Paano ma-enjoy sang taga-siyudad ang mag-tourist visit sa kaumhan (Ika-3 nga Bahin)

UNAHAN ta anay ang Ika-3 nga Bahin sang nasugdan naton nga panugdaon sa plano nga farm tourism (agritourism) sang probinsya sang Iloilo.

Luyag ta anay tugdaan ang resolusyon ni Senator Riza Hontiveros nga ipasaka sa United Nations ang aton reklamo sa padayon nga pang-harass sang China sa West Philippine Sea.

Indi kita upod sa sina nga ideya. Sa akon pagpati mas magadalom lang ang problema naton dira sa WPS kon aksyunan ini sang United Nations.

Nasegurado naton nga kon pasugtan ini sang UN basi magdabok pa ini sang nagakontrahanay nga daan nga mga ideolohiya sang mga myembro.

Kag, who knows, basi makadto na gid lang ini sa gyera sang walanaga-intiendihanay nga mga pungsod kag maglamita pa sang bug-os nga kalibutan. And, who knows, basi maentra na ang mga nuclear powers kag, sa hungod man ukon indi, makadto ini sa nuclear war. Nga dapat naton kahadlukan!

Gani indi kita magpadalos-dalos. Mas maayo seguro nga pasugtan ta lang anay ang China sa masami ginaduso sini nga “bilateral talk” sa tunga nila sang Filipinas kon paano matigayon ang peaceful nga paghusay sang problema sa WPS.

In fact, segurado man naton nga may mahisugtan gid man sila sa ngalan sang peaceful kag fruitful nga relasyon sa tunga nila kag para man sa kalinongan sang kalibutan.

Atubangon ta bala anay inang “bilateral talk” upod sa China, kag kon indi gid man ini matigayon, may maisip pa man kita seguro nga bag-o nga ideya nga mahisugtan nga indi mahulog sa kinagamo.

Siling gani sang kanta ni Meriam Bellina: “One day at a time”. Siling naman sang Bibliya: “Indi magkabalaka sa problema sang buas,  salig lang sa Diyos kay may sabat Siya dira sa kada adlaw nga magaabot.”

***

Padayon na kita sa Ika-3 nga Bahin sang aton panugdaon sa plano para sa farm tourism sang probinsya sang Iloilo.

Sa nasiling ta na sa Ika-2 nga Bahin, wala pa maghulag ang tiyo ko sa pakaduha bisan naghingagaw na pauli ang una nga sakay kag kami na lang ang nabilin sa tunga sang malapad kag nagakaakig na nga kalalawran. 

Kinulbaan ako matuod, nga natural man lang sa tawo,  pero handa kon ano man ang matabo.

 Indi bag-o sa akon ang mabutang sa peligro sa lawod. Halin ako sa pamilya nga sakayanon kag ordinaryo lang sa amon ang ma-risgo nga trabaho sa lawod.

Sa bahin lang sang akon amay, ang amay ko sadto nakatrabaho man sa isa ka international vessel. Anom sa iya mga apo kag isa ka umagad nakatrabaho, ukon nagatrabaho pa, diri. Duha ang nangin Ship Captain, isa ang Chief Marine Engineer, duha mga subordinate marine engineer, kag isa ang subordinate deck officer.

Sa amon baryo sa Guimaras madamo man sa ila ang mga mananagat, kon wala nagadala sang kargamento kag pasahero pakadto sa siyudad sang Iloilo gamit ang de-bela kag motorized banca.

Kasubong man ang mga trabaho sang madamo ko nga mga himata sa bahin sang amon lola nga taga-Nueva Valencia.

In fact, bag-o ako nagbalik sa pag-eskwela didto na sa University of Iloilo nakatrabaho ako sa isa ka inter-island vessel bilang traveling freight clerk. Na-assign ako sa puerto sang Manila dayon sakay sa barko pakadto sa Bacolod kag Iloilo City, kag pabalik naman sa Manila.

Kis-a sa isa ka byahe halin Manila pakadto sa Bacolod naka-enkwentro kami sing malain nga panahon sa tunga-tunga sang Masbate kag Bohol. Mga tungang gabi-I na ato.

Naga-giwang-giwang na ang amon lakat kag naga-ulwak na ang balod pasulod sa barko nga nagpakulba sa mga pasahero. Gani nag-desidir ang kapitan nga maghingagaw kami panago sa Bohol Port kag ugaling nagpadayon sa Bacolod sa kaagahon. Sang mag-abot kami sa Banago Port, madamo nga mga tawo ang nagsugata sa amon sa pantalan. Makita sa ila nawong ang pagpasalamat nga nakaabot na gid man kami.

***

Balik kita sa bagyo nga nag-abot sa amon sa lawod. Indi ko na maaninaw ang una nga sakay nga nagpauli sang mag-desidir na ang akon tiyo nga magbatak na sing pondo kag layag agud magpauli. Samtang sige na waswas ang hangin kag balod upod ang mabunok nga ulan.

Problema kay isa lang ako sa timbangon nga dapat duha tani. Bordahe ang amon lakat pauli. Ginabanta lang sang tiyo ko ang pagsulod sang hangin sa layag kag lakat sang balod agud indi kami magkulob. Hugot ako nga nagakapyot sa banting dala ang todo pangamuyo nga tani indi ini mabugto kag ihaboy ako sa lawod. (May kasugpon)/PN