PINASAHI ang Sangguniang Panlalawigan sang Iloilo sa pagpamuno ni Vice Governor Christine “Tingting” Garin tungod nga mas plastado kag mas preparado ang ila ginapasar nga mga ordinansa para sa benepisyo sang mga Ilonggo nga overseas Filipino worker.
Makabig nga mas abanse sa pagpaminsar ang mga katapo sang Iloilo Provincial Board sa kon ano ang mangin kahimtangan sang mga OFW didto sa luwas sang pungsod sa kon ano man ang mga nagakahinabu didto, nga kon kaisa indi mapulong ukon wala ginalauman.
Ginapaminsar sang mga Sangguniang Panlalawigan kon ano nga mga ordinansa ang dapat nga ipasar para mabuligan ang mga OFW kon paano sila mapakig-angutan sa pungsod nga ila gina-obrahan ukon ginateniran, kon paano sila makuha sa peligroso nga sitwasyon, kag kon paano sila mapapauli sa ila tagsa ka puluy-an.
Ginapangitaan man sang solusyon kon paano mapakampante ang buot sang ila mga himata nga nagakabalaka sa ila kahimtangan kaangay sa nagakatabu nga away sa tunga sang Israel kag Hamas, kag lakip ang pagdugang sang problema sa tunga sang Israel kag Hezbollah.
Naghatag sang ideya sa ila ang natabu sadto sa Syria sang tuig 2019 kag diri ginbun-ag ang konsepto nga dapat buligan ang mga Ilonggo. May gindihon nga Executive Order tuhoy sa “Bulig Ilonggo” sa sina nga pnahon kon sa diin Acting Governor si Vice Governor Christine “Tingting” Garin kag Acting Vice Governor sadto si 4th District Senior Board Member Rolando Distura.
Gin-amat-amat pasad ni Board Member Distura ang Provincial Ordinance No. 2020-219 ukon “An Ordinance For The Creation And Institutionalization Of The Iloilo Provincial Overseas Filipinos Migration, And Development Center Under The Iloilo Provincial Public Employment Service Office (PESO), Defining Its Powers, Functions, And Appropriating Funds Therefore” nga naaprubahan sang August 30, 2022.
Tungod sa serye sang committee hearing, ilabi na nga may gintuga nga Iloilo Overseas Filipino Migration Development Center ukon OFMD, nangin madugay ang pagtalakay antes naaprubahan. Apang, sa karon ini na ang nagasapupo sa mga OFW kag sa tagsa ka may hitabu sa iban nga pungsod, gilayon nga naga-akto ang opisina kag naga-atipan sa mga OFW.
Nahibaluan nga author kag sponsor sang ordinansa si Distura kag ang co-sponsors amo sanday Board Members Matt Palabrica, Dorothy Paes kag Domingo Oso, Jr.
Sa nasiling na, ang talatapan amo ang magatatap sa mga Ilonggo nga OFW ukon migrant. Nagakabalakala ini sa ila kag nagadihon sang programa para sa ila. May tuigan nga badyet para sa sini nga opisina, may nagaatipan, may telepono para sa national kag international direct dialling agud makapakig-angot sa mga national government agencies kag mga embahada didto sa iban nga mga pungsod.
Ang mga himata diri sa probinsya gikan sa kabanwahanan may yara gid sang padulungan nga talatapan sa kapitolyo agud nga indi na sila magtalang-talang sa pagpangita sang bulig para sa ila mga pamilya nga didto nagatrabaho sa iban nga pungsod.
Sang damlag lang, nagpasar man si Vice Governor Christine “Tingting” Garin sang Provincial Ordinance No. 2023-305 ukon “An Ordinance Establishing The Scholarship Program In The Province Of Iloilo For The Children Of Overseas Filipino Workers (OFWs) Who Are In Crisis Situations And Appropriating Funds Thereof” nga gin-co-sponsor nanday 4th District Board Member Rolando Distura kag 3rd District Board Member Jason Gonzales.
Nagapati ang fuha ka co-sponsor nga manami ang ordinansa kag makapabakod sa OFMD Center sang probinsya sang Iloilo.
Bangud sa nagakatabu sa Israel kag Hamas, ginaduso sa Kongreso nga magpasar sang kasuguan nga hatagan sang scholarship ang mga kabataan sang mga OFW nga apektado didto.
Nagapaminsar pa lang sila sa Kongreso, may ordinansa na sa Probinsya sang Iloilo nga ginpasar sang 14th SP sa pagpamuno ni Vice Governor Christine “Tingting” Garin.
Magluwas sa una ka duha ka ordinansa, may napasar man sila sadtong panahon sang pandemya nga ginakabig nga pinakauna nga ordinansa sa bug-os nga pungsod nga amo ang Provincial Ordinance No. 2020-242 ukon “An Ordinance Implementing The Expanded Micro Business Recovery Assistance During Crisis And Emergency (Embrace) Program”.
Ang EMBRACE Program magabulig naman sa mga OFW agud nga makapanugod sang ila negosyo diri sa probinsya sang Iloilo matapos nga nawad-an sang trabaho sa pungsod nga ila ginpadulungan tungod sa mga sikumstansya.
Ginpahayag ni 4th District Board Member Rolando Distura nga ang 15 million pesos amo ang initial fund nga mahimo na ma-avail sang mga OFW nga nawad-an sang trabaho sa luwas kag nagpauli diri sa Iloilo kag sa mga magagmay nga negosyante nga nagsarado ang ila negosyo bangud sa pandemya.
Ginsiling sini nga mahimo makahulam sang 20 mil pesos tubtub 100 mil pesos nga may 3 percent lang nga processing fee ukon service fee kag ang first payment sini makalipas pa ang anum ka bulan matapos naaprubahan ang loan.
Diri makita kon paano ginahatagan sang igtalupangod sang Iloilo Provincial Government ang mga Ilonggo nga OFW nga ginapatihan sini nga mga bag-o nga baganihan.
Sa ano man nga kahimtangan ukon sitwasyon nga madangatan, indi malipat ang mga Ilonggo OFW nga ang Sangguniang Panlalawigan sang Iloilo sa pagpanguna ni Vice Governor Christine “Tingting” Garin naga-ulikid, naga-amlig, kag nagakabalaka gid sa ila. (bertladera@gmail.com/PN)
