NATAY-OG ang Malakanyang sa ginabukho nga “zero remittance week” sang mga overseas Filipino workers (OFWs) umpisa Marso 28 tubtob Abril 4, 2025.
Una ini nga ginpahayag sang mga OFWs sa Croatia bilang suporta kay anay Presidente Rodrigo Duterte. Suno sa ila, pamaagi ini sa pagpahayag sang ila protesta sa pag-arestar kay Duterte.
Ginapangabay sang Malakanyang sa mga OFWs nga hatagan sang prayoridad ang kaayuhan ang ila pamilya sa Pilipinas, nga amo ang lubos nga maapektuhan kon wala sang remittance nga matabu sa sulod sang isa ka semana.
Indi lamang ekonomiya ang pungsod ang maapektuhan kundi labi sa tanan ang kaugalingon nga pamilya sang OFWs nga nagasalig sa ila kita para sa matag-adlaw nga galastuhon, edukasyon, kag iban pa nga mga importante nga kinahanglanon.
Suno pa sa Palasyo, indi malain ang magprotesta apang dapat bana-banaon ang mga posible nga konsekwensya sa sini nga protesta.
Tungod sini, madamo sang mga OFWs ang naghatag sang reaksyon sa social media nga nagasiling nga indi apektado ang ila pamilya tungod may kaugalingon sila nga pangita kag palangabuhian.
Indi magpahawid ang mga OFWs, luyag nila nga magpalab-ot sang ila sentimento sa pamaagi nga ila ginapatihan nga sila ang mabatian kag matalupangdan.
Lantawon naton kon ano kaimportante ang remittance gikan sa mga OFWs sa ekonomiya sang pungsod, nga binilyon ka pesos ang kontribusyon kada tuig kag nagaserbe nga lifeline sang minilyon ka mga pamilya nga Filipino.
May epekto sa tagsa ka panimalay kag ekonomiya ang tublag sa pagsulod sang pinansyal gikan sa luwas sang pungsod.
Pasiplatan naton ang sitwasyon, sadtong 2024, ang mga OFWs nagpadala sang record-breaking nga 38.34 billion US dollar ukon kapin sa 2.2 trillion pesos nga nagsulod direkta sa ekonomiya ang Pilipinas paagi sa ila pangabudlay kag sakripisyo.
Para mahampang naton ang iya kadakuon, lantawa ang bug-os nga 2025 national budget nga ₱6.326 trillion. Buot-silingon, ang ginapadala sang mga OFWs katumbas sang one-third sang tuigan nga badyet sang pungsod.
Nagakahulugan nga ang ina nga kwarta nga ila ginapadala makapakaon sang mas o menos sa 25 milyunes ka mga Filipino, kapin ini sa 9.4% sang Gross domestic product (GDP), makapapag-on sa peso kag makapahagan-hagan sa inflation, masuntenir sini ang private consumption nga amo ang nagaduso sa kapin 70% sang economic activity, kag mapabilin sini nga maglutaw ang mga bangko kag ekonomiya sa kaumhan.
Sadtong Disyembre 2024 lamang, ang personal remittances naglab-ot sa 3.73 billion USD ukon masobra ₱210 billion sa isa lang ka bulan.
Kon tungaon naton sa apat ka semana ang ₱210 billion, kapin sa 52.5 billion pesos ini. Kon ini ina magsulod sa semana sa pungsod, posible nga maapektuhan ang aton Dollar reserves, magauyang ang Peso, magasaka ang import costs, magakuriit ang financial institutions, kag magaluya ang consumer spending.
Maathag nga ang mga OFWs indi lamang mga migrant worker, sila ang ginakabig nga financial lifeline sang Pilipinas. Kon magsiling sila nga “no remittance for a week,” indi lang nila luyag nga mabatian kundi nagapaandam sila nga ang bug-os nga sistema marusdak kon wala sila.
Ang remittance sang mga OFWs sang tuig 2024 mas mataas sang 3% sang nagligad nga 2023 nga USD $37.21 billion.
Maathag kon ano kaimportante sang papel sang OFWs kag remittance sa ekonomiya sang pungsod.
Liwaton naton, tuman ka daku sang impact sang sini nga mga remittance sa ekonomiya sang Pilipinas. Sadtong 2024, nagarepresentar ini sang 8.3% sang Gross Domestic Product (GDP) sang pungsod kag 7.4% sang iya Gross National Income (GNI). Importante ini nga economic driver.
Ang nagapanguna nga ginahalinan sang cash remittances amo ang United States, Singapore, kag Saudi Arabia, kon sa diin ang US nagapabilin nga largest contributor.
Sa bilog nga kalibutan, nagapang-apat ang Pilipinas sa mga top remittance-receiving countries sang 2024, suno sa World Bank.
Nagapanguna ang India (USD $129 billion), sunod ang Mexico (USD $68 billion), kag China (USD $48 billion). Ika-apat ang Pilipinas nga ginasundan sang Pakistan (USD $33 billion).
Ang pang-apat nga lugar sang Pilipinas sa bilog nga kalibutan sa bahin sang remittance nagapatimaan sang signipikante nga kontribusyon sang OFWs sa abroad para sa palangabuhian sang ila pamilya kag sa ekonomiya sang pungsod.
Maathag nga indi naton pwede nga hikayan ang mga OFWs, indi angay nga pahugon, kag hatagan sang lain sang buot.
Kon indi sila makapadala sa ila pamilya, ano ang matabo? Posible nga naanad na sa atrasar nga pagbaton ang ila mga himata. Posible nga ang iban wala man gid lubos nga nagasalig sa ginapadala tungod nga may pangita man kada adlaw.
Kon usisaon mo ang sitwasyon, ang ginapadala sang mga OFWs para sa ila pamilya napartiniser nga pambayad sa eskwelahan, pambakal sang bulong ukon maintenance, kag kon may proyekto nga ginapaobra kaangay sang pagpakay-o sang ila balay ukon pambayad sa salakyan, ukon sa ila ginbakal nga propyedad.
Masiling kita nga isa man lang ina ka semana, mapadala man ina sila gihapon sa masunod pa gid nga semana. Korek. Apang ang diskaril sa tayuyon nga dalagan sang ekonomiya indi naton mapulong ang mangin epekto sini.
Kabay pa nga magbatyag ang gobyerno kag alalayan ang nagapabatyag nga mga OFW. (bertladera@gmail.com/PN)
