GINADALA naton sa sini nga kolum ang isa ka panugyan sang isa ka London-based nurse kon paano malikawan ang peligro sa “serious allergic reaction” sa pagpabakuna batok sa COVID-19.
Ini nga panugyan iya sang isa ka Filipino nurse nga naga-ubra sa London, United Kingdom nga nakatapos na sang duha ka dose sang Pfizer/bioNTech vaccine.
Ining London-based nurse amo si Raymond Padilla, nga sadto isa ka reporter sang Panay News nga nagpa-abenturar sang ulihi sa pagtrabaho sa London.
Una siya nag-ubra diri sa isa ka publishing company nga naggamit sang iya ihibalo sa reporting kag copywriting tubtub nga nagdesidir siya sa pagtuon kag magtapos sang pagka-nurse dira mismo sa London.
Sa karon nagapuyo si Nurse Padilla upod sang iya Filipina nga asawa kag dalagita nga anak sa London kon diin nagatrabaho siya sa isa ka ospital diri.
***
“Safe!” ang matigda niya nga sabat paagi sa messenger sa aton pamangkot sa iya sadtong Marso 4, 2021 parti sa kon ano man ang iya experyensya sa pagpabakuna.
Kon may problema man, dugang niya, amo man lang ang pagpanakit sang butkon niya sa bahin nga gin-iniksyunan nga nadula man pagkatapos sang duha ka adlaw. “And that’s it,” ang pamat-ud gani niya.
Ari ang lubos nga pahayag ni Nurse Raymond sa iya sabat (unedited) sa aton pamangkot sa iya via messenger sadtong Marso 4, 2021:
“Safe. Had a sore upper arm for like two days but that’s it. Some have headache, others down with flu-like symptoms but these symptoms were all gone after two days. But then I had Pfizer and most of my friends. Astra Zeneca is also good, also the same symptoms, efficacy though was not as good as Pfizer. Sinovac? I can’t say anything about it as it has not reached the UK yet. Go for Astra Zeneca.”
***
Sunu kay Nurse Raymond, ang tanan nga vaccine may mga adverse effects nga ma-experyensyahan ang nabakunahan. Ang ining mga adverse effects nagakatabo gid man. Nagapahibalo ini sa lawas sang nabakunahan nga nagasugod na sa pagtrabaho ang vaccine agud bugtawon ang immune system sa paghimo sang mga antibodies agud awayon ang nakasulod nga COVID-19 virus.
Ang iban nga adverse effects, katulad sang hilanat kag palanakit sa bahin sang butkon nga na-indyeksyunan, normal lang ini nga indi dapat hadlukan, siling ni Nurse Padilla. Ang iban ugaling pwede magdala sing peligro sa nabakunahan, katulad sang “serious allergic reaction” sa pila ka ingrediente sang bakuna.
Angot diri, ginapanugyan niya sa mga may pangduha-duha sa ila ikaayong lawas kon magpabakuna nga makigkita gid sa clinician ukon doktor agud maseguro kon bala pwede sila magpabakuna ukon indi.
***
Nagsugod ang pangbakuna sa Unitd Kingdom sadtong Disyembre 3, 2020 kon san-o natagaan na sing emergency authorization (Emergency Use Authorization) ang Pfizer/bioNTech.
Ang Oxford-AstraZeneca vaccine natagaan sang EUA sadtong Disyembre 30, 2020, samtang ang Moderna natagaan sing otorisasyon sadtong Enero 8, 2021 nga nagsugod man dayon sa pag-administer sang ila vaccine diri sa United Kingdom.
As of February 28, 2021, mga 20,089,551 na ang naka-first dose kag 796,000 ang naka-second dose sang either Oxford – AstraZeneca or sang Pfizer – BioNTech vaccine sa kabug-usan sang UK. Gina-expect sang gobyerno nga mabakunahan ang mga 32 ka milyon ka mga pumuluyo sa UK sa pag-abot sang Abril 15, 2021.
Ang United Kingdom may populasyon nga 68,131,084, sunu sa latest United Nations data sadtong Marso 10, 2021.
Ginaamat-amat naman gani seguro nga ginahikot na sa UK ang blood testing (serology) agud ma-confirm kon ano ka damu ang aktwal nga na-immunize sa mga nabakunahan kag kon tubtub ano kalawig ang ila immunity nga naangkon halin sa ila pagpabakuna.
Tungod wala man sing 100 % nga “effectiveness” ang bakuna, indi lang kita matingala nga may na-infect sang COVID-19 bisan tapos nabakunahan na.
Sa ulihi nga report sa Israel, ang Pfizer/bioNTech vaccine ginsiling nga may “effectiveness” nga 46% sa una nga dose, kag 92% sa ikaduha kag final nga dose. May 95% efficacy ini sa pagtuon sa laboratoryo./PN
