INDI MALIPOD ang masubo nga sitwasyon kon may pasyente nga ginatatap sa ospital. Daku nga huol ang ginatuga sini sa matag-adlaw nga pagpangabuhi tungod sa daku nga kagastuhanan sang panimalay agud nga masustenir ang pagpabulong sang pasyente.
Mabudlay kon ang bulong nga ginareseta sang doktor indi available sa ospital kon sa diin na-confine ang pasyente. Nagapalibog ang mga himata kon sa diin makabakal sang bulong. Nagalibot sa mga botika sa gwa sang ospital, gina-isa-isa ka pamangkot kon sa diin pwede makabakal ang bulong nga tuman ka iwat pangitaon.
Malawig nga panahon ang gina-uyang sang mga himata sang pasyente sa pagpangita sang bulong sa palibot sang ospital. Masami man nga nagalab-ot sa iban nga lugar ukon sa syudad sang Iloilo kon sa diin makita ang bulong nga tuman ka iwat.
Ang masakit pa gid kon tuman ka mahal sang bulong nga halos indi masarangan sang mga himata sang pasyent. Nagabakal sila nga amat-amat lamang ukon indi nila matingob suno sa ginareseta sang doktor. May mga bulong nga libo ka pesos ang bili kag halos nagapalamunggo ang mga himata sa pagpangita sang kwarta agud mabakal ang ginreseta nga bulong.
Ang ini nga sitwasyon nga makita naton sa aktwal kag reyalidad nagtulod sa 14th Sangguniang Panlalawigan nga magpapag-on sang ordinansa agud nga masolusyonan ang ini nga palaligban sang mga himata nga may pasyente sa ospital.
Gin-aprubahan unanimously sa 20th Regular Session sang mga katapo sang 14th Sangguniang Panlalawigan ng Iloilo ang Provincial Ordinance No. 2022-287 nga gin-author nanday 4th District Board Member Domingo Oso, Jr. kag 1st District Board Member Marcelo Valentine Serag, kag co-author si Ex-Officio Board Member Dorothy Paes, ang Presidente sang Liga ng mga Barangay – Provincial Federation.
Nahibaluan nga ang Provincial Ordinance No. 2022-287 may tigulo “An Ordinance Amending Provincial Ordinance No. 2012-095, an Ordinance Insitutionalizing the Hospitals Consignment System in the Province of Iloilo”.
Sakop sang sini nga ordinansa ang karon nga Provincial kag mga District Hospital sa Probinsya sang Iloilo. Lakip pa gid ang mga posible matukod nga mga ospital sa palaabuton nga yara sa idalom sang pagdumala sang Iloilo Provincial Government.
Ang Consignment ukon Consignment System isa ka metodo sa pagpasiguro nga may available nga stocks nga ginatugyan ang Consignor sa provincial kag district hospital pharmacy ukon sa iban nga division/unit/section kag mga opisina sang Consignees para ibaligya, kag ang Consignor bayaran sang Consignee sa aktwal lamang nga nabakal gamit ang benta sang consigned goods, sa sulod sang nahisugtan nga panahon.
Ang consigned goods ukon items napatuhoy sa drugs, medicines, kag iban pa nga medical, dental, kag laboratory supplies, nga gina-deliver sang Consignor sa Consignee sa idalom sang consignment system.
Maayo ini nga lihok tungod masolusyunan na ang masami nga pagpanglat-as sang mga himata sang pasyente sa kon diin nga lugar agud makakita sang igadapat nga bulong.
Kahibalo man ang mga ospital kag ang mga kompaniya sang bulong kon ano ang masami nga ginakinanglan nga bulong sa balay-bululngan. May mga ospital nga wala nagabaton sang mga sahi sang balatian ukon dalagku nga medical condition tungod nga indi masarangan sang ila pasilidad kag gina-refer ini sa mga dalagku kag may kapasidad nga ospital. Diri ginakinahanglan ang mga bulong nga indi kinaandan ukon indi masami nga ginagamit bangud sa ka pinasihi sang medical cases.
Indi na mabudlayan sa pagpangita sang bulong, indi na sila mag-uyang sang panahon kag magastuhan sa pagpakadto kag pagpakari agud nga madapat ang bulong sa pasyente.
Kon indi man sila mabuligan sa ila pinansyal nga pagkinahanglan, buligan naton sila nga mapahapos ang ila paghulag. Buligan naton nga pas-anon ang ila ginaabaga nga palaligban paagi sa pagpangita sang solusyon nga indi sila mabudlayan. Isa ini ka lihok nga makapiyan-piyan agud na indi sila mabug-atan sa ila palaligban sa pag-atipan sa ila pasyente.
Nagapangita sang paagi ang Provincial Board nga pahapusan ang pumuluyo sa ila pag-atubang sa ila palaligban. Ginabatyag gid sang liderato ni Vice Governor Christine “Tingting” Garin ang kahimtangan sang pumuluyo kag bisan sa sini lang nga paagi magamag-an ang ila pag-atubang sa ila problema sa panimalay kag mapahapos ang ila pagsinarayo.
Ginalauman naton nga buylugan sang mga kompaniya sang bulong ang ini nga maayo nga tinutuyo sang aton gobyerno probinsyal kag ipabilin sang mga ospital nga mapuslanon kag makabenepisyo gid ang mga pumuluyo sa probinsya sang Iloilo. (bertladera@gmail.com/PN)
