KAANGAY sa kinaandan, nangin maduagon kag puno sang paglaum ang pagsug-alaw sa bag-ong tuig.
Bisan sa diin man nga pungsod kag may dalagku nga syudad, kalabanan nga ginahimo nga national holiday ang pagselebrar sang una nga adlaw sang tuig nga nabase sa Gregorian kag Julian calendar.
Masami ini nga gina-updan sang mga hilikuton nga napuno sang duag, kalipay kag paglaum. May mga fireworks display sa madamo nga lugar, may parada sa iban kag mga hilikuton nga nagapasalamat sa nagabiya nga tuig kag pag-abi-abi sa nagapasulod nga tuig.
Nagapati ang tanan nga dapat tingob ang pamilya ukon kaupod ang mga pinalangga sa kabuhi sa pagselebrar sang bag-ong tuig. Nasandig ang pagsaulog sa mga tradisyon nga nagatuyo sa pagdapit sa swerte kag kadalag-an sa palaabuton nga tuig.
Magkatuhay, pinasahi, kag masinadyahon ang pagselebrar sang bag-ong tuig, depende sa kultura, kostumbre kag panimad-on. Gina-updan sang dagaya nga pagkaon kag mga ilimnon. Samtang, ang mga palupok amo naman ang nagatabog sa mga malas agud nga mag-upod sa nagabiya nga tuig kag agud nga may ligwa sa pagbaton sa dala nga swerte sang nagapasulod nga tuig.
Madamo sang nagapati nga higayon ang bag-ong tuig sa pag-abi-abi sa mga positibo nga pagbag-o sa ila kabuhi kag ang pagbalikid sa mga leksyon nga ginhatag sang nagabiya nga tuig.
Madugay na kag pinakatigulang nga selebrasyon ang pagsug-alaw sang bag-ong tuig apang wala sang husto nga petsa kag ang sahi sang pagsaulog ang naligwat sa nakalipas nga panahon.
Nag-umpisa ini sa linibo na ka tuig sa dumaan nga Babylon nga nagsaulog sang onse ka adlaw nga kasadyahan umpisa sa una nga adlaw sang spring time.
Sa sini nga panahon, madamo sang mga kultura ang nagasandig sa tiyog sang adlaw kag bulan nga amo ang ‘una’ nga adlaw sang tuig. Apang, si Julius Caesar nagpatuman sang Julian calendar nga ang Enero 1 amo ang mangin kumon nga adlaw para sa selebrasyon. Ang kaundan sang kasadyahan ang nangin tuhay sa kada isa. Ang una nga pagsaulog nangin mas labaw ang pagka-pagano, ginsaulog ang tiyog sang kalibutan, nagsaulog ang mga Kristiyano sang Feast of the Circumcision of Christ sa adlaw sang bag-ong tuig, ang mga Romano Katoliko masami nga nagaselebrar sang Solemnity of Mary, Mother of God, nga piyesta sa pagpasidungog kay Maria.
Apang sadtong ika-20 nga siglo, ang selebrasyon mas nagdaku kag kadamuan sini ang nagsipak gikan sa kumon nga pag-angot sa relihiyon. Nangin selebrasyon nga naangot sa nasyunalidad, relasyunes, kag introspeksyon ukon pagpanghuna-huna santu sa balatyagon kag paminsaron, labaw kaysa sa relihiyoso nga pagsaulog.
Matuod nga may paglaum nga dala ang pagsaulog kag pag-abi-abi sa bag-ong tuig. Indi mapaathag ang ginabatyag sang tawo nga kalipay kag pagpati nga may dala nga swerte kag kadalag-an ang tagsa ka tuig nga nagasulod.
Indi naton mabali ang ini nga kinaandan apang nagakaangay nga saulugon ang matag-adlaw nga kabuhi nga regalo sa aton. Dapat pasalamatan ang tagsa ka higayon sa aton pagbugtaw nga aton masiplatan ang kaanyag sang kalibutan kag kapawa sang kasanag gikan sa adlaw.
Sa tagsa ka pagbugtaw naton nga aton masiplatan ang butlak sang adlaw, aton nga pasalamatan nga ang paglaum aton naaguman. Dapat ini nga pasalamatan sa kada pitik sang ginutlo.
Ang aton paghimakas yara sa kada adlaw sang aton kabuhi kag indi lang sa tagsa ka tuig nga naga-abot.
Indi lang naton pag-isandig sa bag-ong tuig ang swerte sa aton kabuhi, dapat updan naton ini sang paghimakas agud nga ang aton handom kag paglaum aton gid nga maagom. (bertladera@gmail.com/PN)
