GINATILAWAN gid sang mga motorista kag mga vendor ang kalawig sang pasensya kag pahanunot sang gobyerno sang syudad.
Mas masupog sila sa sini nga panahon sang Paskwa sa pagpati nga pasensyahon sila sang gobyerno kag nagapati sila nga hangpon sila sang gobyerno rason nga ila ginatilawan nga magtungtong sa kurit nga nagatunga sa pwede kag indi pwede nga mga patakaran.
Nahangpan naton nga mabudlay gid bag-uhon ang naandan nga gawi kag paminsaron sang mga tawo, ilabi na nga nagpanalunton na ini sang tuman ka dalom, ginpapag-on sang malawig nga dinag-on rason nga mabudlay gabuton sa ila naturalisa, sa ila hulag, sa ila pinsar, kag sa ila balatyagon.
Apang, ang tanan nga kinaandan nagaligwat, ginabag-o sang panahon, nagabag-o sa sugo sang sirkumstansya, ginabag-o santu sa benepisyo sang mas madamo.
Dapat indi magkataka ang city government sa pagpaalinton sa tanan tuhoy sa mga bagay nga luyag sini bag-uhon sa sosyudad, sa mga patakaran nga luyag sini tumanon sang kadamuan, kag sa mga polisiya nga dapat updan sang mga tawo sa nasakpan sang syudad sang Iloilo.
Kadungan sang pagpalapnag sang impormasyon, nga dapat himuon sing masunson, ang pagpabatyag nga seryoso ang syudad sa iya katuyuan. Dapat nga penahan ang dapat mapenahan. Dapat manabat ang dapat manabat. Dapat may multa ang mga wala nagatuman.
Kon indi madudla ang mga tawo sa kasaypanan nga ila ginahimo, wala sang lauman nga pagbag-o sa gawi sang tawo. Indi magtadlong ang direksyon sang ila paminsaron kag balatyagon. Padayon sila nga magakomiter sang sala sa pagpati nga sila ang pagapasensyahon sa tagsa ka tion.
Dapat madudla ang mga tawo agud nga mapatudok sa ila kag mangin leksyon para sa iban nga wala sang ginapasin-o ang gobyerno sa pagpatuman sang kasuguan kag mga patakaran.
Dapat madudla ang mga tawo paagi sa pag-abaga sa konsekwensya sang ila paglapas nga nahimo. Ini ang magapukaw sa ila sensibilidad agud nga mas mangin mahinalungon sa pagtuman sa mga patakaran.
Kon makita sang mga tawo nga mahuyang ang law enforcement sang syudad, sa pagpanguna sang Public Safety and Transportation Management Office (PSTMO), padayon nga tilawan sang tawo kon diin kutob ang unyat sang pahanunot sang nagapatuman sang kasuguan.
Kon lunsay tinaga kag wala sang tupa ang mga ginahimo sang PSTMO, padayon nga magapadungol ang tawo. Apang kon i-unyaton sini ang iya nga kusog kag ipabatyag ang iya kasupog sa pagtindog sa iya katungdanan kag pagpatuman sang kasuguan, lauman naton ang mas radikal nga pagbag-o sa akto sang mga vendor kag motorista.
Indi naton mabatas nga lantawon lang ang mga porsyon sang dalan nga may nakasulat nga ‘no parking’ kag ‘towing zone’ nga may madamo nga salakyan nga naga-park.
Insulto para sa city government ang mga tawo nga nagabalik sa sidewalk kag nagabaligya. Mismo ang Department of Interior and Local Government na ang nagmuno kag nakamutik sa sini nga sitwasyon.
Lauman naton ang mas malala nga senaryo samtang nagahilapit pa ang paskwa kag bag-ong tuig.
Kon mabatyagan sang mga vendor kag mga motorista nga wala sang ikasarang ang syudad sang Iloilo, ilabi na ang PSTMO, sila ang padayon kag liwat-liwat nga magalapas kag maga-insulto sa syudad.
Luyag naton makita kag mabatian si Jeck Conlu nga seryoso kag determinado sa iya katungdanan nga wala nagakalingkang sa pagpatuman sang mga polisiya kag kasuguan. (bertladera@gmail.com/PN)
