MAGATAKOP na sa Abril 30, 2020 ang ginhatag nga 75 ka adlaw nga pagpanghawan sa mga dalan apang may 46 pa ka mga barangay ang napaslawan sa karon nga matuman ang memorandum sang Department of Interior and Local Government.
May bastante pa sila nga panahon agud nga maghulag kag tinguhaan nga matuman ang mandu agud nga indi mabutang sa alang-alang ang ila pagka-opisyal sa ila barangay, ilabi na kon makasuhan na sila sang kaso administratibo bangud sa kapaslawan sa pagtuman sa ginamandu sa ila.
Sa karon, 139 sa kabug-usan nga 180 ka barangay ang napaidalom sa evaluation sang DILG validation team nga ginatapuan sang mga tiglawas gikan sa PNP, BFP, PSTMO kag senior citizens bilang mga katapo.
Kadamuan sa mga barangay ang wala sang napasad kag naaprubahan nga ordinansa tuhoy sa ‘no parking’ ukon ang pagtumod sa mga lugar ukon alagyan nga indi angay nga parkingan sang mga salakyan.
May mga opisyales sang barangay nga nagalikaw sa ila katungdanan, may mga nagapabaya kag ang iban nagapiyong kag indi makakita sa mga salawayon sa ila lugar.
Matakus naton ang ila sensiridad sa pagserbisyo kon matuman nila ang ginamandu sa ila. Dapat mag-akto sila, magtuman, kag ipakita nga nagahimakas sila sa pagsunod sa mandu antes sila magreklamo nga nabudlayan sila, ginayamuhat sila ukon wala natahap ukon wala nagasunod ang ila mga sinakpan sa ila lugar.
Matuod nga may mga tawo sa barangay nga matig-a ang ulo, kaangay nga may ginasandigan, kag nagapakita sang ila pagkapoderoso.
May mga tawo nga bisan makapila na sawayon apang matinggilan sa gihapon, wala sang patugsiling sa mga otoridad, kag wala sang handom nga magtuman sa mga patakaran.
Hatagi ninyo ako sang higayon nga ibungat ang akon punto sa sini nga palaligban paagi sa pagpanugyan sa mga barangay official nga pangayo kamo sang giya sa DILG kon ano ang angay nga buhaton kag dapat ninyo ini sundon.
Pagkatapos nga matuman ninyo kag matig-a sa gihapon ang ulo sang iban nga tawo sa inyo barangay, balik kamo sa DILG kon ano pa gid ang mangin legal nga tikang agud nga mapasunod inyo sila sa ordinansa sang barangay.
Talana kamo sang adlaw nga makasugilanon sa mga nagapasaway, mahimo kamo makapadulong sa ila puluy-an, agud nga ipaathag sa ila ang ila katungdanan.
Kinahanglan nga mangin mahugod kamo sa sini nga higayon agud nga mangin epektibo ang inyo kampanya kag pagtuman sa memorandum sang DILG.
Pangayuan ninyo sila sang ila kakomitido kag kon ano ang ila mabulig sa inyo ginaabaga nga katungdanan. Sa sini nga paagi, mangin kabahin sila sa solusyon sang problema sa barangay.
Indi naton madala sa pwersa ang aton pumuluyo, kinahanglan naton sang nagaynay nag paghingyo, pahumukon naton sila paagi sa kalmante nga pag-istorya.
Kaangay sang tubig nga naga-ilig, ang dalagku nga bato, iya ginapahumok, ginalusot, tubtub nga sa iya destinasyon makalab-ot.
Makahangop ang mga tawo, ilabi na ang mga edukado sa katuyuan sang barangay. Maathag man nga sila ang may ikasarang sa pag-angkon sang mga salakyan nga amo ang nagaparking sa kilid sang dalan.
Kon masami ginakadtuan sang bug-os nga pwersa sang mga barangay official ang balay sang isa ka pamilya, makabatyag man ina sila sang kahuya kag nagahimulso sa ila kasilingan kon may yara sang itugda batok sa ila.
Kinahanglan ang determinasyon, ang kahugod, kag ang epektibo nga istratehiya agud nga mapaambit sa katungdanan sang barangay ang mga pumuluyo. (bertladera@gmail.com/PN)
