NANGIN madinalag-on ang Pilipinas sa iya paghakot sang kabug-usan nga 227 ka mga medalya sa bag-o lang natapos nga 31st Southeast Asian (SEA) Games sa Hanoi, Vietnam.
Nagpang-apat ang Pilipinas sa sini nga biennial meet kasunod sang pag-angkon sang 52 ka gold, 70 ka silver kag 105 ka bronze nga mga medalya.
Kapin sa 981 ang delegasyon sang pungsod sa 31st SEA games. Naghimakas kag nagbulig sila agud nga magpangibabaw ang pungsod sa sini nga hinampang.
Antes pa man ang pagsugod sang SEA Games kag pagkamadinalag-on sang pungsod, diri sa aton sa probinsya sang Iloilo may yara na sang ginduso nga ordinansa agud nga mahatagan sang angay nga insentibo kag pagkilala ang mga nagapakigbahin sa local ukon sa international sports events.
Sadto pa sang tuig 2020, napinsaran na ni Vice Governor Christine “Tingting” Garin nga tatapon ang mga atleta, mga coach, mga trainer ukon yadtong may direkta nga kabahin sa kadalag-an sang humalampang.
Kahibalo ang bise gobernador nga kulang kita sa pondo agud nga maatipan sing lubos ang mga humalampang kag ang mga nagahanas sa ila agud mangin sampaton kag mangin madinalag-on.
Kon kulang man kita sa pasilidad, ang mga atleta kag nagahanas sa ila ang nagapangita gid sang paagi kon paano matigayon ang tanan agud nga malabawan ang mga kasumpong kag mangin kabahin sa hanay sang mga kampiyon.
Bisan pa nga may pandemya apang pursigido ang bise gobernador sa iya tuyo nga mabuligan ang mga atleta kag nagahanas sa ila. Bisan pa nga nagapangatubang sang daku nga pagpanghangkat bangud sa covid-19 apang nangita sang paagi ang bise gobernador agud nga matigayon ang maayo nga tuyo.
Matuod nga naglawig ang panahon sa pagpanday sini bangud mas ginprayoridad ang mga bagay may kaantanan sa pagtapna sa pandemya kag ang ini nga bagay ang ginpaiway agud pasulabihon ang mas ginakinahanglan sang panahon.
Ginbalay ang ordinansa, gintalakay kaupod sa mga natungdan nga ahensya, ginplastar sing maayo kag nakompormehan sang tanan kag nadesisyunan nga angay ini nga aprubahan.
Gin-aprubahan unanimously sang mga katapo sang 13th Sangguniang Panlalawigan ng Iloilo nga nagtambong sa 137th Regular Session ang Provincial Ordinance No. 2020-217 nga may tigulo “An Ordinance Giving Rewards and Recognition to Iloilo Provincial Athletes, Coaches, Assistant Coaches, Trainers and Chaperones Who Excel in Sports Competitions of Various Sports Discipline Recognized and Sanctioned by the Department of Education, the Philippine Sports Commission and the Philippine Olympic Committee and Appropriating Funds Thereof.”
Ang author kag sponsor sang sini nga ordinansa amo mismo si Vice Governor Christine “Tingting” Garin kag co-sponsor ang tanan nga katapo sang 13th Iloilo SP.
Katuyuan sang ordinansa nga maghatag sang insentibo kag awards sa mga atleta nga nagdaug sa local, national kag international sports competition nga ginapatigayon sang Department of Education.
Ginhalimbawa sini nga kon magdaug ang atleta sa Palarong Pambansa may ginahatag nga insentibo ang Iloilo Provincial Government apang sa sini nga ordinansa lakip man nga hatagan sang insentibo ang coach, assistant coach, trainer kag chaperone.
Kahibalo man ang tanan nga kinahanglan sang atleta ang bulig sang coach ukon trainer agud magmadinalag-on sa kompetisyon.
May pagkanugon ang bise gobernador bangud wala nakaabot sa SEA Games ang pagkapasar sang ordinansa. Bisan pa nga naaprubahan ini sadtong Martes, Mayo 24, 2022, apang malawig nga tion ang kinahanglan antes mapatuman. Dapat nga ibalhag pa ini kag wala pa sang badyet sa sini nga tuig para diri. Ginpasiguro sini nga may yara na sang badyet nga ipain para sa masunod nga tuig.
Lakip man nga hatagan sang insentibo ang magadaug sa paralympics, ukon olympians nga ang torneyo ukon sporting events ukon kompetitisyon ginakilala sang Department of Education, Philippine Sports Commission, Philippine Olympic Committee kag International Olympic Committee.
Yari ang lauman nga insentibo sang mga atleta kag nagahanas sa ila.
1. Regional Sports Competition:
Sa pagdaug sang gold medal, ang atleta, coach kag trainer magabaton sang 5,000 pesos, 3,000 pesos para sa assistant coach kag 2,000 pesos para sa chaperone.
Sa pagdaug sang silver medal, ang atleta, coach kag trainer magabaton sang 3,000 pesos, 2,500 pesos para sa assistant coach kag 1,500 pesos para sa chaperone.
Sa pagdaug sang bronze medal, ang atleta, coach, assistant coach kag trainer magabaton sang 2,000 pesos samtang 1,000 pesos naman para sa chaperone.
2. National Sports Competition:
Sa pagdaug sang gold medal, ang atleta, coach kag trainer magabaton sang 8,000 pesos, 5,000 pesos para sa assistant coach kag 3,000 pesos para sa chaperone.
Sa pagdaug sang silver medal, ang atleta, coach kag trainer magabaton sang 6,000 pesos, 4,000 pesos para sa assistant coach kag 2,000 pesos para sa chaperone.
Sa pagdaug sang bronze medal, ang atleta, coach, kag trainer magabaton sang 4,000 pesos, 2,500 pesos para sa assistant coach kag 1,000 pesos naman para sa chaperone.
3. International Sports Competition:
a. ASEAN School Games
Sa pagdaug sang gold medal, ang atleta magabaton sang 30,000 pesos; 20,000 pesos para sa coach; 10,000 pesos para sa assistant coach; kag, 20,000 pesos para sa trainer.
Sa pagdaug sang silver medal, ang atleta magabaton sang 25,000 pesos; 15,000 pesos para coach; 7,000 pesos para sa assistant coach; kag 15,000 pesos para sa trainer.
Sa pagdaug sang bronze medal, ang atleta magabaton sang 20,000 pesos; 10,000 pesos para sa coach; 5,000 pesos para sa assistant coach kag 10,000 pesos para sa trainer.
b. SEA Games
Sa pagdaug sang gold medal, ang atleta magabaton sang 50,000 pesos; 30,000 pesos para sa coach; 15,000 pesos para sa assistant coach; kag, 30,000 pesos para sa trainer.
Sa pagdaug sang silver medal, ang atleta magabaton sang 30,000 pesos; 20,000 pesos para coach; 10,000 pesos para sa assistant coach; kag 20,000 pesos para sa trainer.
Sa pagdaug sang bronze medal, ang atleta magabaton sang 20,000 pesos; 10,000 pesos para sa coach; 5,000 pesos para sa assistant coach kag 10,000 pesos para sa trainer.
c. Asian Games
Sa pagdaug sang gold medal, ang atleta magabaton sang 100,000 pesos; 50,000 pesos para sa coach; 25,000 pesos para sa assistant coach; kag, 50,000 pesos para sa trainer.
Sa pagdaug sang silver medal, ang atleta magabaton sang 70,000 pesos; 40,000 pesos para coach; 20,000 pesos para sa assistant coach; kag 40,000 pesos para sa trainer.
Sa pagdaug sang bronze medal, ang atleta magabaton sang 50,000 pesos; 30,000 pesos para sa coach; 15,000 pesos para sa assistant coach kag 30,000 pesos para sa trainer.
d. World Cup/Championship
Sa pagdaug sang gold medal, ang atleta magabaton sang 300,000 pesos; 100,000 pesos para sa coach; 50,000 pesos para sa assistant coach; kag, 100,000 pesos para sa trainer.
Sa pagdaug sang silver medal, ang atleta magabaton sang 200,000 pesos; 70,000 pesos para coach; 35,000 pesos para sa assistant coach; kag 70,000 pesos para sa trainer.
Sa pagdaug sang bronze medal, ang atleta magabaton sang 100,000 pesos; 50,000 pesos para sa coach; 25,000 pesos para sa assistant coach kag 50,000 pesos para sa trainer.
e. Summer/Winter Olympic Games
Sa pagdaug sang gold medal, ang atleta magabaton sang 500,000 pesos; 200,000 pesos para sa coach; 100,000 pesos para sa assistant coach; kag, 200,000 pesos para sa trainer.
Sa pagdaug sang silver medal, ang atleta magabaton sang 400,000 pesos; 150,000 pesos para coach; 75,000 pesos para sa assistant coach; kag 150,000 pesos para sa trainer.
Sa pagdaug sang bronze medal, ang atleta magabaton sang 300,000 pesos; 100,000 pesos para sa coach; 50,000 pesos para sa assistant coach kag 100,000 pesos para sa trainer.
Gin-athag sini nga bisan may ginahatag nga insentibo ang Iloilo Provincial Government apang nagadepende kon may available nga pondo. Tuhay na ini karon kon may ordinansa na bangud pagapainan gid ini agud mapasiguro nga may mahatag nga insentibo sa mga nagdaug nga atleta kag iban pa.
Makahatag ini sang inspirasyon sa mga humalampang kag naga-ubay sa ila bangud nga kon magdaug sila sa local sports competition may nagahulat nga insentibo kag bangud nga sila man ang magahampang sa regional level, may insentibo pa gid nga nagahulat ukon samtang padayon ang ila pagdaug sa kompetitisyon sa kada level padayon man ang pagbaton nila sang mas nagadaku nga insentibo.
Nahangpan sang bise gobernador nga tuman ka kulang ang suporta sa paghanas sa mga atleta kag paagi sa sini nga insentibo mahatagan sila sang inspirasyon agud nga magpadayon kag magmadinalag-on.
Bentaha para sa atleta nga madamo sang sahi sang hampang nga ginapasakupan bangud daku ang posibilidad nga madamo man sang madag-an kag mabaton nga mga insentibo.
Nagapati ang bise gobernador nga nagasibu sa panahon ang pagpasar sang ordinansa bangud naga-umpisa na ang face-to-face classes sa mga eskwelahan kag may hiwaton na nga mga hinampang sa palaabuton kag madamo gid ang makabenepisyo sa sini nga ordinansa.
Nagapasalamat si Vice Governor Christine “Tingting” Garin sa mga kaupod niya sa 13th Iloilo SP, nag-co-sponsor kag nagsuporta ang tanan nga board member sa sini nga ordinansa kag kay Governor Arthur Defensor, Jr. sa pag-aprubar kag pagsuporta sa sini nga ordinansa.
Kabahin ini sang pagtatap sang bise gobernador sa mga atleta nga nagatinguha nga maghatag sang dungog sa aton probinsya. Ang ila mabaton nga insentibo ang mahimo indi takus sa ila kabudlay kag kadalag-an apang ang pagkilala sa ila daku na nga bahin sang ila paghimakas kag kadalag-an.
Kabay nga indi malipat ang mga atleta, ang mga kampiyon, nga ang insentibo kag pagkilala sa ila ang kabahin sang matinatapon nga kinaiya ni Vice Governor Christine “Tingting” Garin. (bertladera@gmail.com/PN)
