Sa duha ka adlaw nga pagpanagtag sang paskwa sang city government sa mga senior citizens, pwd’s kag mga indigents nagdungan man ang pagdugok sang mga tawo sa District Office ni Cong. Jerry Treñas. Sa estorya sang mga nakakadto sa opisina ni Treñas may nakabaton man kuno sang paskwa kag cash pa. Ambot kun ano ang rason nga nagpamaskwa sng kongresista kag ang iya grupo. Ini man ayhan ang kabangdanan kun ngaa ang iban nga konsehal nga kaalyado ni Treñas wala nakakadto samtang ang iban naman ang late na?
Nagsugod ang pagpanagtag sang mga gift packs ang syudad sa pagpamuno ni Mayor Jose Espinosa III pasado alas 7:00 sang aga kag halos dungan sini malaba man ang pila sa opisina ni Treñas sa kilid sang Bureau of Fire Protection. Siling sang mga nagapila, may pamaskwa kuno si kongresman.
Maathag nga gindunganan ni Treñas ang programa sang syudad agud ipakita ang iya pwersa. Kag matuod ina, nakita gid ang pwersa sang kongresista bangud kun malaba ang pila sa atubang sang city hall, malaba man ang pila sa opisina ni Treñas. Pakitaay pwersa, patahum-tahum sang mahimo nga impresyon.
Ang pamangkot lamang diri, kay sin-o bala kwarta ang ginpanagtag sang magbilas nga Treñas kag Espinosa? Indi man sa ila bulsa indi bala? Ini bangud nga sigurado gid kun sa ila bulsa halin ang gasto, bigong ang sensilyo antes malamabot sa tawo.
Masakit nga ginapasaot kita sang mga politico s aila palad sa adlaw-adlaw nga ginhimo sang dyos. Mahatagan kita sang gamay nga agsik sang kwarta lipay na kita pero ang matuod, atun man ini kwarta pero sila ang nagadikta kun paano natun mapuslan. Sa kaso ni mayor Joe III, ginalauman na ina nga may pagpanagtag sang paskwa ang syudad kada disyembre bangud tradisyon na ini. Sa umpisa pa lang sang 2018, ginpainan na ini sang pondo sang alkalde. Maayo lang kay napatuman ini subong nga tuig.
Pauna lang ini nga pakitaay sang pwersa sang magbilas. Ano pa gid ayhan nga pasabog ang matabo sa ila.
May isa lang ka bentaha ugaling si mayor Joe III. Ini ang iya presensya sa barangay nga masami nya ginahimo. Wala sya nagasalig sa iya network bangud nagapanaog sya sa barangay agud makigsimpon s aila. Ang estilo naman ni Treñas amo nga pabakuron ang netrowk kag ang mga lider lang ang ipatawag. Makita man sya nga nagakadto sa barangay apang kun may okasyon lang. Kun ordinary nga paglibot, indi sta Makita. Wala pa sya Makita nga nagaupod kay aay Councilor Jamjam Baronda nga nagalibot. May nagasiling gani nga indi makatakud sa kakapoy kag indi ang kongresista. Pero indi man kita makapati bangud Makita natun nga healthy man sya kag mapagsik. Pirme lang nasiling ni mayor Joe III nga maayo ang iya lawas kag mapagsik sya nga nagalibot sa barangay indi kaangay sang iban…Siguro kamo na lang ang maghusgar.
PS: Salamat sa manamit nga Lechon sang Tatoy’s Manokan and Seafoods paagi kay Toto Hector Espinosa sa Christmas Party sang Iloilo City Hall Press Corps./PN
