[av_textblock size=” font_color=” color=” av-desktop-hide=” av-medium-hide=” av-small-hide=” av-mini-hide=” av-medium-font-size=” av-small-font-size=” av-mini-font-size=”]
[/av_textblock]
[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PAGBALIKID SA 2017′ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”][/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
Naganami kag naganami na gid lamang ang dalagan sang akon kabuhi.
Ini bangud ang tagsa ko ka lihuk, ang tagsa ko ka hulag, maayo ang tinutuyu.
Ang tagsa ko ka handum, ang tagsa ko ka ginalauman, para sa akon kalipayan, kag sa katawhayan sang kalibutan. Kag kon magsampuk man ang akon kalipayan kag katawhayan sang kalibutan, ginapili ko ang akon kalipayan.
Sa tuig 2017, indi magnubu sa cuarenta y siete ka airport, kag treinta y nueve ka estacion sang train, ang akon gin-agihan. Ginlibut ko ang Europa sa una nga tion, kag nangin malipayun ako, dugang pa nga nagsangkad ang akon panghunahuna, kag pagkilala sang katawhan.
Indi tanan maayo sa mga viaje nga ini. Nakawatan ako sa Florence, Italy. Kag nagsuka ako sang dugo sa Prague, Czech Republic. Abi ko, mapatay na ako sa Vienna, Austria.
Apang yari, kag buhi gihapun ako. Mas maisug, mas maalam, mas mapinasalamatun sa mga bugay nga nagaabut sa akon sa matag-adlaw.
Sang ginpickpocket ako sa Florence, daw ginbubuan ako sang ice cold water. $800 nga cash ang nadula. Kag nadalasa ang akon Eurail Global Pass, ang akon ticket sa mga trains sang Europe, nga nagavalor sang $1,200. May mga euros pa (cuarta sang kadam-an nga pungsod sang Europa) nga wala ko naisipan. $2,000 ukon P103,000 ang nadula sa akon.
Siempre, naghibi man ako. Noviembre 11 pa lang sadto, kag plano ko nga libutun ang Europa tubtub Noviembre 30. Ano ang buhatun ko? Mauntat na lang, kag magpauli sa America?
Apang nagpasalamat ako nga wala nadalasa ang passport kag mga credit cards ko. Kag pagkatapus sang anum ka horas nga paghibi, namat-ud ako nga indi makawat sa akon ang akon dungan, kag ang kaisug nga magpadayun.
Kabigun ko nga daku nga kapierdehan kon mag-untat ako sa akon buku nga libutun ang Europa. Gani, nagbakal ako liwat sang $600 nga Eurail ticket para sa nabilin nga catorce dias. Kag nagpadayun sa Germany, Denmark, Sweden, Norway, Netherlands, Belgium, kag Switzerland, bag-u magbalik sa Italy.
Didto sa Austria, abi ko, mapatay na ako kay nagsuka ako sang dugo. Madamu nga dugo. Bisan pa may panagupnup ako nga may napilas lang ako nga blood vessel sa tutunlan, ginkulbaan man ako kay wala untat ang pagdugo, ilabi na kon nagaubu ako.
Halin sa Italy pakadtu sa Hungary, may sorethroat na nga daan ako. Dayon, sa Czech Republic, nagsugud ang pagsuka ko sang dugo. Nagtener ako sa Prague sang isa pa ka adlaw tubtub daw madala ko na ang akon pamatyag. Nagpa-Slovakia ako, kag nagkadtu sa Austria.
Didto sa Austria, sa Vienna, nagsukmat liwat ang pagsuka sang dugo. Kag didto ako nakabatyag nga daw mapatay na gid ako. Ayhan, kon natulugan ako, nadayunan gid ako. Apang sadto nga gab-i, wala ako nagtulug, kag wala nag-untat sa pagpangamuyu.
Sa pagkamatuud, wala ako nangayu nga palawigun pa ang akon kabuhi. Kundi nangamuyu ako nga bantayan kag ubayan, kag amligan sang Dios, ang akon balu nga iloy, mga utod kag mga hinablos, mga himata, ang akon mga abyan, kag tanan sila nga ginpalangga ko.
Ang akon natun-an sang daw mapatay na ako: Handa na ako magtaliwan sa kalibutan nga ini. Nahatag ko na, kag napaambit, ang luyag ko ihatag kag ipaambit. Kon may idugang pa nga tinion sa akon kabuhi, amu man gihapun ang luyag ko himuun.
Kag ang akon pangamuyu sa ulihi ko nga mga tinion, subung man sang ginapangamuyu ko sa adlaw-adlaw.
Wala pa natapus ang akon kabuhi. Apang handa na ako. Wala ako sing daku nga ginahinulsulan. Nangin malipayun ako, kag nangin mabinungahun ang akon kabuhi!/PB
[/av_textblock]
[/av_one_full]
