TUMAN ka daku nga palaligban ang mag-atubang sa pandemya dala sang corona virus disease 2019 ukon mas kilala bilang COVID-19.
Nagasaramihay na kita sa pagpangita sang kwarta agud nga may igasto sa mga nagapanguna naton nga kinahanglanon sa panimalay. Ginapasulabi naton ang pagkaon. ang tubig kag kuryente, ang medisina kag mga nagapanguna kag importante nga bagay nga kaupod sa aton pagginawi.
Mabudlay bangud apektado ang income sang kada isa. May mga nawad-an sang trabaho nga indi na makahatag sang kantidad nga ginasaligan sa ila panimalay. May mga na-istranded sa iban nga lugar nga ang ila kwarta ang ginagasto nila sa matag-adlaw nga pagsinarayo tubtub nga makapauli sa ila mga puluy-an.
May mga nagatrabaho apang ang income ang indi na supisyente bangud madamo sang iya katimbang sa panimalay ang indi na makabulig kag ginahanglan man nga buligan agud nga makalampuwas sa matag-adlaw nga pag-atubang sa sitwasyon sang pangabuhi.
Nagdugang pa diri ang palaligban sa balayran sa kuryente nga kon mautdan sang koneksyon mangin mabudlay ang pagsinarayo sa sulod sang balay.
Madamo sang mga pumuluyo sa probinsya sang Iloilo ang nagreklamo tuhoy sa hinali nga pagsaka sang ila electric bill ukon balayran sa kuryente kag nagakahangawa nga basi mautdan sila sang linya bangud kabus ang ila ibugbayad ilabi na nga puraot ang sitwasyon.
Bangud sa sini nga reklamo nga naglanog sa bug-os nga probinsya sang Iloilo, nakalab-ot ini sa igtalupangod sang mga katapo sang Sangguniang Panlalawigan sang Iloilo.
Gin-aktuhan paagi sa pagpasar sang resolusyon kag nahisugtan ang paghiwat sang committee hearing sa pagpanguna sang Committee on Transportation, Communication and Public Utilities nga ang chairman sang sini nga komite amo ang board member nga si Philippine Councilors League president Ramon “Monsik” Sullano.
Nahisugtan sang mga katapo sang Sangguniang Panlalawigan sang Iloilo sa pagpamuno ni Vice Gov. Christine “Tingting” Garin nga ipatawag ang mga tiglawas sang ILECO I, II kag III agud nga magpaathag tuhoy sa hinali nga pagsaka sang balayran sa kuryente kag kon mahimo nga ipaiway anay ang pag-utod sang linya nga nagaangot sa mga kuntador sang kada konsumidor nga may problema sa ila electric bill.
Nagtambong sa committee hearing si Engr. Miguel Paguntalan, ang ILECO I general manager; si Engr. Jose Redmond Eric Roquios, ang general manager sang ILECO II; kag Ms. Consorcia Peñaranda, ang general manager sang ILECO III.
Ginpaathag sang mga electric cooperative nga nagpatuman sila sang estimated billing sadtong mga bulan sang Marso kag Abril, ilabi na nga ang katapusan nga reading sa mga kuntador ang natigayon sadtong bulan sag Pebrero. Ginkabangdan ini sang hinali nga pagsaka sang ila electric bill sa bulan sang Mayo kag Hunyo bangud diri ginkarga ang ila bill sadtong Marso kag Abril.
Ginpanugyan sang mga electric cooperative sa mga konsumidor nila nga mahimo bayaran sa sulod sang duha ka bulan ukon staggered payment ang ila electric bill.
Nagpaathag pa gid nila dugang nga ang pagpatuman sang estimated billing ang ginhingyuan sang pahanugot gikan sa mga local government unit.
Mahimo nga padulungan sang mga konsumidor ang kada customer welfare desk ukon CWD sang mga collection office nga nahamtang sa kabanwahanan.
Diri naton makita nga wala nagapabaya ang Sangguniang Panlalawigan sa yamo kag reklamo nga ginapalab-ot sa ila sang mga pumuluyo sa probinsya sang Iloilo.
Ang pag-akto sang Sangguniang Panlalawigan ang isa ka patimaan nga ginapasulabi ang interes kag kahimtangan sang mga pumuluyo nga lubos nga apektado, ilabi na sa sini nga panahon sang pandemya.
Nagakaangay nga balikdon ang mga konsumidor nga mga residente man sang probinsya sang Iloilo agud pamatian ang ila hibubun-ot ukon reklamo sa serbisyo nga ila ginabaton.
Nalipay ang kadamuan sa nangin resulta sang pagpakigsugilanon sang Sangguniang Panlalawigan sa mga general manager sang tatlo ka electric cooperative bangud sila mismo ang nagpaathag kag naghatag sang desisyon sa kon ano ang matabu sa mga kuntador sang ila mga konsumidor.
Matuod gid man nga kon indi mapalab-ot sa natungdan ang reklamo, mabudlay lauman ang sabat gikan sa ila.
Apang sa bulig sang Sangguniang Panlalawigan, nahatagan sang kusog ang tingog sang mga nagareklamo, wala nauyang ang ila pagpalab-ot sang reklamo, bangud gintalupangod gid kag gin-aktuhan para sa kasanagan sang tanan.
Dapat nga balikdon gid ang mga konsumidor bangud paagi sa ila mga kabalaka nga ginapalab-ot mangin giya ini sa pag-imprubar sang serbisyo nga amo ang mayor nga katungdanan nila para sa mga tawo.
Indi pagdalukan sang higayon, ang mga konsumidor dapat nga atipanon, dapat nga balikdon kag dapat nga amumahon. (bertladera@gmail.com/PN)
