NAGPINAMANGKUTANAY ang madamo sang naglapta ang text messaage halin kay Cong. Jerry Treñas nga nagapanugiron nga ginapautdan na ni Mayor Jose Espinosa III sang kuryente ang iya talatapan.
Siling ni Treñas nakabaton sang notice ang Panay Electric Company (PECO) gikan kay Mayor Joe nga ginapautdan ang power sa iya opisina.
Dugang pa sang kongresista nagahimo sya sang arrangements agud bayaran sang personal ang kuryente agud indi maapektuhan ang serbisyo sang iya opisina.
Ang pamangkot: Diin na ang budget sang opisina sang kongresista? Ngaa personal niya nga bayaran ang bill?Wala ya budget ang opis ni Cong. halin sa gobyerno?
Siling ni retired Department of Budget and Management regional director Alfonso Bedonia, “Ang budget sa office sang kada congressman gina-allocate sang leadership sa House – naka-lump na sya for each congressman. So depende sa congressman concerned how to allocate the budget for his office. Wala man problema kon ang isa ka local government unit mag-allocate out of its budget for the operation of the congressman’s office – but that is optional.”
Base sa pahayag ni Bedonia, pat-ud nga may budget ang tagsa ka congressional office gikan sa national government. Ginapainan dapat sang tagsa ka kongresista ang mga balayran kaangay sang bill sang kuryente, tubig, empliyado, janitorial kag kun ano pa nga kagastuhanan.
Pila ka bulan na ang nakaligad, gin-recall man ni Mayor Joe ang pila ka regular kag job hire employees assigned sa opisina ni Treñas. Isa sa ila diri assistant department head pa. Ang syudad ang nagasweldo sa ila.
Mag-amo sini, ano ang ginagastuhan ni Cong. sang iya local allocation sa iya opisina? Ngaa kinahanglan nya nga bayran personal ang bill sang kuryente sa iya opisina? Wala bala sya ginahatagan sang liderato sang Kamara sang pondo?
Madamo ang nagasiling nga politika ang rason kun ngaa ginapautod ni Mayor Joe ang kuryente sa opisina sang City Agriculturist kag madala ang opisina ni Treñas. May politika man ukon wala, maathag nga husto ang lihok sang alkalde bangud paano nya bayaran ang kuryente sa opisina nga wala na sang opisina nga iya sang city hall.
Pamangkuton lang naton si Cong.: Wala ka ya budget para sa imo opisina? Diin na ang alokasyon sa imo sang House leadership? ‘Di bala nga kada bulan gina-submit ang budgetary requirements sang tagsa ka congressional office?
Ayhan, kinahanglan ni Cong. nga magpaathag sa publiko! (jpranco1975@gmail.com/PN)
