act No. 7277, otherwise known as the Magna Carta for Disabled Persons, and for other purposes), kag Batas Pambansa Bilang 344 (An Act to Enhance the Mobility of Disabled Persons by Requiring Certain Buildings, Institutions, Establishments and Public Utilities to Install Facilities and Other Devices).
Matam-is sadto ang yuhum kag gimapabugal gid ang proyekto sang nag-inagurar sadto nga si Senator Franklin Drilon kag DPWH-6 Edilberto Tayao kaupod ang mga lokal nga opisyales.
Nagalaba ang proyekto sang 50.235 meter kag nagasangkad sang 3.0 meter nga may duha ka elevator agud indi mabudlayan ang mga senior citizen, persons with disabilities kag mga nagabusong nga kababaihan.
Nagapabilin nga kalong ang nasambit nga handom bangud sa kaluoy sang panahon, wala pa sang may tigulang, sang nagabusong, kag sang PWD nga nakagamit sang overpass.
Nangin tambayan sang magkahagugma, ginhimo nga lugar nga palautwasan paagi sa pagmantenir sa ginabanig nga karton, kag nangin tululugan man sang mga nagalihu-lihu sa dalan.
Sila ang mas labi nga nabuligan sang overpass nga wala napuslan sa angay nga katuyuan.
Tuyo pa gid sang overpass nga mabuhinan ang kagutok sa dalan apang ini ang wala sang katumanan bangud nga wala napuslan. May naaksidente na nga natabu bangud nga wala gingamit sang mga nagatabok. Nangin ilo ang overpass bangud sang may nagaatipan sa matag-adlaw nga tanan.
Karon kay napalamungol sila sa yamo sang mga tawo, nagdaginot ang DPWH-6 sa pagpahayag kag pagpasiguro nga ila hatagan sang atensyon ang proyekto. Nagsugilanon sa city government kag nagproponer sa kon ano ang angay nga pagahimuon agud magamit ang overpass kag ang mga elevator.
Naakabangon na gid man gikan sa mahamuok nga tulog kag pagpalangdamguhanon ang DPWH-6.
Nagsugod na sila depensa, naghabuyanay na sila sang istorya kon ngaa wala natugyan ang proyekto sa city govenrnment nga amo ang magagamit sini.
Mansig plastaranay na sila sang maragtas sang ila naglilipas agud mapangapinan ang kalay-ud sang kada isa.
Kabay nga mahingagaw sang DPWH-6 ang pagproseso agud nga matugyan na sa city government ang pagpagana sini kag agud nga mapuslan na sang pumuluyo ang nasambit nga overpass./PN
