KUN SIN-O ang maisog kag mabakas magsinggitan amo ang may mas madamo nga alokason sang bakuna.
Amo ini ang sitwasyon sang pag-allocate sang bakuna sang national government. Wala sang maathag nga sistema kag pagsulondan kun paano hatagan sang bakuna ang mga local government units.
Ini nga mga bagay ang natalupangdan ni Iloilo 1st District’s Cong. Janette Garin sa sistema ni vaccine czar Secretary Carlito Galvez Jr. Halimbawa lang sini sang nagpugait si Mayor Jerry Treñas nga wala na sang bakuna ang syudad, hinali lang naghugpa ang 50,000 ka doses sang Sinovac-BioNTech nga bakuna.
Mismo si Presidential Spokesman Harry Roque pa ang nagdul-ong sang mga medical equipment sa syudad sang Iloilo. Natublag bala sila kay nagpangisog ang alkalde sang syudad?
Paano naman ang mga nagahipos lang apang ginakulang man sang bakuna? Wala bala sang science-based nga pamaagi ang national government sa ila vaccination rollout?
Siling ni Galvez ang pagpadala sang bakuna depende sa populasyon kag sa pagsaka sang kaso sang COVID-19 sa isa ka lugar. Pero indi bala ang bakuna para punggan ang pagtapik sang balati-an, indi para paayuhon ang natapikan sang balati-an?
Kun ang pagtaas sang kaso ang basehan, sala nga sistema. Suno sa Department of Health duha ka semana tubtob isa ka bulan pa nga mangin aktibo ang depensa sang tawo sa virus matapos ang iya katapusan nga dose sang bakuna. Kun mag-amo sini ang sistema natun sa pagpanagtag sang bakuna, mangin wala sang kapuslanan ang papel sang bakuna sa pagdepensa sa tawo kontra sa virus.
Bisan may masiling kita paglapas sa proseso sang pagbatun sang bakuna si Garin bangud dapat nag-agi ini sa probinsya, indi man natun sya mabasol bangud mahinay gid katama ang sistema sang vaccination rollout sang gobyerno. Bilang isa ka vaccinologist, nahibaluan niya kun ano ang husto nga pamaagi sang pagpabakuna.
Ang atun probinsya may maayo nga liderato sa idalum ni Gov. Arthur Defensor Jr. Kalmado sa tanan nga desisyon kag nagasanto sa husto nga proseso ang lihok. Kun husto lamang ang sistema sang pagpanagtag sang bakuna halin sa Malacañang, ayhan hagan-hagan na ang problema sang COVID-19 sa probinsya.
Ang gobernador sang Iloilo wala nagaisip sang politika subong. Ang importante amo nga mahatagan sang bakuna ang nagakadapat hatagan. Kuntani amo man ini ang pinsar sang Palasyo.
Wala lang bala anay politika. Magdihon sang husto nga sistema agud mabatuan sang husto kag malupig ang pandemya!/PN
