NAGA-agaw na sa atensyon sang kadamuan ang mga naga-inggat nga kasanag sang palibot gikan sa mga bag-o lang takod nga mga Christmas lights.
Indi mahinago ang amat-amat nga pagsanag sang palibot kag ang pagpatimaan nga nagaalipasa na ang tanan nga makasaulog sang paskwa nga ginpit-alan sang duha ka tuig bangud sang pandemya.
Madamo man sang mga establisemyento-komersyal ang nagadekorar na sang ila palibot lakip ang pagpasiga sang mga dalagku kag mataas nga mga Christmas tree.
Madamo sang lagawan subong nga panahon. Apang mas manami pa gid nga aton lantawo kag bisitahon amo ang mga maanyag nga lugar sa syudad sang Iloilo.
Nagsibu lang sa panahon ang pagdekorar may kaantanan sa paskwa apang angay man nga talupangdon ang kaanyag sang syudad nga ginbag-o sang panahon.
Masaku kita sa tagsa ka adlaw kag normal nga sitwasyon aton makita, kon kaisa indi naton matalupangdan ang kinatuhay sa karon kag sang nagligad bangud okupado ang aton pinsar, puno sang palaligban kag mga dapat mga himuon. Indi naton masiplatan ang mga maanyag nga bagay kag lugar kon indi naton paghatag sang pokus kag tion. Kinahanglan naton nga pagpain sang tion agud nga maapresyar ang kaanyag sang syudad sang Iloilo.
asami naton makita ang mga mall, mga bag-o nga edipisyo kag mga istruktura nga ginakay-o ukon bag-o nga mga ginatukod nga proyekto. Tanan ng aini makita naton sa bulig sang masanag nga adlaw.
Tion naman nga maglagaw kita sa tion sang gab-i, sa masulhay nga lakat sang trapiko, sa huyop sang mabugnaw nga hangin kag sa landong sang kaanyag sang mga doog nga ginabuyagyag sang mga mahuyaon nga iwag.
Nahatagan ako sang higayon sang Iloilo City Tourism and Development Office nga makaupod sa night tour nga isa sa ginaduso nga tourism product sang syudad. Ginpadulungan namon ang mga masami nga ginakadtuan sang tawo kaangay sang Iloilo City Hall apang mas manami ang dagway sini kon gab-i, mas makagalanyat ang yuhom sang kasanag. Nagdugang pa sa kaanyag ang manami nga Plaza Libertad. Indi mo tuod makita ang tuhay nga dagway kon indi mo paghungdon kag lantawon sa tion sang kagab-ihon.
Nagkadto man kami sa Esplanade, sa Jaro Plaza, sa Molo Plaza, kag sa Smallville complex. Luyag lamang hatagan sang ICTDO sang importansya ang tuhay nga dagway sang syudad nga makita kon gab-i.
Madamo kita sang mga bisita nga nagahiwat sang seminar kag pagtililipon sa syudad sang Iloilo kag kinahanglan naton sila nga giyahan kon ano ang angay nila nga lantawon kon gab-i, sa tion nga nagahangaw-hangaw na sila nga luyag magpa-relax matapos ang taguri nga pagpakigbahin sa ila aktibidades.
Kon kaisa, wala sila sang higayon nga makalagaw sa adlaw bangud masaku sa ila aktibidades gani angay lang nga may opsyon kita nga ihatag kag makapadulong sila sa mga lugar nga ginapabugal nga hilway sa katalagman kag makadayaw sa kaanyag sang doog nga ila ginkadtuan.
Nakita ko ang maayo nga tinutuyo sang ICTDO. Dapat mangin mapuslanon ang pagpadulong diri sang mga bisita, sa adlaw man ukon sa gab-i, kag dapat ihatag naton ang pwede naton matan-ay sa ila nga wala sang sablag sa oras.
Kahibalo kita nga kon gab-i, masami nga ginatan-ay ang mga lugar nga may kalingawan, ang may makahulubog nga ilimnon kag may kanta ukon sonata. Indi ini madula kag indi malikawan, apang may mga tawo nga tuhay ang ila kalingawan. Diri nagasulog ang in inga tourism product nga amo ang Iloilo City Night Tour.
Matuod nga kadamo sa aton ang wala pa nakalagaw sa syudad kon gab-i nagadali nga magpauli kag makapahuway. Kinahanglan nga magpain man kita sang isa ka gab-i agud nga maglibot sa syudad, updon ang bug-os nga pmilya, mga abyan kag mga barkada.
Buligan naton nga maglapnag sa katawhan ang ini nga ginatuyo sang ICTDO sa pagpamuno ni Iloilo City Tourism Officer Junel Ann Divinagracia.
Pa-inggaton naton ang gab-i sang syudad paagi sa aton pagbuligay kag pagsakdag. Ipadayon naton ang kasanag paagi sa aton nagadabdab nga bugal bilang mga Ilonggo.
Umpisahan naton ang paglagaw sa sini nga paskwa. Ibalhag ang kaanyag sang doog sa social media. Ipaambit sa iban ang inyo eksperyensya. Ganyaton naton sila nga magpadulong man sa sini nga mga lugar agud sila man mismo ang makapanugiron sang ila memorable nga pagbisita sa mga lugar nga ginapabugal. (bertladera@gmail.com/PN)
