Pahabyog sang inumol

MADAMO sang nagdugay sa pulitika ang wala nagatuga sang ila kasumpong samtang sila ang nagapataklad padulong sa ila ginahandom nga posisyon. Ginapili nila ang ila supakon kag ginalantaw nila ang mangin konsekwensya sini sa palaabuton.

Indi malikawan nga habuyon sang isyu, indi mapaiway ang pagtuhaw sang isyu, apang ang kahibalo lang mag-usar sang pwersa kag pagsakay sa balud ang indi malunod.

Ginalantaw ko nga indi magdugay sa pulitika si Senator Manny Pacquiao bangud ginagatungan sang iya likom nga mga kasumpong ang iya ambisyon. Ginagamit siya nga paon kag manugpuhag sa iya kaugalingon nga grupo.

Nakita sang oposisyon nga mabudlay pukanon ang partido sang administrasyon. Nakita man sang oposisyon nga madamo sang intresado nga magpadalagan bilang presidente. Nakita man sang oposisyon nga daku ang handom ni Pacquiao nga mangin pesidente, kag nakita man sang administrasyon nga mahapos manipulahon si Pacquiao. Gamiton nila ang handom ni Pacquiao, ang iya manggad kag ang iya kabantog agud nga rumpagon ang mapag-on nga partido kon sa diin siya ang kabahin.

Matuod nga naghimakas si Pacquiao tubtub nga nalab-ot niya ang iya handom sa kabuhi. Nagmadinalag-on siya sa patag sang boksing kag nangin kampiyon. Nakatipon siya sang manggad kag nakapundar sang madamo nga propyedad. Indi kita makasiling nga may mga nahimo siya nga anomaliya ukon mantsa sang kurapsyon. Madamo siya sang nabuligan kag bantog siya nga maalwan.

Madamo siya sang abyan sa patag sa boksing, mga abyan kag kakilala niya nga may angay nga interes diri. Apang tuhay ang kalibutan sang pulitika, ang imo abyan sa patag sang boksing ang posible mangin kasumpong mo sa patag sang pulitika.

Wala kita sang kwesyon sa iya handom nga magserbisyo. Apang sa sulsol sang nagapakumo-kuno nga iya mga abyan, siya karon ang mabutang sa alang-alang.

Madamo siya sang ginakwestyon nga kurapsyon sa mga ahensya sang gobyerno. Lunsay pahabyog nga alegasyon kag dapat sini nga ipresentar nga may pamatuod agud nga indi siya mangin kaladlawan sa mata sang kadamuan.

Huo, indi madula ang kurapsyon. Indi makontrol sang gobyerno ang handom kag lihok sang kada isa. May mga tawo gid nga nagakasilaw sa inggat sang kwarta. Apang ang importante nga may ginahimo ang gobyerno agud nga matapna kag indi maglala ang kurapsyon. Indi perpekto ang gobyerno sang Pilipinas. May kurapsyon man nga nagakatabu bisan sa mga manggaranon kag moderno nga estado ukon mga pungsod. Indi matungkad sang gobyero ang motibo sang kada sini empleyado ukon trabahante.

Nagsiling si Pacquiao nga may kurapsyon sa Department of Health. Posible ang ginatumod sini amo ang pondo nga ginagamit sa pagbakal sang bakuna. Apang maathag man nga ang ginahulam nga kwarta ang yara sa karon sang nagapautang kag sila ang mismo nagabayad sa nagasuplay sang bakuna para sa pungsod. Wala sang kwarta nga nagakadto sa kamot sang gobyerno ukon sa bisan sin-o sa DOH.

Madamo pa siya sang mga ginapangmitlang nga ahensya sang gobyerno kag tanan ang nagasabat nga mapag-on kag may pamatuod.

Kaangay lamang nga nagapahabyog sang iya inumol si Pacman. Kon may binlog, kon mahuyang, kon may mantsa sang kurapsyon, sigurado gid nga malipong. Apang ang maathag, sa kada habyog sang iya inumol wala sang may naigo kag mas nasakam pa ang iya integridad bilang senador.

Ginatib-ong siya sang mga may interes sa pulitika bangud sa handom nga pondohan sila ni Pacquiao. Bisan kahibalo sila nga alang-alang ang iya abilidad, apang padayon ang iya pagdabok sa iya handom agud nga sila ang maagsikan sang kwarta para sa eleksyon.

Kabay nga makapangadi si Pacquiao, kaangay sa masami niya nga ginahimo, agud nga masanagan siya nga ginagamit lamang siya sang iban para sa ila kaugalingon nga interes.

Kabay pa nga masakam si Pacman sang inumol sang kamatuoran agud nga siya ang maumpawan kag makamarasmas nga ginagatong siya sa altar sang sakripisyo sang mga oposisyon nga nagahandom nga pukanon ang administrasyon.

Imbis nga magtipon siya sang kahimbon, nagtuga siya sang dibisyon kag nangin mitsa siya sa pagsalangisag sang iya partido.

Kon magpamati siya sa mga gung-an sa pulitika, ila ini nga ginalaragway bilang isa ka formula sa matematika, ang pulitika para sa ila ‘addition kag multiplication’ kag indi ‘subtraction ukon division’.

Indi ni Pacquiao matapos ang malawig nga round sang iya sambuwa sa pulitika bangud subong pa lang nagalindo-lindo na siya sa tupa sang inumol sang mga kapartido niya.

Pila na ka habyog sang inumol sini ang nangin palso kag wala may naigo apang siya ang kapila na nasakam kag karon nagasubahar na ang iya tinaga nga wala siya nagakontra kay Presidente Rodrigo Duterte.

Malawig pa ang batalya antes ang pag-file sang certificate of candidacy. Madamo pa sang panit ang matukal. Madamo pa sang alukaba ang maluak.

Kon indi pagliwaton ni Pacman ang direksyon sang iya ginausoy nga dalan, lauman naton ang iya pagtalang. Diri niya mahangpan nga ang boksing tuhay sa pulitika, mahimo nag madungan apang indi pwede nga masimbog.

Sa boksing, ang inumol nagakuom; sa pulitika, ang palad nagahumlad. (bertladera@gmail.com/PN)